¹ Ifarisi nin shi ọyofi ẹnyi ana fụri Ijerusanẹmụ vẹ, e perẹngwụ varakara Ijesu. ² E re ka eziafụ Ijesu ẹnyi ẹ si ụvọ ana razi ni ri isari, dẹ razi bidi nyinavọ. ³ (Fụvọki Ifarisi nin ẹnri Iju nin razi nyinavọ, ẹ ma risari, fụvọki ẹ ta isoshẹtẹ azẹkụ aanini ku. ⁴ Ifarisi nin ra fụrẹ ofu vẹ, ẹẹ zi fụenyi , ẹ ma risa. Avọ ọni ofi renyi renyi mẹ yinaani, vene ọnyinyina ikọpụ, oji, ọnya-ọrisa ọnri ode ẹnẹ yatụ tụ risari.) ⁵ Di Ifarisi ọnri ọyofi nin fọ Ijesu ka, "Ọmẹzi di eziafụ awụ ra ma vatụra isoshẹtẹ azẹkụ kẹ, fụvọki ẹ ma nyinavọ dẹ va risari?" ⁶ Ama dọ kaa yụ wa ka, "Aizaya ọ kaa tẹtẹ inọpati ẹwụ nin ọfatụvaku ka, 'Irenu kẹnẹ ọni azẹnẹni aa si si ụbani yi mi, ama ọtụtụrụma aanini ọ gọdọ yi mi. ⁷ Irafẹkẹ osusu ọni ẹ si yi mi, ama dẹ zụ aza ofi anẹshẹ, dẹ si ọ mẹ ọmimẹ aanini.' ⁸ Wa fụrẹ ụmọ Oshomoshi ụvọ, dọvi ki isoshẹtẹ anẹshẹ ọnụụ taku nini." ⁹ Dọ zẹ kaa yụ wa ka, "Ụ wa ki ọ vọọ sẹrẹ nin ki wee yi ụmọ Oshomoshi tẹtẹ, du we roze mẹ isoshẹtẹ awụ nini!" ¹⁰ Fụvọki Imosisi ọ kaa ka, 'Si ụbani yi ada awụ ọnri ọnyi awụ', ọnri ka, 'Ẹzẹna ra ka ọshimi ada aani navẹki ọnyi aani, vana bẹdọ vee su.' ¹¹ Ama ẹwụ nin vana kaa ka, 'Ozi ra kaa yi ada navẹki ọnyi ka, "Ọgụvọ ọnụụ yeen re dọ fini ụvọ ami, vi Ikobani, ọnọ vi ka, a si ọ yi Oshomoshi da" --- ¹² ọnọ vi ki ụ kaa yọ aavọ ki asọ nyi isa ọnọ kụ mẹ yi ada aani navẹki ọnyi aani. ¹³ Ọnọvi ki isoshẹtẹ ọnụụ jivẹtẹ nin, vọnu wa sii kụ ụmọ Oshomoshi sha; bẹri isa renyirenyi ene vene ọnọni, ọnọviki waa mẹ nini." ¹⁴ Ọ varama zẹ shi azọkọni ẹnẹ, dọ kaa yụ wa ka, "Ẹwụ nin bo, bematọ, doti irẹyi ami o ye wu nini. ¹⁵ Ọzinyi isọnyọnyi ana fini ẹshẹshẹ ngwụ ini ẹngwụ ọza dọọ vara ọzọnọ tuni arimani. Ama isa ana jinẹ fini ẹngwụ ọza vẹ ọnọọ mẹ ki ọ vara arimani. ¹⁶ Ẹzẹna ra nyi ụtọ ana sii wụrẹyi, navọ ọ wụ. ¹⁷ Ụmọni Ijesu fụri azọkọni ẹnẹ ụvọ da, dọ ngwụ ireshi, di eziafụ aani fọ ọ inọpati ụshioche ọnọ. ¹⁸ Di Ijesu ka, "Dọọvi ka oi ze yi ye ẹwụ nin nyẹmbẹ? Wa zi yẹ nini ka isẹnẹ ra nwgụ ini ẹngwụ ọza fini ẹshẹẹshẹ ki ọma vara ọza tuni arimani, ¹⁹ fụvọki ọi zua ngwụ ini ọtụtụrụma aani, ama inẹ ọnọọ ngwụ, izọ va zụ yee she vaa sha.?" Irẹyi ọni Ijesu ka aani, ọnọ si mẹ isari bo ọnini. ²⁰ Dọ ka, "Isẹnẹ jinẹ fini ẹngwụ ọza ọnọ vara ọza tuni arimani. ²¹ Fuvọki fini ọtụtụrụma ọza ọni aro ọshimi fụrẹ, irẹka ọsisẹ, uyi, ọwiwụ ọza, ²² ọsisi ose-onose navẹki ọva-ọnọva, ọkikweyi tụrisọza, ọshimi ọmimẹ, ọjijọzavene, osisi ẹchẹngwụ, ayamkụ, ọkika ọshimi ọza, ọkikụ ẹngwụ tuẹba, ụra ọmimẹ. ²³ Isa ẹshimi ẹnẹni bo ana fini inẹ vẹ, ẹnẹẹ vara ọza tuni arimani." ²⁴ Ọ kwẹẹtẹ fiizọ dọọ nọ ọkakooro irẹkụra anaa shi Itaya ọnri Isidọni. Ọ ngwụ ireshi ọnyi, ''do rezi si ki ọ nyi ẹzẹna yẹ ki ọni yi izọ, ama dẹ va sisi yẹ. ²⁵ Ama ẹfi ọni ọnyẹnẹ ọnyi ọni ifẹ azeeshi a zama ozi ani ọnyẹnẹ, wụ inọpati aani, dọ sẹsẹ vẹ, do ve kuẹtẹ tuni ọvidi aani. ²⁶ Ani Igiriki, fini ụvọrẹkụ Isironfẹnishiya, ọni ọnyẹnẹ ọnọ vi. Dọ dipẹ yọ ka o pe ọni fụ ifẹ azeeshi ana zama ozi awụọni fụrẹ ẹngwụ. ²⁷ Di Ijesu kaa yọ ka, "Navọ di ezi nin ẹ vidi ri isari di inẹ aanini o shi da. Fụvọki ọzi sẹrẹ ki isari ezi, ka ji ọ yi irezi nin." ²⁸ Ama di ọnyẹnẹ ọnọ tuoshi, dọ kaa yọ ka, "Ananyimi, maa vọvọ yẹ; shi irezi ana yi ini afụ itevuru nyẹmbẹ zẹ rii ri fini ewuri isari ezi ana javọ shiẹtẹ." ²⁹ Di Ijesu kaa yọ ka, "Fụvọki wa maan ka, waa na ki ifẹ azeeshi ọnọ ọ jinẹ fini ẹngwụ ozi awụ da." ³⁰ Ọ mẹ varama neeshi, do ne tu ki ozi awụọni ọ sụtụ tuni ode, do re ki ifẹ azeesh ọnọ ọ jinẹ fini ẹngwụ aani da. ³¹ Di Ijesu zẹ jinẹ fụri ọkakooro Itaya, dọ zi Isidọni parafu na ngwụ Irefu Iganini, dọ shirẹ na ngwụ ọkakooro Idẹkaponisi. ³² Dẹ si ọzọnyi ene gutọ, dọ ra ma zụ karẹyi kokoro, dẹ dipẹ yọ ki ọ sụvọ tụra a. ³³ Ọ si ọnọrụ ọnọ fini akaakana azọkọni nọ oboka, dọ ka ezigege aani ngwụ ọ ụtọ ẹviva, dọ jatẹ tụni igege aani, dọ va si ọ kani irarẹ ọnọrụ ọnọ. ³⁴ Do veyi shirẹ, do shifẹzẹtẹ, dọ kaa yọ ka, "Ephphatha", ọni ọshfụ sha aani vi, "Na!" ³⁵ Ụmụmọ, dọ vẹrẹ a wụrẹyi, isẹnẹ za irarẹ dọ ngwara, dọ kụ zua karẹyi ẹtẹrẹ. ³⁶ Di Ijesu kawọnọ ki asẹ kaa yi ọzọnyọnyi. Ama ọ maa kawọnọ tu, avọ ẹnẹ ma showu aani tụọ. ³⁷ O shuweeyi kokoro, dẹ ka, "Isa bo vọnọ mẹ ẹtẹrẹ. Shi ogutọ nin vọnọ mẹ dẹ zua wụrẹyi, shi evuvu nin dẹ zụa karẹyi.