¹ Ụpọsa dọ vẹrẹ dọọ zụazisa ini ụtọ irefu, di azọkọni ụnọmpa varakara a. Ọ ngwụ ini ẹpa ana yi inẹẹsụ enyi dọ na yatụ tụnaani. Di azọkọni ẹnẹ bo yini ụtọ irefu. ² Ọ zu wa isa ẹruru ini ushioche, dọ ka yụ wa ka: ³ "Batọ nin, ọnaarẹ ọnọ ọ kwẹẹtẹ ne chire ọina. ⁴ O mee chire wa, ẹnyi ẹ javọ tu ini oze, di unomi nin va tọyọ ri. ⁵ Ẹnyi ẹ javọ tụni irẹsụ irẹta ana razi nyi ezi, ụmụmọ dẹ chi fụvọki ẹtẹ ọnọ ọzi nyinẹ. ⁶ Ọyi mẹ sha tura wa, dẹ va wẹngwani, fụvọki ẹzi nyi ẹpa shiẹtẹ, de su vasha. ⁷ Ọina ọsa ẹ javọ tụni ikeyi, ẹ maa fụ shirẹ, di ikeyi za wa ri, dẹ razi tụ ẹtụtụ ọnyọnyi. ⁸ Ọina ọsa ana javọ tuni ẹtẹ ozoza, ẹ maa fu, dẹẹ tụ ẹtụtụ, dẹẹ yara, di ẹnyi tu ofurẹwụ, di ẹnyi tụ ẹbẹrẹta, di ẹnyi tụ ẹchẹshi. ⁹ Dọ va kaa yu wa ka, "Ẹzẹna ra nyi ụtọ, ọ siọ wụrẹyi!" ¹⁰ Ụmẹ ọnọ si vọ Ijesu renya, di ẹnẹna gurẹ ẹ, bẹri eziafu aani ẹwurẹva fọ ọ ipẹpẹ inọpati ushioche aani. ¹¹ Dọ kaa yu wa ka, "Ẹwụ nini vọni Osbomoshi si isoshishozeyi ana tẹ ini ijọva ineeku ọiza aani zụ. Ama ẹnẹna yini ẹshẹẹshẹ vana si isa bo zụ ini ụshiọche. ¹² Ẹ vaa sha iri sha, doo vene ki ee reẹtẹ, ama e zi re isọnsọnyi; dẹ shụtọ sha do vene kẹẹ wurẹyi, ama ọzaa ngwụ wa ụtọ; ọọzi va vọ, ẹ yaan rinẹ varama, di Oshomoshi vaya aanini. ¹³ Dọ va fọ wa ka, "Ụshioche ami ọzi ngwu wụ nin ụtọ? Ụshioche ami ọsa ana vọ bo mẹmẹ vaa ngwụ wụ ụtọ nin aavọ? ¹⁴ Ọnaarẹ ene chirẹ ọina, ọnọ vi ezene chire irẹyi Oshomoshi. ¹⁵ Ọina ana javọ tụni ụtoze vi ẹnẹna wụ irẹyi ọnọ, ama di Eshu vẹ, dọ tụ ọ fụrẹ wa ọtụtụrụma. ¹⁶ Ọina ana javọ tụni ẹtẹ irẹta ẹnẹ vi ẹnẹna, wụ irẹyi ọnọ, ụmụmọ dẹ si inẹ oshine dọwụ. ¹⁷ Ẹ zi nyi ẹpa shiẹtẹ ini ọtụtụrụma aanini, fụvavọ dẹ nyi ọdọwụ ini eẹfi keere. Umotu di ụmẹ ụyọọri vẹ, navẹki daa mụyaarụ wa fụvọ irẹyi ọnọ, ụmụmọ dẹẹ si sẹdụ. ¹⁸ Ẹsa ana vọ ẹnẹ vi ene chire tụni ikeyi. Ẹ wụ irẹyi ọnọ ¹⁹ ama ọkiku ayi tura isa ẹshẹ, irivene ogu ọnri osisi isa eshẹ ọsa anavọ, mẹ ngwụ wa inẹ, dẹ za irẹyi ọnọ ri, ọi va zu tu ẹtutu ọnyọnyi. ²⁰ Ẹnene chire tuni ẹtẹ irarẹ ozoza ẹnẹ vi ana wụrẹyi ọnọ dẹ siọ mukọrọ, dẹ tu ẹtụtụ ụpẹ ofurẹwu, ụpẹ ẹbẹrẹva ọnri ụpẹ ẹchẹshi ọi ẹtụtụ ene chire. ²¹ Di Ijesu kaa yụ wa ka, "A wa zẹẹ si irakọpa ngwụreshi, daa va uji ku o, navẹki daa si ọ tụni inafụafụ ode? Aa