¹ Inaani, di Ijesu vẹrẹ a zụ wa isa ini ụshioche. Dọ ka, "Ọnọru ọnyi ọ dụbazi ivaini dọ ji ọvọ kara, dọ chi okoro ana yaa mẹ eche tuni ẹtẹ, dọva dareshi ana nẹba ọni oserẹtẹ vaa ya, dọva si ụbazi ọnọ yi ọnaarẹ anaa si eyi pe ụbazi ọnọ. Ọ mẹ mẹ ta, dọ naasha. ² Ini ẹfi ọna sẹrẹ, dọ tu ozida aani ọnya ki o ne tu ọnaarẹ ẹṇẹ doti ọ ḍọ wa ẹtụtụ ụbazi irayi ọnọ vẹ. ³ Ama, dẹ za ozida ọnọ, de tuo, dẹ dụ ọ varama ruvọ osusu. ⁴ Dọ zẹ tụ ozida aani ọsa na, dẹ sha a irẹsụ, dẹ mẹ ụshi nyi ọ. ⁵ Ozida ọsa ọnọ zẹ tụ na, vẹnẹ wu. Ụvọ ẹnẹ si za ọi ipapa, ẹnẹ si za ezida bo, ọnọ tụ ne tu wa; e tu ẹnyi, dẹ wu ẹnyi. ⁶ Ama ọ nyi ọza ọnya ana vọ, ana vi ozi aani ọnọ ngwuayi aani. Ọni ọnọ tụ ne tu wa kọọta. Dọ ka, "Ẹ va si ụbani yi ozi ami." ⁷ Ama, di ọnaarẹ ẹnẹ ka yi ẹngwu ka, Ẹzẹna vaa kụ ogu aani yi, navọ di ya wụ ọ, doti ogu ọnọ ọ si vi ayayi." ⁸ Ẹ za a, dẹ wụ ọ, de nee jinẹ fini ụbazi ọnọ. ⁹ Sọni ẹzẹna nyi ụbazi vaa mẹ kẹ? Ọ vaa vẹ, dọọ wụ wa va sha, dọ va si ụbazi ọnọ chire azẹnẹsa ụvọ. ¹⁰ Wa zi ki ka irẹyi ọnọni ọni iwe ọnini ka nini? 'Irẹta ọni ọdareshi nin yi tẹtẹ ọnọ vi oboro irẹta ana si za ireshi dinẹ.' ¹¹ Ọnọni vana fụri idi Ananyiyi vẹ, dọ vi isene shiyieyi.'" ¹² Dee si oze ki ẹ nẹ za Ijesu fuvọki ẹ yẹ ki ẹni ọni Ijesu e chushi shi, ama fụvọ azọkọni ana yi zọ, dẹ naavọ, dẹ na. ¹³ Inaani, dẹ tu Ifarisi nin ẹnri ezirama Ihẹrọdụ nin ne tu Ijesu ki ẹ si irẹyi irenu va irepa yọ. ¹⁴ Ẹ mẹ vẹ, dẹ ka, "Ọzụọzisa, yaa yẹ kụ wa ma zamẹgọgọ ọza dụ a va karẹyi, ọnri ki wa ma niọzaremeyi. Ya yẹ ki irẹiza ọmimẹ Oshomoshi ọnụ waa zụ aza. Ọwa vọrọ ki yee si imaana yi Isiza vavẹki ọzi vọrọ? U wa ki yee si, navẹki a sii si? ¹⁵ Ama, Ijesu ọ yẹ ki anapẹ ẹnẹ vi, dọ fọ wa ka, "Ọmẹzi dụ wa mọmire nin kẹ? Si ẹkẹshi idanari ọnya vẹ, di me re." ¹⁶ Ẹ si ọnya ve tu Ijesu, dọ fọ wa ka, "Ẹnu ụmama ọnri irẹsha aani yini ẹkẹshi ọnọni kẹ?" Dẹ ka, "Ọi Isiza." ¹⁷ Di Ijesu voshi ka, "Si isẹnẹ vi ayi Isiza yi Isiza, dụ wa si isẹnẹ vi ayi Oshomoshi yi Oshomoshi." Oshi ọni Ijesu si yụ wa dọvi isẹne shuweyi. ¹⁸ Inaani, Isadusi nin ana razi dọ zẹ ki ọza a varama sha kwẹẹtẹ fini isu, de ve tu o, dẹ fọ ka. ¹⁹ Ọzụọzisa, Imosisi ọ chẹrẹ tẹtẹ yiyi ka ọnọrụ ra nyọnẹ, do su dọ razi ma ozi, ọnyara aani va zụụ kụ ose aani ogu, doti ọ zụ mozi yi ọnyara aani ene su." ²⁰ Ẹnyara anẹru ishimba yinaani, ana vi ọzọku aanini ọ nyi ọnẹ dọ razi mozi dọ tangwa ve su. ²¹ Inaani, di ọgụẹva aani kụ ose aani ogu, dọ razi zẹ mozi do ve su. Avọ ọmẹ zẹ vi vi yi ọgụẹta aani. ²² Ọzi nyi ẹzẹna mozi ini ẹni ishimba bo de ve su. Ini ọikọta aani, di ọnyẹnẹ ọnọ nyẹmbẹ ze su. ²³ Ini ọshisha kwẹẹtẹ, ụmẹ ẹnẹ ra na sha kwẹẹtẹ, yere ẹzẹnọ vaa vi ose aani kẹ? Fụvọki ẹni ẹnyara ishimba ẹnẹ nyi ọ ọnẹ." ²⁴ Di Ijesu kaa yụ wa ka, "Aivi isẹnẹ mẹ wụ nin nyeeyi yi, fụvọki wa zi yẹ irẹyi iwe ọnini navẹki ụkata Oshomoshi nini? ²⁵ Fụvọki ụmẹ ana ra sha fini isu, azẹ ma nyi ọnẹ navẹki ọva, navẹki aa si ọnẹ ga, fụvọki ụmavọ di aza bo ku vene angẹni. ²⁶ Ama, inọpati ọshisha kwẹẹtẹ, wa zi ki kaa ini iwe Imosisi, ọ mẹ yini ụnọmi, Oshomoshi me pee karẹyi, ka 'Ẹmi ọnọ vi Oshomoshi Abrahamụ, Oshomoshi Aiziki ọnri Oshomoshi Ijekọbụ.' ²⁷ Aivi Oshomoshi azẹne su ọnọ vi, ama Oshomoshi azẹna yi ẹshẹ ọnọ vi. Wee nyeeyi nin." ²⁸ Ọzọnya ini ọyofi nin ọ vẹ, dọ wụ irẹyi ẹnẹ gaa ka, do wụ ki Ijesu ọ voshi ẹtẹrẹ. Dọ fọ ọ ka, "Yere ofi ene fu ini ofi bo kẹ? ²⁹ Di Ijesu voshi ka, "Enefu ini ofi bo ọnọ vi ki, 'Batọ, ẹwụ nin Isrẹni, Oshomoshi Ananyiyi vi ọnya. ³⁰ Ụ bẹdọ si ọtụtụrụma awụ bo, ifẹ awu bo, ayi awụ bo ọnri ụkata awụ bo fẹkẹ Ananyiyi Oshomoshi awụ." ³¹ Ofi ọfuva ọnọ vi ka, 'U bẹdọ sirẹyi ọzọ ọfụva awụ vene ẹngwụ awu.' Ọ zi nyi ofi ọsa ene funa ẹnẹni." ³² Di ọyofi ọnọ ka, "Ọzụọzisa, wa voshi ẹtẹrẹ. Irẹiza ọnụ ka ki Oshomoshi vi ọnya ọnri ki ọzi nyi ọzẹnẹsa ene vene. ³³ Ki ya si ọtuturuma ayi bo ọnri ọyiyẹ ayi bo ọnri ụkata ayi bo sirẹyi Oshomoshi, di ya zẹ sirẹyi ọzọfuva ayi vene imẹ sirẹyi ẹngwụ ayi, o funi ka a mẹ isẹvọ anaa rira ọnri isẹvọ anavọ bo yi Oshomoshi. ³⁴ Ẹfiẹni Ijesu re kọ si ụvira voshi, dọ kaa yọ ka, "Wa zi gọdọ yi ijọva Oshomoshi." Inaama ọnọ, ọzi va nyi ẹzẹna zai kụ fọ ipẹpẹẹ ọsa. ³⁵ Ijesu maa zụazisa ini itẹmpụrụ, dọ voshi ka, "Ọmẹzi di ọyofi nin a kaa ki, Ikristi vi ozi Idevidi? ³⁶ Idevidi nyẹmbẹ ọ kaa, ini Ifẹ Ọnini, ka, 'Ananyiyi ọ kaa yi Ananyimi ka, yatụ tuni ụvọri ami netu ẹfi ọnim va sii si ọnivi awụ mẹ irẹfụ ọnụụ vaa kụafụ tụra. ³⁷ Idevidi nyẹmbẹ vanaa shi ọ 'Ananyiyi,' ọọvọvi, Ikristi mẹ zẹ va sii vi ozi Idevidi?" Inẹ-oshine ọni azọkọni si batọ tuni irẹyi aani. ³⁸ Ijesu maa zụ wa isa, dọ kaa yụ wa ka, "Yarazi inụvọ ọyofi nin enee sirẹyi auru ọgọdọ ochichire, dee si kaa kụ ẹni ini akaakana ofu, ³⁹ dee zee sii si ki ẹnẹẹ yatụ tuni irẹfụ enefu ini isinagọgu ọnri irasha enefu izẹna ya rupe. ⁴⁰ Dẹẹ si apẹ dọ ose-okuu nin ireshi aanini, dẹẹ tuozurenu ọgọdọ doti aza e zụ re wa. Azẹnẹni ẹnẹ vaa dọ ishiọji ivi ene fu. ⁴¹ Umavọ, di Ijesu yatụ veeyika irasha apoti ẹkẹshi irafẹkẹ ini itẹmpụrụ, do re ẹnẹnee ne ẹkẹshi ngwụ inaani. Di opisa ọrụrụ si ẹkẹshi ọbani tuni apoti ọnọ. ⁴² Umotu di ose-oku onriwa ọnyi jinẹ vẹ, do ve ne ẹkẹshi epini ẹẹva ngwụ ọ. ⁴³ Ijesu ọ shi eziafụ aani, dọ ka yụ wa ka, "Ini irẹiza, ma kaa yụ wụ nin, ose-oku onriwa ọnọni ọnọ tụ fu ini aza bo ana tụ ẹkẹshi tuni apoti ọnọni. ⁴⁴ Fụvọki enbo vana si che fini isa ụnọmpa ẹnẹ nyi. Ama ose-oku ọnọni vana kụ isa bo ọnọ yanaa si mẹshẹ tẹtẹ, ini arimanyi aani."