¹ Ini ụmavọ, dọ zẹ nyi azọkọni ana razi nyi isari ẹnẹ vaa ri. Di Ijesu shi eziafu ani, dọ kaa yụ wa ka, ² "Ma nyi ayụva yi aza ọkọni ẹnẹni, fuvọki ọ si mẹ ẹkụshi ẹẹta ẹnẹ fụrẹ ya pe mi dẹ razi nyi isari ẹnẹ vaa ri. ³ Ẹmẹ razi ri ri isari aani, aaviki ma kaa yụ wa ki ẹẹ neeshi, ewu ve zuu kuweyi ini oze, fụvọki irasha ọgọdọ ọni ẹrụrụ ẹrụrụ aanini fụrẹ vẹ." ⁴ Di eziafụ aani tuoshi ka, "Izi ve yee re ivurẹdi ana vaa sha azẹrụrụ ẹnẹni inẹ, ini irasha ana maan jomi aan kẹ?" ⁵ Di Ijesu fọ wa ka, "Ivụrẹdi irẹgụ ya ọnụụ nyi nin?" Dẹ voshi ka, "Ishimba." ⁶ Dọ kaa yi aza ọkọni ẹnẹ ki ẹ yatu tunẹtẹ. Dọ si ivurẹdi shimba ẹnẹ, dọ mavọku, dọ da a, dọ si ọ yi eziafụ aani ki ẹ na gaa yụ wa. ⁷ Ẹẹ zẹ nyi nyi isenyi che. Ọ zẹ mavọkụ tụọ, dọ siọ yi eziafu aani ki ẹ zẹ gaa yụ wa. ⁸ Ẹ ri isari di inẹ aanini shi, di ewuri isari anavọ shi uji shimba, e me pere. ⁹ Aza ọkọni ẹnẹ e tu ọpati akashi oze ẹẹna. Inaani, di Ijesu kaa yụ wa ki ẹẹ na. ¹⁰ Ụmụmọ, di ọ ọnri eziafu aani ngwu ẹpa dẹ nọ ọkakooro Idamanuta. ¹¹ Umotu di Ifarisi nini jinẹ ve tu o, dee pee a nyi eshankata, dẹ kọ si ami fụri ẹbẹba zụ ẹni, dẹẹ siọ zama a re. ¹² O shifẹzẹtẹ ini ifẹ, dọ ka, "Ọmẹzi di evereze ọnọni e si ami kẹ? Ini irẹiza, ma kaa yụ wụ nin, ọzi nyi ami ana vaa si yi evereze ọnọni." ¹³ Inaani, dọ fụrẹwaụvọ, dọ varama na ngwu ini ẹpa, dọ ziọ na ngwụ akọsa. ¹⁴ Ọmẹyani, eziafụ aani e shayi ki ẹnẹ zi za ivụrẹdi chaụvọ, dọ vi ki ivụrẹdi ọnya kẹnẹ ẹnẹ nyi tụni ẹpa. ¹⁵ Di Ijesu ve fuwautọ ka, "Si eyipetẹ du we zue kavana yi ọva Ifarisi nin ọnri ọva Ihẹrọdu." ¹⁶ Di eziafụ aani ve pengwụ kaa ka, "Fụvọki ya zi za ivụrẹdi chaụvọ yọ no." ¹⁷ Ijesu ọ yẹ isẹnee ro ini ọtụtụrụma aanini, dọ fọ wa ka, "Ọmẹzi du we ro ka fuvọ ku wa zi za ivụrẹdi yọ nini kẹ? Wa zi vana nyi nyi ọyiyẹ nin aavọ? Aani ọni ọtụtụrụma awụ nini mẹ we vishi kụ nyi dọọrọ?" ¹⁸ Wa nyi iri, we me sio rẹtẹ nini? Wa nyi utọ, wa ma siọ wurẹyi nini? Wa zi tamayi nini? ¹⁹ Ụmọnim ga ivụrẹdi ẹshi yi aza akaawụ oze ẹẹva ri akaashi, uji ya irika ene shi yi ewuri ivụrẹdi ọnụụ pere nini? De voshi, ka, "Ẹwụrẹẹva." ²⁰ Ụmọnim ga