¹ Ijesu maa zụsẹ na fiini itempụrụ, di ọnya ini eziafụ aani shi ọ dọ ka, "Ọzụọzisa, avu we re, irẹta ẹnẹni shi ireshi ana si wa da vi oshishozeyi!" ² Dọ kaa yọ ka, "Avu we re ireshi ẹnẹni mẹ bani tu, ọzi nyi irẹta ọnya ana vaa vọ tụra ọsa rẹsụ, ene rezee zina nyẹtẹ." ³ Ọ mẹ yatụ tuni irẹsufa Onivi, ana veyika itẹmpụrụ, di Ipita, Ijemsi, Ijọọnụ ọnri Andụrụ nin shi ọ tụni oboka, dẹ fọ ọ, ka, ⁴ Kaa yi yi, yere ẹfi ọni isẹnẹni vaa sii mẹ kẹ? Sẹnẹ vaa vi ami ana va sii yẹ ụmẹ ono re tu kẹ?" ⁵ Di Ijesu vẹrẹ, dọọ kaa yụ wa ka, "Si eyi peẹtẹ nini, asụụ navọ ki ọzọnyọnyi ọ za wụ nin nyeeyi. ⁶ Azẹrụrụ vaa vẹ ini rẹsha ami, dẹẹ ka, 'Ẹmi ọnọ vi Ikristi,' dẹẹ za azẹrụrụ nyeeyi. ⁷ Waa wụ ọsha irẹku ọnri ekuku irẹkụ, asụụ tụainẹ nin; isẹnẹni bo bẹdọ vaa mẹ, ama ụmẹ ọikọọta oi ti tu. ⁸ Fụvọki irẹkụravabẹ ẹrụrụ vaa kwẹẹtẹ tu ẹngwụ, ijọva ẹrụrụ vaa kwẹẹtẹ tu ẹngwụ. Ẹtẹ vaa jibora irasha ẹrurụ, ụngwẹ vaa yinaani. Isẹnẹni bo vene vee vene ọnyẹnẹ ana vẹrẹ aa barẹyẹ. ⁹ Sieyipeẹtẹ nini. Ẹ vaa za wụ nangwụ inọvidi iragụ ọnụmọ nin, e vee tu wu nin ini isinagọgụ. Ụ vaa dinẹ tụni ọvidi igomina ọnri oshinọyi nini fụvọ ami, dọ zụvi ivenu yụ wa. ¹⁰ Ama a bidi vaa showu irenube ọiza yi ẹshẹ keekere. ¹¹ Ụmẹ ẹnẹ ra za wụ nin, dẹ sụ wụ chire wa ụvọ, asụụ tụayinẹ inọpati irẹyi ọnụụ vaa ka; Fụvọki ini wakati ọnọ, a vaa si irẹyi ọnụụ vaa ka yụ wụ; ọzi vi ẹwụ ọnọ va kụụ karẹyi ụmavọ, ama Ifẹ Ọnini. ¹² Ọnyara vaa si ọnyara chire wa ụvọ ki ẹ wụ ọ; ada vaa si ozi aani chire wa ụvọ ki ẹ wụ ọ. Ezi va kwẹẹtẹ tu ada shi ọnyi, dọọ mẹ ka wụ wa. ¹³ Aza bo vaa kụayi awụ fụvi irẹsha ami. Ama ọzatụrọza ana ra nyi ọsiẹngwụdọ na ngwụ irẹsụ, ana va dọọ tụ. ¹⁴ Aaviki we re isaanyisi ki ọ dinẹ tụ irasha ana razi sẹrẹ (ọzatụrọza ana ra ka iwe ọnọni ọ daka sụtọpeẹtẹ, doti o ye ẹtẹrẹ) navọ di ẹnẹnayi Ijudiya ẹ kwafụkwechi shirẹ irẹsụfa na ya, ¹⁵ asi ẹzẹna yinẹẹsụ ireshi chi shiẹtẹ na ngwụ ireshi, navẹki ọ na si isọnsọnyi finaani, ¹⁶ asi ẹzẹna yi oziẹshẹ varama neeshi na si auru aani. ¹⁷ Ama, ọvaa ngwụ ọnirẹyẹ nin ọnri ọnyiozi inụvọ nin, ẹngwụ ini ẹkụshi ẹnẹ! ¹⁸ Tuozurenu nin ki a sọ mẹ ini ụmẹ ọgụ. ¹⁹ Fụvọki ẹkụshi ọngwẹngwụ ọbani ene rezi ri re ẹngwụ aani yẹẹyẹ, Oshomoshi mẹ fụrẹ mẹ ẹshẹ, ọnọ vaa vi, ọnri ki ọzi vọ kụa vi poro. ²⁰ Ọchishi ki Ananyiyi yini ẹkụshi ẹnẹ da kụra, ọzaa nyi anẹshẹ ana vaa dọọtụ. Ama fụvọ ẹnẹna ni renyi, ẹnẹna Ananyiyi ni, ọ yini ẹkụshi ẹnẹ da kụra. ²¹ Ụmavọ, aaviki ọnyi ẹzẹna ka yụ wụ ka, 'Re, Ikristi yi!' navẹki 'Re, ọni vọnọ!' asụụ dọọ wụ nini. ²² Fụvọki Ikristi anapẹ ọnri ọkisẹ anapẹ nin vaa jinẹẹ shi ẹshẹ, dẹẹ mẹ ụkọrọ oshishozeyi renyi renyi ẹnẹ va sii jiọzavene, shi ẹnẹnọ vi ki a ni renyi. ²³ Sieyipeẹtẹ nini! Ma tụwaje nin da, di ọkụshi ishọ o ve tu. ²⁴ Ama, inaama ọngwẹngwụ ọkụshi ẹnẹ, ọyi vee shoozi, ụfẹ ọi kua vụ, ²⁵ ụzọmi nin vaa javọ fini ovurukutu, shi ụkata ineeku nini vene vee sheni. ²⁶ Ụmavọ, e vee re Ozi Ọza ki ọọ vẹ ini egushi bẹri ụkata ọbani ọnri ụga. ²⁷ Ụmavọ, dọ va tụ angẹni aani, doo pere ẹnẹni ọ ni renyi fini aka-ẹnina ashi ọnri fini ẹgẹtẹ na ngwụ ẹgẹ ovurukutu. ²⁸ Kọsụẹ irẹyọọyẹ fini ọchi ifigi. Ụmọni avọchi aani ra vẹrẹ aa shavi, dụụ yẹ ki ọshashi o si tu. ²⁹ Ụmẹ ọnuu zee re ki isẹnẹni bo a mẹ, dụụ si yẹ ki ọvivẹ Ozi Ọza o sheni pe, ki ọ si gụrẹ ovuovu. ³⁰ Ini irẹiza, ma kaa yụ wụ nin ki evereze ọnọni ọzaa parafu poro ne tu ẹfi ẹni isẹnẹni bo vaa mẹ. ³¹ Ineeku ọnri ẹshẹ vaa parafu, ama ọzi nyi ẹfi ọni irẹyi ami va sii parafu. ³² Ama inọpati ọkushi ọnọ navẹki iwakati ọnọ, ọzi nyi ẹzẹna yẹ, shi angẹni ineeku nin, navẹki Ozi; ama Ada renya. ³³ Sieyipeẹtẹ nini! Zamẹtẹ, fụvọki wa zi yẹ ẹfi ọnọ vaa vi nin. ³⁴ O vene ọnọrụ anaa nasha, dọ si ireshi ani chire ozida aani ụvọ, dọva si ụkụrọ ọnọ ọzọza vaa mẹ yụ wa, dọ kaa yi oserẹtẹ aani ki a sọ nyi ẹfi ọnọ si sụara. ³⁵ Fụvavọ, sieyipeẹtẹ nin, fụvọki wa zi yẹ ẹfi ọni adareshi ọnọ va sii vẹ reshi; ọ zụụ vi ini oruva, ini ajirafụ, ụmẹ ọni ụkọkọrọ re nowu, navẹki ini ọnẹnẹ. ³⁶ Aaviki ọ vẹ ini asigiri, asụụ navọ ki o ve tu kụ waa sụara nin. ³⁷ Irẹyi ọnimaa ka yụ wụ nin aani, ọnim za kii ka yi aza bo: Sieyipeẹtẹ!"̄