¹ Inaama ẹnẹni, Ijesu ọọ ni irasha ọsọsa ini ẹtẹ Iganini, O zi si ka ọnọ ni Ijụdiya fụvọka aani Ijuu nini vene si oze ẹnẹ va si wụọ. ² Ụmavọ, ụpe ẹnẹẹ shi, Ụpe Ajẹngwụ ọ si gụre ẹtẹ. ³ Di ẹnyara aani kaa yọ ka, "Fi izọni, dụ wa ni Ijụdiya, doti eziafụ awụ de zụ ne re ụkọrọ ọnụ waa mẹ. ⁴ Ọ zi nyi ọza ana mẹ isa inangwụmi, do si ka aza ẹ yẹ oni. Waa mẹ isa ẹnẹni, sẹngwụ awụ zụ anẹshẹ. ⁵ Fụvọka, ẹnyara aani nyẹmbẹ ẹ zi dọ ọ wụ. ⁶ Fụvavọ, di Ijesu kaa yụ wa ka, "Ẹfi ami ọi ti tụ, ama ẹfi bo vi ẹfi yi wụ nini. ⁷ Ẹshẹ ọi zụa aa kwayi awụ nini. Ama ọọ kwayi ami fụvọki maa kaa, ki ụkọrọ anini vi ụkọrọ ọshimi. ⁸ Ụvazụ shirẹ ni ni ụpe ọnọ nini. Ma zaa nọ fụvọka ẹfi ami ọi ti tụ. ⁹ Ọ mẹ ma nka yụ wa da, dọ ni Iganini. ¹⁰ Ama, ụmọni ẹnyara aani ni ini ụpe ọnọ da, di ọ ni nyẹmbẹ bebe shirẹ ni izọ̣. ¹¹ Di ani Ijuu nini ee sio ini ụpe ọnọ, dee fisụe ka, "Izọ ya?" ¹² Aa karẹyi aani kokoro inakaakana aza ọkọni ana gụ. Azẹnyi ka, "Ọza ọiza ọnọ vi." Di azẹnyi ka, "Eeye, ka ọọ kụ aza nyeyi." ¹³ Ama, ọzi nyi ẹzẹna zai karẹyi aani tụẹshẹ fụvọka ee shangwa ani Ijuu nini. ¹⁴ Ụmọni ụpe ọnọ vọ che dọ ta mẹ, di Ijesu shirẹ ngwụ ni itẹmpụrụ, do zụ aza isa. ¹⁵ Ọọ shi ani Ijuu nini eyi, dẹ ka, "Ọza ọnọni mẹ maan si yẹ isa kẹ? ọ zi ni ini ishụkụrụ ọi yẹyẹ?" ¹⁶ Di Ijesu tụoshi ka, "Isi maa zụ aza, ọzi vi ayami, ama ẹzẹna tụ mi yọ. ¹⁷ Ọ ọnyi ẹzene si ka ọni aa mi osisi aani, ọza ọnọ vaa yẹ aivi ka irẹyi ẹngwụ ami maa ka, navẹki idi Oshomoshi ọno fụrẹ vẹ, ¹⁸ ọzatụrọza ana raa karẹyi ẹngwụ aani, vene si ụbani ẹngwụ aani, ama, ọzatụrọza ene ree si ubani ẹzẹna tụọ, vi ọni irẹiza, ọzi nyi aichama ini ọzọnọọ. ¹⁹ Imosisi wa ra zi si ofi yu wụ nini? Tụavọ-tụavọ, ọzi nyi ọza awụ nin ana vatụra ofi ọnọ. Sụ wee si kụ wa wụ mi tụ nin kẹ? ²⁰ Di aza ọkọni ẹnẹ tụoshi ka, "Wa nyi ifẹ azeeshi. Enee si ki ọni aa wụ ụ?" ²¹ Di Ijesu tụoshi ka, "Maa mụkọrọ ọnya, dọ shụwụ nin eyi, ²² Imosisi ọ si ụmọ yụ wụ ki waa ji ọza ụma nini, (aivi Imosisi ọnọ fụvọ aani vẹ, ama fụri avọshụkụ), dụ waa ji ozi ụma nin ini ọkụshi Isabaati. ²³ "Waa ji ozi ụma ini ọkụshi Isabaati, dụ we re ki we zi dụ ofi Imosisi nini, sụ wa mẹ ọikụ shi mi tụ nini, fụvọki maa fụ ọza ikụ sha ini ọkụshi Isabaati? ²⁴ A sụ kụ ji ishi eyi-eyi nini, ama wa si irẹiza mẹ ishọji nini." ²⁵ Di aza ẹnyi ana fụrẹ Ijerụsanẹmụ ka, "Aivi ọza ene si ka ẹni aa wụ yi? ²⁶ Ree, ọ karẹyi ini eyi-gede dọ raa zi nyi ẹzẹna karẹyi yọ. Ma zi kẹnẹ ki ọdọvidi nini ẹ yẹ ka ọnọvi Ikristi, ọ wa vọ vọ vi? ²⁷ Yaa yẹ izọ ọzọnọni fụrẹ, ama ụmẹ Ikristi ra vẹ, ọ zi nyi ọza ana yẹ izọ ọ fụrẹ vẹ. ²⁸ Di Ijesu si ongwẹ tụebe aa zụ wa ini itẹmpụrụ,"Dọ ka waa yẹ mi, dụ yẹ izi mi fụrẹ vẹ nini. Aivi ẹma tụ ẹngwụ ami vẹshẹ, ẹzẹna tụ mi vọni rẹiza. Wa zi yẹ ẹ nini. ²⁹ Maa yẹ ẹ fụvọka ọnọ tụ mi fi idi aani vẹ. ³⁰ Ee si ka ẹnẹ zaa, ama ọzi nyi ẹnẹna si ụvọ ka niọ fụvọka ẹfi aani oi ti tụ. ³¹ Ama aza ẹnyi ini aza ọkọni ẹnẹ, ẹẹ dọ ọ wụ, dẹ fọ ka, "Ụmọni Ikristi ọnọ raa vẹ, ọ wa vaa mụkọrọ oshishozeyi fụni ọni ọza ọnọni mẹ?" ³² Ifarisi nin ẹ wụ ka aza ọkọni ẹnẹ tangwa aa karẹyi Ijesu, di arụfa ọbani nin ẹnri Ifarisi nini tụ ọnọọpa anini ka ena za a vẹ. ³³ Di Ijesu ka, "Mva yi yaa pe wụ nini chee, di ma va varama netụ ẹzẹna tụ mi. ³⁴ Ụ vee si mi ama we zee re mi nin, Wai zụa vẹ izi maa nọ nini." ³⁵ Di ani Ijuu nini aa fọ ẹngwụ ka, Izi ọza ọnọni vaa na nọ, di yee me zụ re e? Ọ wa vaa ni Igiriki, izi ani Ijụụ nini gara shi, dọ naa zụ ani Igiriki nini isa? ³⁶ Sẹnẹvi irẹyi ọnọ ka, "Ụ vee si mi, ama we zee re mi nini. Wai zụa vẹ izi maa nọ nini?" ³⁷ Ini ọkụshi ọvarẹsụ ọbani ụpe ọnọọ, di Ijesu kwẹtẹ dinẹ, dọ si ọngwẹ tụẹba ka, "Ọọ nyi ẹzẹni onyi aa kụ, o vee tụ mi, do vee fụ enyi. ³⁸ Ọza ọna raa dọ mi wụ, enyi ana sẹshẹ yọza, vee si fi ininẹ ọzọnọọ jinẹ vẹ, venebiri iwe ọnini mẹ kaa." ³⁹ Ama ọ karẹyi ọnọ inọpati Ifẹ Ọnini, ana vaa si yi azena raa dọ ọ wụ; Oshomoshi ọi si si Ifẹ Ọnini yi aza ini ẹfi ọnọ fụvọki Ijesu ọi ngwi-ngwụ ini ụbani aani. ⁴⁰ Azẹnyi ini aza ọkọni ẹnẹ mẹ wụ irẹyi ẹnẹni, dẹ ka,"Irẹiza, ọkisẹ ọnọ yi." ⁴¹ Di azẹnẹsa ka "Ikristi ọnọ yi." Ama da azẹnyi ka, "Iganini ọni Ikristi ọnọ wa furẹ vẹ?" ⁴² Iwe ọnini wa raa zi kaa ki Ikristi ọnọ vana vaa fini ovoovụ Idevidi ọnri ki irẹkụra Ibẹtinẹhẹmu, izi anda Idevidi chi fụrẹ?" ⁴³ Dọvika azẹnẹ ẹsi ga inọpati aani. ⁴⁴ Azẹnyi ina nini esi ka ẹnẹ za a, ama ọzi nyi ẹzẹna si ụvọ ka ni ọ. ⁴⁵ Di ọnitụ ẹnẹ varama ve tụ arụfa ọ̣bani nin ọnri Ifarisi nini, ẹ fọ ọnitụ ẹnẹ ka, "Sẹnẹvẹ dụ raa zi za a vẹ nini?" ⁴⁶ Di ọnitụ ẹnẹ ka, "Ọi nyi nyi ẹzẹna maan karẹyi vene ọza ọnọni yẹ yẹ." ⁴⁷ Di Ifarisi ẹnẹ fọ wa ka, "A wa zẹ ji ẹwụ nini nyẹmbẹ vene da? ⁴⁸ Ọọ wa nyi ọdọvidi ọnyọnyi navẹki Ifarisi ọnyọnyi ana dọ ọ wụ da? ⁴⁹ Ama, aza ọkọni ẹnẹni ana zi yẹ isa ofi ka. "Ekụochi ya wa irẹsu." ⁵⁰ Di Inikodemọ̣si, (ọnya ini Ifarisi nini, ẹnẹ bidi ve tụ Ijesu) fọ wa ka, ⁵¹ "Ofi ayi waa ji ivi yi ọza doti ọ tangwa va wụ irenụ ọzọnọ, da yẹ isa ọ mẹ?" ⁵² Dẹ voshi yọ ka, "Ani Iganini ẹwụ wa zẹ vi?" Zama du we re ka ọzi nyi ọkisẹ ana fụri Iganini vẹ." ⁵³ Inaani, di ọzọọza varama neeshi aani.