si ọ ngwụreshi, dee zu o gẹ ọchi ọpa. ²² Ọzi nyi isẹna sitẹ, dọọ vi ka azẹ zaa yẹ, ọnri ki, ọzi nyi isẹnẹ yi ini angwụmi, dọọ vi ka ọ zaa siẹngwụ zụ ini eyigede. ²³ Aaviki ọ nyi ẹzẹna nyi utọ ana si wụrẹyi, navọ ọ siọ wụ irẹyi!" ²⁴ Dọ kaa yụ wa ka, "Sụtọpeẹtẹ tuni irẹyi ọnụ waa wụ nini, fụvọki ọnya ọnuụ ra si mọ isa yi ọza, ọna va sii mọ yụ wụ, daa vana si gụọ yụ wụ. ²⁵ Fuvọki ẹzẹna nyi ọna va sii gụ ọ yi, ẹzẹna razi nyi, oi che ọnọ nyi, vana vaa dọ fini ụvọ aani. ²⁶ Dọ zẹ kaa ka, "Ijọva Oshomoshi o vene ọnọrụ one chire ọina aani tụni ẹtẹ. ²⁷ Ọọ sụ inaafu, dọọ sha ini eyivovo, di ọina ọnọ chi, dọọ fụ, ama ọ zi yẹ ọ mẹmẹ ziọ. ²⁸ Ẹtẹ ọnọ ụvọta ọnọ tụ ẹtụtụ yi ẹngwụ aani; ọ savọ mẹ ki ọ chi, dọ vaa fụ, doo nyi azaga, dọ va kụ ezi vovo. ²⁹ Apapa ọnọ ra si vi, ụmụmọ dọọ si ifọ aani dọọ na faa vẹ, fuvọ ki isararẹ ọ si vi. ³⁰ Ụpọsa dọ zẹ ka, "Yere isa ana va zụụ si ijọva Oshomoshi mọrọ kẹ, navẹki yere ụshioche ana va zụ sii shaafụ sha kẹ? ³¹ O vene ọina imọsitadi ene weyi fu ini ọina bo ana yini ẹshẹ. ³² Tuavọtuavọ, eme chire e, dọ fu, dọ si bani fu ọchi ẹtutu ọsa ana yi ini ụbazi, dọ shavọ ẹbani ẹbani, ọni unomi nini da irẹngwẹ tụni irifufu aani." ³³ Ụshioche ẹrụrụ, venebiri ọnọni, ọni Ijesu si karẹyi Oshomoshi yụ wa netu ẹgẹ ọnọ va zụụ ngwụ wa ụtọọ tu. ³⁴ Ọzi nyi irẹyi ọnọ ka yụ wa dọ razi vi ini ushioche. Ama ụmẹ ọnọ ra si vi Ijesu ọnri eziafụ aani renya, dọọ sharẹyi bo afụ sha yụ wa. ³⁵ Ini ọkushi ishọ, oruva me si tu, dọ kaa yụ wa ka, "Navọ di ya nọ aka ọfụụva nini. ³⁶ Ijesu ọ ngwụ ini ẹpa da ini ụmavọ, inaani dẹ navọ azọkọni ẹnẹ, dẹ si ọ vatụrẹngwu na. Azẹrụrụ ẹnẹ vatụra a ini ẹpa ayianini. ³⁷ Ụmavọ gẹdẹgẹdẹ, di ashi ọshimi nyima aa kụ, dọ kụ enyi shi ini ẹpa ọnọ, dọ gamo shi yi enyi. ³⁸ Ama Ijesu ọn vana sụtụ tuni otimtim inaama ẹpa, dọọ sụara. Dẹ sha a kwẹẹtẹ, dẹ ka, "Ọzụọzisa, ọzi jụ wụ areyi ki yee vee su?" ³⁹ Ọ kwẹẹtẹ, dọ tụ ashi ọshimi ọnọ ofuvọ, dọ kaa yi irefu ka, "Ẹgwọrọ! zụvọ dinẹ!" Di ashi ọnọ zụvọ dinẹ, di ẹta za keri." ⁴⁰ Dọ fọ wa ka, "Ọmẹzi du wee shiangwa nin kẹ? Dọọviki wa zi nyi nyi ọdọwụ nini? ⁴¹ Di angwashi ọbani si ngwụ wa ẹngwu, dẹ kụa fọ ẹngwu ka, "Yere ẹngwụ ọza ọni ọzọnọni vi kẹ, di ashi ọnri irefu aa wụrẹyi tụ ọ irenu?"