¹ Dẹ ziọ va ngwụ akajinẹ irefu na ngwụ ọkakooro Igẹrasini. ² Ijesu maa jinẹ fini ẹpa vẹ, ụmụmọ di ọnọrụ ọnyi ana nyi ifẹ azeeshi jine fini irikuta ve tu o. ³ Ini irikuta ọni ọnọru ọnọ ra. Ọzi nyi ọza ana kụ zụ za a chire; azẹzi vana zụ si ẹba enyisuẹ za a chire. ⁴ Ụpẹrika ana si ishẹkishẹkẹ ọnri ẹba enyisuẹ zachire, ama dọ ji wa vasha. Ọzi nyi ọza ana nyi ụkata ana va zụ za a chire. ⁵ Shi irafụ shi ọọdụ ọnọ sii yi ini irikuta ọnri irẹsụfa, dọọ si ọngwẹ tuẹba nowu, dọọ si irẹta ana rẹ, dọọ si ọ tọ ẹngwụ aani anava. ⁶ O me re Ijesu fụri irasha ọgọdọ, do zuechi ne tu o, do nyimarẹsụnẹtẹ yi Ijesu. ⁷ Dọ va si ọngwẹ tuẹba, do nowu ka, "Sẹnẹ kụ ẹmi rẹwụ gẹ kẹ, ẹwụ Ijesu, Ozi Oshomoshi ana nyi ụbani fu bo? Maa si Oshomoshi ụvọta dipẹ yụ wụ, asụ mụyari mi." ⁸ Fụvọki ọ bidi vọọ kii ka, ka, "Tụjinẹ fini ẹngwụ ọnọrụ ọnọni, ẹwụ ifẹ azeeshi." ⁹ Di Ijesu va fọ ọ ka, "Sẹnẹ vi irẹsha awụ?" Do tuoshi ka, "Iresha ami ọnọ vi Irijọni, fụvọki yaa rụrụ." ¹⁰ Ọ si ụpẹrika dipẹ yọ ka asọ dụ ẹni fini ọkakooro ọnọ. ¹¹ Ini ẹfi ọnọ, ụra ẹrụrụ nin yini ọkakooro ọnọ ana tọọẹtẹri ini irẹsụfa, ¹² dẹ dipẹ yi Ijesu ka, "Dụ yi na ngwụ ini ẹngwụ ụra ẹnẹni, navọ di ya ngwụ ini ẹngwụ aanini." ¹³ Dọ navọ wa; di ifẹ azeeshi ẹnẹ tụjineẹ fini ẹngwụ ọnọrụ ọnọ, dẹ ngwụ ini ẹngwụ ụra ẹnẹ, di enbo bụdụ chi irẹsụfa ọgọọgọrọ ọnọ na ngwụ ini irefu. Ọpati ụra akaawụ ani irefu ọnọ mụnẹ ¹⁴ Di ẹnẹnaa kụ ụra ri si zue, dẹ na kaa zizi ini irẹkura ọnọ ọnri ọkakooro izọ bo isene re, di azẹrụrụ jinẹ, dẹ na si iri re yi ẹngwu aanini. ¹⁵ Inaani de ve tu Ijesu, de re ọnọrụ ọnọ, ana nyi ifẹ azeeshi Irijọni oshẹtẹ, ki ọ yatu, do chire auru, di irẹyi aani kwa vaajioze; di angwa si wa shi. ¹⁶ Enene re isa oshishozeyi ana mẹ tu ọnọrụ ana nyi ifẹ azeeshi ọnọ, dẹ kaa yi ẹnẹna vẹ, isa bo mẹmẹ ziọ, dẹ zẹ ki karẹyi inọpati ụra ẹnẹ. ¹⁷ Dẹ vẹrẹ, dẹẹ dipẹ yọ ki ọ fini ọkakooro awụọnini. ¹⁸ Ẹfi ọnọ vaa ngwụni ẹpa, di ọnọrụ ana bidi nyi ifẹ azeeshi ọnọ va dipẹ yọ ka ọ navọ di ọnọ ya pee. ¹⁹ Ama Ijesu ọzi zẹ yọ, akikọnọ dọ kaa yọ ka, "Waa neeshi awụ, du we ne tu aza wụ, dụ wa kaa yụ wa isẹni Ananyiyi mẹ yụ wụ, ọnri ayụva ọnọ nyi yụ wụ. ²⁰ Dọ fizọ, dọ naa showu zizi isa ẹbani ọni Ijesu mẹ yọ, ini irẹkụra anaa shi Idẹkaponisi, dọvi ireyi ene shi aza bo eyi. ²¹ Ẹfi ọni Ijesu zẹ varama na akajinẹ, ini ẹpa, di azọkọni varakara a, ọ mẹ yi ini ụtọ irefu. ²² Di ọnya ini ọdọvidi Isinagọọgụ, anaa shi Ijariọsi vẹ, o me re dọ vakuẹtẹ tuọvidi. ²³ Dọ dipe yọọ ụmọnyi ụpọsa ka, "Ozi ami ọnyẹnẹ ana vi ozioweyi shishishi e vee su o. Miyarẹ wụ, daka va si ụvọ tụra dọti ọzụ dashi, dọ zụ mẹshẹ." ²⁴ Inaani dọ vatụra a, di azọkọni nini vaku o. ²⁵ Ọ nyi ọnyẹnẹ ọnyi ani anya vaa fini ẹngwụ aani fụri irayi ẹwụrẹva. ²⁶ Ọ rụya kokoro inụvọ osiọzikụ nini, netu ka ọ na ogu aani bo tụọ; akikọnọ ọnọ sẹrẹ ki ọọ dashi, di ikụ aani e duvi tụọ. ²⁷ Ọ mẹ wụ inọpati ụkọrụvọ Ijesu, dọ zi irama aani, ini akaakana azọkọni, dọ na si ụvọ kani auru aani. ²⁸ Fụvọki o roo ka, "Aaviki maa zụ si ụvọ kani auru aani, ẹngwụ ami vaa ni." ²⁹ Ọ mẹ si ụvọ kani ọ, irẹiza, di anya anaa va si zadinẹ, dọ yẹ ini ẹchẹngwụ aani ki aa fụ ọni ikụ sha da. ³⁰ Ụmụmọ di Ijesu yẹ ki ụkata ọ jinẹ fini ẹngwụ aawọni. Dọ vareyi ka aza ọkọni ana vaku o, do fisue ka, "Ẹnẹ si ụvọ kani mi auru?" ³¹ Di eziafụ aani fọọ ka, "Wee re azọkọni mẹ fụ ku wu, ụ za fi fọ ka, "Ẹnẹ si ụvọ kani mi?" ³² Ama di Ijesu zamẹtẹ varakara doti o zu re ẹzẹna vọọ mẹ. ³³ Fụvọki ọnyẹnẹ ọnọ ọ yẹ isẹnẹ me ini ẹngwụ aawọni, do vee shangwa, di ẹngwụ aani aa bani. Ọ vẹ, do ve kuẹtẹ tụ ọ ọvidi, dọ ka irẹiza bo yọ. ³⁴ Di Ijesu kaa yọ ka, "Ẹwụ ozi ami, ọdọwụ awụ ọ mẹ wụ ẹngwụ ni da. Waa na ini ẹngwọrọ, ki a fụ wụ ikụ sha da." ³⁵ Ọ maa ki karẹyi inụvọ, di azẹnyi ana fidi ọdọvidi Isinagọgụ vẹ, dẹ ka, "Ozi awụ ọnyẹnẹ o fu su, ọmẹzi dụ waa di da, Ọzuọzisa, ifẹ shirẹ kẹ?" ³⁶ Ama Ijesu mẹ sụtọnya irẹyi ẹnẹẹ ka, dọ kaa yi ọdọvidi Isinagogi ka, "Asu shiangwa. Nyi ọdọwụ kẹnẹ." ³⁷ Ọ zi navọ ki ọzọnyọnyi ọ vatụra ọni, ọchishi Ipita, Ijẹmsi ọnri Ijọọnu ana vi ọnyara Ijẹmsi. ³⁸ Ẹ mẹ ngwụ ireshi ọdọvidi Isinagọgụ, de re aza maa sụọkụ, dee sune, dẹẹ jiorere. ³⁹ Ụmọni Ijesu ngwụ ireshi ọnọ, dọ kaa yụ wa ka, "Ọmẹzi di ayi awụ nin meen du, dụ waa jiorere nin kẹ? Ozi ọnọ ozi su; ara ọnọọ sụ. ⁴⁰ Dee nyi o unyi. Ama, dọ navọ wa tụ inẹshẹshẹ, ọchishi ada ozi ọnọ ọnri ọnyi ozi ọnọ ọnri ẹnẹna yape e renya ẹnẹ vatụra a ngwụ ireshi ne tu ozi ọnọ izọnọ ya. ⁴¹ Ọ sụvọgẹ ozi ọnọ, dọ kaa yọ ka, "Talitha koum," ọni ọshafụ sha aani vi, "Ẹwụ ozi ọnyẹnẹ, kwẹẹtẹ dinẹ." ⁴² Ụmụmọ di ozi ọnọ kwẹẹtẹ dọọ zụsẹ (ozi irayi ẹwụrẹva ọnọvi). Dọ vi isa ọnọ vi ki o shuweeyi ẹtẹẹtẹrẹ. ⁴³ Dọ kawọnọ ki asẹ kaa yi ọzọnyọnyi. Dọ kaa yụ wa ka, ẹ si isari yọ ri.