¹ Ẹfi ene tu Ijerusanẹmụ, dẹ gụri Ibẹtifagi ọnri Ibẹtani, ini rẹsụfa Onivi, di Ijesu tụ eziafụ aani ẹẹva, ² dọ kaa yụ wa ka, "Wa nọ irẹkụra ana veyikayi nin. Waa ngwụ izọ kẹnẹ nin, u vee re ikẹtikẹtẹ oweyi ana razi shishirẹ yẹyẹ, ngwara a dụ wa si ọ ve tu mi nini. ³ Aaviki ọ nyi ẹzẹna fọ wụ nin ka, 'Sụ waa mẹ ọnọni tụni kẹ?' Dụ kaa yụ wa ka, 'Ananyiyi o si ka o nee no o; Ọ vaa si ọ tụ varama vẹ ụmụmọ.'" ⁴ Ẹ mẹ va na, de re ikẹtikẹtẹ oweyi ana zachire tuni ozovuovu inẹshẹẹshẹ, dẹ ngwara a. ⁵ Di azẹnyi ana dinẹ tụzọ fọ wa ka, "Ọmẹzi dụ waa ngwara ikẹtikẹtẹ oweyi ọnọ nin kẹ?" ⁶ Dẹ karẹyi ọni Ijesu ka yụ wa ki ẹ ka, di azẹnẹ navọ wa ki ẹẹ na. ⁷ Eziafụ ẹviva ẹnẹ ẹ si ikẹtikẹtẹ oweyi ọnọ ve tu Ijesu, dẹ tụ auru aanini ku o irami, doti Ijesu ọ zụ shirẹ ẹ. ⁸ Di azẹrụrụ tụ ita aanini dẹ tụọ tụni oze, di ẹnẹnavọ ji avọ-ọchi ẹnẹ tụ tụni oze. ⁹ Di ẹnẹna yini ọvidi aani, shi ẹnẹnaa vatụra a, si ọngwẹ tụẹba, dẹ ka, "Hosana! Ẹdabẹrẹ ọnọ vi yi ẹzẹnaa vẹ ini irẹsha Ananyiyi. ¹⁰ Ẹdabẹrẹ ọnọ vi yi ijọva ada ayi Idevidi anaa vẹ! Hosana yi Ada ayi ana yi ẹbẹba keekere!" ¹¹ Inaani, di, Ijesu ngwụ Ijerusanẹmụ na, dọ nọ ini itẹmpụrụ, dọ zamisa bo varakara. Umotu, di ẹfi si zina, dọ kụ eziafụ aani ẹwụrẹva, dẹ ziọ nọ Ibẹtani. ¹² Ini eyinineyishẹ aani, ẹ mẹ varama vẹ fụri Ibẹtani, di ụngwẹ aa kụ Ijesu. ¹³ O me re ọchi ifigi fụri irasha ọgọdọ, dọ na zama aaviki onvee re ẹtụtụ inẹẹsụ aani, ama ọ mẹ ngwụzọ, avi kẹnẹ ono re, fụvọki ẹfi ẹtụtụ ozi ti tu. ¹⁴ Dọ karẹyi shi ọchi ọnọ ka, "Ọzi nyi ẹzẹna va kụụ ri ẹtụtụ finẹẹsụ awụ poro pooro." Di eziafụ aani ẹ wụ ọ mẹ vọọ ka. ¹⁵ E tu Ijerusanẹmụ, dọ ngwụ ini itẹmpụrụ na, dọ dụ ẹnẹna sẹ ofu ini itẹmpụrụ finaani. Itẹbụrụ ẹnẹne che ẹkẹshi ọnri irẹfụ ẹnẹna na unomi onekuku vọnọ vagara. ¹⁶ Ọzi navọ ki ọzọnyọnyi ọ si isa ọnina zi itẹmpụrụ parafu. ¹⁷ Ọ zụ wa, dọ ka, "Aiva vana chẹrẹ ẹ ka, 'Ireshi ami vana vaa shi ireshi ozurenu yi irẹkụra bo'? Ama wa vara a tuni ireshi oyi nini." ¹⁸ Arufa ọbani nin ẹnri ọyofi nin mẹ wụ irẹyi ọnọ ka, dee si oze ẹnẹ vaa zi wụ ọ. Ama de ve shiangwani fụvọki, isa ọ nọọ zụ wa vene shi aza ọkọni nin bo eyi. ¹⁹ Ẹfiẹni oruva tu, dẹ fini irẹkụra ọbani ọnọ. ²⁰ Ẹ maa zi oze parafu ini ọnẹnẹ, de re ki ọchi ifigi ọnọ o su na ngwụ ẹpa aani. ²¹ Di Ipita va tamayi, dọ ka, "Irabayi, re! Ọchi ọnụụ chieku ọsi wẹngwani." ²² Ijesu ọ tu wa oshi, dọ ka, "Nyi ọdọwụ ini Oshomoshi. ²³ Ini irẹiza, ma kaa yụ wụ nini, ọzatụrọza ana ra kaa yi irẹsụfa ọnọni ka, 'Kwẹẹtẹ du we ne ẹngwụ awụ ngwụ ini irefu,' dọ razi sha ayi ẹvẹẹva, ama dụ nyi ọdọwụ ki isọn ka ki ọ vaa mẹ, avọ oni Oshomoshi mẹ vaa mẹ ẹ. ²⁴ Fụvavọ, maa kaa yụ wụ nini: Isa bo onuu ra fụvọ aani tuozurenu, duu fisue aani, nyi ọdọwụ ku we re dọ da, ọ vaa vi ayi awụ. ²⁵ Ụmẹ ọnụụ ra dinẹ, dụ wa tuozurenu, ụ bẹdọ re ku wa si aichama azabo vayaanini, doti Ada wụ ana ineeeku ọva zụ si aichama awụ vayawụ. ²⁶ Ama, waa zi si aichama ọza vayani, Ada awụ ana yi ineeku ọza si aichama awụ vayawụ." ²⁷ Ẹ varama ngwụ Ijerusanẹmụ. Ijesu maa zụsẹ ini itẹmpụrụ, di arufa ọbani nin, ọyofi nin ọnri azẹkụ nin ve tu o. ²⁸ Dẹ kaa yọ ka, "Yere ụmọ ọnụ waa sii mẹ isẹnẹni, ọnriki, ẹnẹ si ụmọ yụ wụ kụ wa mẹ wa kẹ?" ²⁹ Di Ijesu kaa yụ wa ka, "Mmvaa fọ wụ nin ipẹpẹ ọnya, waa ka yi mi nin, ẹmi zẹ vaa kaa yụ wụ nin ụmọ ọni maa si mẹ isẹnẹni. ³⁰ Ọsisami Ijọọnụ, fineeku wa yọ, navẹki finụvọ anẹshẹ? Tụmoshi nini." ³¹ Dẹ gaa nita dee pẹngwụ nyi ẹshankata, dẹ ka, "Aaviki ya kaa ka, 'Fineeku yọ,' dọ ka, 'Ọmẹzi di razi va dọ ọ wụ?' " ³² Ama ya kaa ka, 'Finụvọ anẹshẹ'...." Dee shiangwa aza fụvọki azabo ẹ dọ zẹ ki Ijọọnụ vi ọkisẹ. ³³ Inaani dẹ voshi yi Ijesu ka, "Ya zi yẹ." Di Ijesu va kaa yụ wa ka, "Ẹmi ọni ọi za ki kaa yụ wụ nin ụmọ ọni maa si mẹ isẹnẹni."