¹ Ọ mẹ varama vẹ Ikapanọmụ inaama ọkụshi che, da wụ ka ọ yi ineeshi. ² Di azẹrụrụ peregụ tụzọ na ngwụni ọpanfuoze netu ka aza e zi re irasha si ụfụ shi, di Ijesu karenube ọiza yụ wa. ³ Inaani di anẹrụ ẹẹna chema ọza ene suafụ suavọ ve tu o. ⁴ Ẹmẹ raizụ chema na ngwu izẹni ọ ya fụvọ azọkọni ana yi izọ, dẹ fụ utu izẹni Ijesu ya, dẹ si odoro chi o shẹtẹ. ⁵ Ijesu me re ọdọwụ aanini, dọ kaa yi osuafụ suvọ ọnọ ka, "Ẹwụ ozi, aa si aichama awụ vaya wụ. ⁶ Ọyofi ẹnyi ana yatụ tụzọ dee roo ini ọtụtụrụma aanini ka, ⁷ "Ọzọnọni mẹ va sii ka ẹngwụ irẹyi ọnọni kẹ? Isaanyisi ọnọ ka aani no. Yere ẹzẹna va zụụ si aichama ọza vaya ọza, ọọzivi Oshomoshi renya?" ⁸ Ụmụmọ di Ijesu yẹ ini ifẹ isenee ro. Dọ kaa yụ wa ka, "Ọmẹzi du me nee ro ẹngwụ isẹnẹni ini ọtụtụrụma awụ nin kẹ? ⁹ Yere ana rọ ẹngwụ fu ki ma ka yi osuafụ suavọ ọnọni kẹ, 'Aa si aichama vaya awụ' navẹki 'Kwẹẹtẹ, kara upoto awụ, dụ wa zụsẹ'? ¹⁰ Ama, doti wa zụ yẹ nini ki Ozi Ọza ọ nyi ụmọ ini ẹshẹ ki ọ si aichama ọza vaya ọza, dọ kaa yi osuafụ suavọ ọnọ ka, ¹¹ "Maa ka yụwụ, kwẹẹtẹ, kara upoto awụ, dụ waa neeshi awụ." ¹² Ụmụmọ dọ kwẹẹtẹ, dọ sẹ kara upoto aani, dọ zụsẹ jinẹ tụra fineeshi ọnọ ineyi aza bo, dọvi isene shuweeyi, dẹ va si ụga yi Oshomoshi, dẹ ka, "Yezi meen rire ẹngwụ isọnọni yẹẹyẹ." ¹³ Ijesu ọ zẹ jinẹ tụra nọ ini ọgụrẹ adagu enyi ana yi izọ, di azọkọni ẹnẹ bo vaku o, dọ zụwa isa. ¹⁴ Ọ maa paraafu do re Inẹvi, ozi Afiọsi, ki ọ yatụ tụni ajẹngwụ ọdimaana nini, dọ kaa yọ ka, "Vatụra mi," Ọ kwẹẹtẹ dọ vatụra a. ¹⁵ Ijesu maa risari ineeshi Inẹvi, di ọdimaana shi anaichama nin bẹri eziafụ aani e pee risa izọ, fụvọki ẹ rụrụ, dẹ vatụra a. ¹⁶ Ụmọni ọyofi nin ẹnẹna vi Ifarisi re ki o pe anaichama nini ọnri ọdimaana nini risa, dẹ fọ eziafụ aani ka, "Ọmẹzi di Ijesu e pe anaichama nini ọnri ọdimaana nini risa kẹ?" ¹⁷ Ẹfiẹni Ijesu wụ irẹyi ọnẹẹ ka, dọ va kaa yụ wa ka, "Ọza ọni ẹngwụ ani ni o zee si ọmọzikụ; ọchishi ọzẹnẹ ẹngwụ aani razi ni. Ma zi fụvọ aza ọiza vẹ, ama fụvọ anaichama nini." ¹⁸ Ọmẹyani, eziafụ Ijọọnụ Ọsami ọnri Ifarisi nin aa bawẹ inụvọ, di azẹnyi ve tu Ijesu, dẹ ka, "Ọmẹzi di eziafụ Ijọọnụ ẹnri Ifarisi nini aa bawẹ, ama di eziafụ ayi ẹwụọni razi bawẹ kẹ? ¹⁹ Di Ijesu kaa yụ wa ka, "Ẹzẹnaa nyiọnẹ, wa vaa yi izọ di aza aani yi ini ụngwẹ? Ọmẹviki ẹzẹna nyiọnẹ yi yizọ, ẹi zụa da ẹngwụ aanini ụngwẹ. ²⁰ Ama, ọkụshi vaa vẹ ọna vaa si ọnọrụ ọnaa nyiọnẹ fini akaakana aanini; ẹfiavọ ọnẹ vaa bawẹ. ²¹ Ọzi nyi ọza anaa gẹ ita ọwọwa ku ita ọkụkụ. Ọọvọvi, ọzi nyi ki ita ọwọọwa ọnọ ọzaa naa kụra fini ita ọkụkụ ọnọ, doo si duvi funa ọ mẹ bidi ya. ²² Ọzi nyi ẹzẹnaa va eche ọwọwa shi ovi ọkụkụ; aaviki aa va eche ọwọwa tụni ovi ọkụkụ, eche ọwọwa ọnọ vana vaa chaka ovi ọnọ, shi ọvi shi eche dee mishi. Akikọnọ, va eche ọwọwa shi ini ovi ọwọwa." ²³ Ini ọkụshi Isabati, di Ijesu ọnri eziafụ aani aa zi oze iraarẹ apaapa paraafu, di eziafụ aani va fa apaapa. ²⁴ Di Ifarisi fọ ọ ka, "Re, ọmẹzi di eziafụ awụ a mẹ isẹnẹ razi sẹrẹ ini ọkụshi Isabati kẹ?" ²⁵ Dọ kaa yụ wa ka, "We zi re ka nini, isẹni Idevidi mẹ ụngwẹ maa kụ ọ, ọnri azẹna ya pee --- ²⁶ ọ mẹmẹ ngwụ ireshi Oshomoshi, ẹfi ọni Abiata vi oshirẹsụ arụfa keekere, dọ na ri isari ana yini ọpẹtẹ, ọnọ razi vọrọ ki ọ ri, ọọsifini arụfa nin renya, dọ vaa zẹ yinaani si yi aza ana ya pe e?" ²⁷ Di Ijesu ka, "Isabati vana mẹ yi ọza, aivi ọza ana mẹ yi isabati. ²⁸ Fụvavọ Ozi Ọza ọnọ vi Ananyiyi, dọ viọ tụra ọkụshi Isabati nyẹmbẹ.