¹ Ụpọsa di Ijesu zẹ ngwụni Isinagọgụ, dọ va nyi ọnọrụ ene suvọ ana yi izọ. ² Di azẹnyi ana yi izọ ana sieyi pe Ijesu, dee zi aaviki ọ vaa fụ ọza ikụ sha ini ọkụshi Isabati, doti e zụ re irẹyi ẹnẹ va sii za. ³ Di Ijesu kaa yi osuvọ ọnọ ka, "Kwẹẹtẹ wa dinẹ ini akaakana aza bo. ⁴ Dọ fọ aza bo ka, "Ọ wa vọrọ ka a mẹ ọiza ini ọkụshi Isabati navẹki a mẹ ọshimi, a dọ ọza tụ navẹki a wụ ọza?" Ama, de chiiji. ⁵ Di Ijesu vareyi re wa varakara, fụvọ ọtụtụrụma ọkata aanini, di inẹ aani si du tu wa, dọ kaa yi osuvọ ọnọ ka, "Tana ụva awụ." Di ọnọrụ ọnọ tana ụvọ, di ụvọ aani vanudi. ⁶ Di Ifarisi ẹnẹ jinẹ, ụmụmọ dẹ vẹrẹ ee bere ezirama Ihẹrọdụ nin shiọma ẹ mẹmẹ vaa wụ Ijesu. ⁷ Umotu, di Ijesu ọnri eziafụ aani fiizọ nọ ini irefu, di azọkọni ụnọmpa vatụra a fụri Iganini ọnri Ijudiya, ⁸ shi ẹnẹna fụri Ijerusanẹmụ, Idumiya ọnri akajinẹ enyi Ijọdani, ọvarakara Itaya ọnri Isidoni. Ẹ mẹ wụ inọpati isa ọiza ọnọọ mẹ yi aza, di azọkọni ụnọmpa ve tu o. ⁹ Di Ijesu kaa yi eziafụ aani ka ẹ si ẹpa oweyi ọnya tẹtẹ yi ọni, fụvọ asi azọkọni ẹnẹ doti asi ẹ va na piri ọni. ¹⁰ Ọnikụ ẹrụrụ ẹrụrụ venee si ki ẹnẹ sụvọ kani ọ, fụvọki ọ fụ azẹrụrụ ikụ sha. ¹¹ Ụmẹ tụrụmẹ ọni ifẹ azeeshi nini zee re, one sii kuẹtẹ tuni ọvidi aani, dee nowu tuẹshẹ, dẹ ka, "Ozi Oshomoshi ọnụụ vi." ¹² Dọọ kawọnọ ka, asẹ si ọn zụ. ¹³ Ọ shirẹ irẹsụfa na, dọ shi ẹnene zeeyi, dẹ shirẹ ne tu o. ¹⁴ Ọ ni ẹnẹwụrẹva (dọ shụwa ọnitụ) ana vaa yaa pee, dọọ tụ wa na karenube ọiza, ¹⁵ ọnri ka doti ẹ nyi ụmọ ọnẹ va sii dụ ifẹ azeeshi jinẹ fini ẹngwụ aza. ¹⁶ Ẹnẹwụrẹva ọnọ ni, ẹnẹ vi: Isaimọni ọnọ shi Ipita; ¹⁷ Ijẹmsi ozi Izebede, ọnri Ijọọnụ ọnyari Ijẹmsi, ọnọ shi Iboanẹjisi (ezi apavana Oshomoshi), ¹⁸ ọnri Andụrụ, Ifiripi, Ibatoromiyu, Imatiyu, Itọmọsi, Ijẹmsi ozi Afeyọsi, Itadiọsi, Isaimoni ọna nyi ọyaya, ¹⁹ ọnri Ijudasi ozi Isikariyọti ana vaa bafụ aani. ²⁰ Umotu dọ neeshi, di azọkọni vaku o na ngwụrẹshi, netu ka ezi roze risa. ²¹ Anreshi aani mẹ wụ, de si o na ki ẹ naa na zaa vẹreshi, fụvọki ẹ kụa kaa ka, "Irẹsụ aani ọzi kụ gụ." ²² Ọyofi nin ana fụri Ijerusanẹmụ mẹ vẹ, dẹ ka, "Ifẹ azeeshi Ibẹzẹbụ ọnaa zama a," ọnri ka, "Zirẹngwụ oshirẹsụ ifẹ azeeshi ọni Ijesu a sii dụ ifẹ azeeshi jinẹ." ²³ Ijesu ọ shi wa pe ẹngwụ, dọ kaa yụ wa ini ụshioche ka, "Eshu mẹmẹ va zụ dụ eshu jinẹ kẹ? ²⁴ Ijọva ana razi si irenu vi ọnya ọi zụa nyi ụfụ shiẹtẹ. ²⁵ Ireshi ana razi si irenu vi ọnya ọi zua nyi ụfụ shiẹtẹ. ²⁶ Aaviki Eshu ọ kwẹẹtẹ tu ẹngwụ aani, dọ si ga, ọi kụ nyi ụfụ shiẹtẹ, ayi aani ta da aavọ. ²⁷ Ọzi nyi ẹzẹna va zụ ngwụ ireshi ọnụkata ne yi o uyi doo re mẹ, ọchishi ki ọ savọ sụọ ọnụkata ọnọ orupa, ụmavọ ọnọ va zụ yaa kụ ọ ẹnya. ²⁸ Ini irẹiza, aichama ezianẹshẹ bo vana vaa sii vayaanini, shi isaanyisi bo ẹnẹ ka fineenu. ²⁹ Ama, ẹzẹna ra ka isaanyisi shi Ifẹ Ọnini, Oshomoshi ọ zaa siọ vayaani, ama dọọ rivi aichama poro pooro." ³⁰ Ijesu ọ maan karẹyi ọnọni fụvọki ẹ kaa ka, "Ifẹ azeeshi ọnọ nyi." ³¹ Umotu, ọnyi aani ọnri ẹnyara aani anẹrụ ẹ vẹ dẹ dinẹ tu inẹshẹshẹ. Dẹ tu shi o, ki e nee si o inọfirọfira. ³² Azọkọni vana yatụ varakara a, dẹ kaa yọ ka, Ọnyi awụ ọnri ẹnyara awụ anẹrụ yi inẹshẹshẹ ee si wụ." ³³ Do tuoshi ka, "Ẹnẹ vi ọnyi ami ọnri ẹnyara ami anẹrụ kẹ? ³⁴ Ọọ zamẹtẹ varakara, do re ẹnẹna yatụ dokoro varakara a, dọ ka, "Re, azẹnẹni ẹnẹ vi ọnyi ami ọnri ẹnyara ami." ³⁵ Ọzatụrọza ana ra mẹ osisi Oshomoshi ọnọ vi ọnyarami ọnọrụ, ọnyara ami ọnyẹnẹ ọnri ọnyi ami."