¹ Ọnọni ọnọ vi ivẹrẹ irenube ọiza Ijesu Ikristi Ozi Oshiomoshi. ² Vene a mẹmẹ chẹrẹẹ ini iwe Aizaya ọkisẹ Oshomoshi, ka, "Re, maa tụ ọnitụ ami dọvidi ami ene vee teni oze tẹtẹ yụ wu. ³ Ọngwẹ ana shi aza ini ụnọmi ka, 'Teni oze Ananyiyi tẹtẹ; navọ di oze aani ọ vọrọ.'" ⁴ Ijọọnụ ọ vẹ, dọọ sami ini ụnọmi, dọ zaa karenube isami ọnri oririnẹ varama ọnri ọsisi aichama ayi vayayi. ⁵ Di ani irẹkụra Ijudiya bo ọnri ani Ijerusanẹmụ bo jinẹ ve tu o. Ọ sami yụ wa ini okufa Ijọdani dẹ dụvọ aichama aanini. ⁶ Auru ana si upa irankụmi gẹ ọni Ijọọnụ ụ chire, dọ va si ibaanụ upa-uye sụ ọtẹ, dọọ ri akụvariva ọnri ẹfụ inụnọmi. ⁷ Ọ karenube ka, "Ọọ nyi ọza anaa vẹ, ana kata fu mi, ma zi fụ ana vaa ngwara orupa ivata aani. ⁸ Enyi ọnim si sami yụ wụ nini, ama ọn vana vaa si Ifẹ Ọnini sami yụ wụ nini. ⁹ Ini ụmavọ di Ijesu fụrẹ Inazarẹti ini Iganini nọ izọni Ijọọnụ yaa sami yi aza, di Ijọọnụ sami yọ ini Okufa Ijọdani. ¹⁰ Ijesu mẹ jinẹ fini enyi ọnọ, do re ka ẹbẹba ọ na sha, di Ifẹ Ọnini shira chi ve ku o fụrẹ ẹbẹba venebiri obenekuku. ¹¹ Di ọngwẹ ọnya fụrẹ ẹbẹẹba ka, " Ẹwụ ọnọ vi Ozi ọnim ngwayi ani. Inẹ ami o shine tu wu kokoro. ¹² Umotu di Ifẹ Ọnin turaa na ngwun ini ụnọmi. ¹³ Dọ yi ini ụnọmi mẹ ẹkụshi ẹbẹrẹva, izọ di eshu mọọre. Ọnri uye-inavi ẹnẹ gẹ yizọ, di angẹni nini yizọ, dẹẹ fẹkẹ ẹ. ¹⁴ Ẹfi ana va za Ijọọnụ tụni ijaaru da, di Ijesu vẹ Iganini, doo showu irenube ọiza Oshomoshi, ¹⁵ dọ ka, "Ẹfi o tu, Ijọva Oshomoshi ọ si kavape. Rinẹ varama dụ wa nyi ọdọwụ ini irenube ọiza Oshomoshi nini. ¹⁶ Ijesu maa zụsẹ iniụtọ Irefu Iganini, do re Isimọni ọnri Andụrụ ọnyara Isimoni ẹ maa si asha za isenyi ini irefu ọnọ, fụvọki ozube-isenyi ẹnẹ vi. ¹⁷ Di Ijesu kaa yụ wa ka, "Waa vẹ, vatụra mi nini, mvaa vara wụ nini ozube aza. " ¹⁸ Ụmụmọ dẹ navọ asha aanini tẹtẹ, dẹ vatụra a. ¹⁹ Ijesu mẹ zẹ zụsẹ nọvidi che, do re Ijẹmisi ọnri Ijọọnụ ana vi ezi Izebede ini ẹpa aanini dee teni asha. ²⁰ Ọ shụ wa, dẹ navọ ada aanini Izebede ọnri ezida aani tuni ẹpa, dẹ vatụra Ijesu. ²¹ Umotu dẹ ngwụ irẹkụra Ikapanọmụ ini ọkụshi Isabati. Di Ijesu ngwụni Isinagọgụ, dọ zụ wa isa. ²² Do shuweyi ọ mẹmẹ aa zụwaisa vene ẹzẹna nyi ụmọ, aivi vene ọyofi nini. ²³ Ini Isinagọgụ ọnọ, di ọnọrụ ọnyi ana nyi ifẹ azeeshi ee nowu tụẹshẹ, ²⁴ dọ ka, "Ijesu ani Inazarẹti, sẹnẹ kụ ẹyi ri ẹwụ gẹ kẹ, ụ waa vaa wụ yi vaasha? Maa yẹ ẹzẹnụụ vi, ẹwụ ọnọ vi ọza ọnini Oshomoshi. ²⁵ Di Ijesu nyẹngwụrẹi shi ifẹ azeeshi ọnọ ka, "Navọkụ! jinẹ fini ẹngwụ aani. ²⁶ Di ifẹ ọshimi ọnọ nowu tụẹshẹ, do jookuẹtẹ, dọ jinẹ fini ẹngwụ aani. ²⁷ Aza bo ana yizọ vono sheyi, dẹ kụaa fọ ẹngwụ ka, Sẹnẹ vọnọni kẹ? Isọọzụ ọwọọwa wa yi? Ọ si ụmọ karẹyi shi ifẹ azeeshi nini, dẹ wụrẹya aani. ²⁸ Di irenube inọpati Ijesu si garashi ini ọkakooro Iganini. ²⁹ Ẹfi ẹnẹ jinẹ fiini Isinagọgụ da, dẹ nọ ineeshi Isaimọni ọnri Andụrụ, di Ijẹmisi ọnri Ijọọnụ kụafụza wa. ³⁰ Ini ẹfi ọnọ, ọnyi ose Isaimọni vọni iva za sụtẹtẹ, dẹ va kaa yi Ijesu inọpati aani. ³¹ Inaani, di Ijesu vẹ, dọ za ụvọ kwẹẹtẹ; iva ana yarẹ ẹ dọ ta fụrẹngwụ, dọ vẹrẹ doo si wa ọzọga. ³² Ini oruva ishọ, ọyi mẹ ngwẹtẹ da, dẹ kụ ọnikụ nini ọnri ẹnẹna nyi ifẹ azeeshi ve tu o. ³³ Di irẹkụra bo peregụ na ngwụ ọpanfuoze. ³⁴ Ọ fụ aza ikụ renyi renyi sha, dọ dụ ifẹ azeeshi fini ẹngwụ aza ẹrụrụ, ama Ọ zi navọ ifẹ azeeshi ẹnẹ ki ẹ karẹyi fụvọki ẹ yẹ ọzọnọ vi. ³⁵ Ọ shakwẹtẹ ini ajuveyini, ẹtẹ mẹ razi fifeyi dọ ni izẹnẹ jomi, na tuozurenu. ³⁶ Di Isimoni ọnri aza ọnọn rụwa gẹ yi izọ, ve kue si o. ³⁷ E me ve re, dẹ kaa yọ ka, "Azabo venee si wu o." ³⁸ Dọ ka, "Waa vẹ di ya nọ irasha ọsa nini, ini irẹkụra ana varakara izọni, di ma zụ karenube ọiza yụ wa. Fụvavọ ọnim si vẹ izọnani." ³⁹ Ọ ziọ varakara Iganini bo, dọọ karenube ọiza, ini Isinagọgụ, dọ dụ ifẹ azeeshi nin bo jinẹ. ⁴⁰ Ọnikụ-ọbani ọnyi o ve tu o, dọ dipẹ yọ, do kuẹtẹ dọ kaa yọ ka, "Aaviki oozeweyi, ụ va zụụ mẹmi ẹngwụụ ni." ⁴¹ Di Ijesu ini ayụva tanụvọ kaniọ, dọ ka, "Oo zemeyi, vara ọnini." ⁴² Ụmụmọ di ikụ-ọbani ta fini ẹngwụ aani, dọ vara ọnini. ⁴³ Di Ijesu kọọnọ, dọ ki ọọ na. ⁴⁴ Dọ kaa yọ ka, "Navọ du we re kụ wazi ka yi ọzọnyọnyi, ama na si ẹngwụ awụ zụ arufa, dụ wa mẹ isẹni Imosisi si ụmọ ka, ana vaa siọzụ ki ẹngwụ awụ ọ si ni. ⁴⁵ Ama, ọ mẹ jinẹ tụra dọ kaa yi aza bo, doo showu irẹyi ọnọ varakara netu ki Ijesu ọi kụ zụ shẹngwụsha zizi, fụvavọ dọ kụa yi izẹnẹ jomi, di aza a fụri irasha bo vee tu o.