ivụrẹdi ishimba yi aza akaawụ oze ẹẹva, uji ya irika ene shi yi ewuri ivụrẹdi ọnụụ pere nini? Dẹ voshi ka, "Ishimba." ²¹ Dọ va fọwa ka, "O zi yi ye wu nini?" ²² Ẹ vẹ Ibẹtisaida. Di aza ana yi izọ si oguri ve tu Ijesu. Dẹ dipẹ yọ ki ọ suvọ kani ọ. ²³ Ijesu ọ za oguri ọnọ ụvọ, dọ siọ jinẹ fini irẹkụra ọnọ. Umẹ ọnọ jatẹ tuni iri aani da, dọ si ụvọ tụra, dọ va fọ ọ ka, "Ọwa nyi isa ọnuu wee re?" ²⁴ Ọ veyishirẹ, dọ ka "Mee re aza ana simẹ ọchi anaa zụsẹ." ²⁵ Inaani, dọ zẹ varama kuvọtụra iri, di ọnọrụ ọnọ va shari sha, di ẹtoore aani va nudi, do kwe reẹtẹ ẹtẹrẹ. ²⁶ Di Ijesu ka yọ ki ọọ neeshi, dọ kaa yọ ka, "A sụụ ngwụ iboro na." ²⁷ Ijesu ọnri eziafu aani a ziọ nọ irẹkura Isiserea Ifiripi. Ẹ maa na inoze, dọ fọ eziafu aani ka, "Ẹni aza kaa ki maa vi kẹ?" ²⁸ Dẹ tuoshi ka, "Azenyi ka 'Ijọọnu Ọsami,' di azẹnẹsa ka, 'Enaija, di ẹnyi ka, 'Ọnya ini ọkisẹ nini.'" ²⁹ Dọ va fọ wa ka, "Ẹni ẹwụ nin ka ki ma vi?" Di Ipita tuoshi ka, ẹwụ ọnọvi Ikristi." ³⁰ Di Ijesu kawọnọ ka asẹ kaa yi ọzọnyọnyi inọpati awọni. ³¹ Dọ vẹrẹ a zụ wa ka, Ozi Ọza vaa rụya inoze ọrụrụ, ọnri ki azẹku, arufa ọbani nini, ọnri ọyofi nini, vee yi o tẹtẹ, a vaa wụ ọ, ama dọọ sha kwẹẹtẹ inaama ẹkụshi ẹẹta. ³² Irẹyi ọnọni vọnọ shashi yụ wa. Inaani ọni Ipita ya shi ọ tuoboka, doo tuofuvọ. ³³ Ama di Ijesu vareyi re eziafụ aani, do du Ipita ẹngwu, dọ ka, "Ẹwu azeeshi, tụ fụrẹmeyi. Wa zi kụ ọtụtụrụma awụ tụra isa Oshomoshi, ama waa kụọ tụra isa anẹshẹ." ³⁴ Inaani, dọ shi eziafu aani ọnri aza ọkọni gụ, dọ ka, "Aaviki ọ nyi ọzọnzọnyi enee si ki ọ naa vatụra mi, ọ bẹdọ yi osisi ẹngwụ aani tẹtẹ, dọọ si ọchi-avashi aani, dọ va vatura mi". ³⁵ Fuvọki ọzatụrọza one re si ki ọna di ifẹ aani tụ, vene vee vu o. Ọzatụrụza ene re ne ifẹ ani ta fụvọ ami ọnri fụvọ irenube ọiza, ve ree be. ³⁶ Ọgụ isọnọ vi yi ọza ki ọ dụ ẹshẹ bo za, di ifẹ aani si jaavọ.? ³⁷ Yere isa oni ọza va zụụ si dọ ifẹ aani irẹsụ kẹ?" ³⁸ Ọzatụrọza ana ra nyụshi fụvọ ami ọnri irẹyi ami ini evereze ọnọni ana kụẹngwụ vi aichama ọnri irẹka, Ozi Ọza vaa nyụshi aani umẹ ọnọ ra vẹ ini ụga Ada aani vabẹri angẹni ọnini nini."