¹ Inaama isa ẹnẹni bo, Ijesu ọọ jinẹ nị aka irẹfụ Iganini, ana zẹ shii shi Itibẹriyasi. ² Aza ọkọni ẹ vatụra fụvọka ee re ụkọrọ oshishozeyi ọnọọ mẹ ini ẹshẹ aza ẹnẹ ngwụazi. ³ Ijesu ọọ shirẹ irẹsụfa ọbani, di ọnri eziafụ aani yatụ tụ inẹẹsụ irẹsụfa ọnọ. ⁴ Ụmọni ụpe ọpiparafụ̣ aa gụrẹtẹ. ⁵ Ijesu mẹ kụreyi shirẹ, do ree ka azọkọni aa vẹ, di ọ fọ Ifiripi ka, "Izi iva ya shi isari doti aza ẹnẹni ẹ zụ ri isari?" ⁶ Ama Ijesu vana siọ zama Ifiripi re fụvọka ọọ yẹ isa ọ vaa mẹ. ⁷ Di Ifiripi tụoshi ka, "Yaa daka shi ivụrẹdi ampo ẹẹva, da ka ozoza ọ da ri che-che, dọ zu fu." ⁸ Di oziafụ aani ọnya, a naa shi Andụrụ ọnyara Ipita ka a yi Ijesu ka, ⁹ ọọ nyi ozi ọnọrụ oweyi ọnya ana nyi ivụrẹdi ẹẹshi ọnri isenyi oweyi ẹẹva, ama izi ọ̣nọ vaa fụ tụ inakaakana aza ụnọmpa ẹnẹni kẹ?" ¹⁰ Di Ijesu ka, "Ka a yi aza ẹnẹ ka ẹ yatu, izọ ọ nyi avi kokoro. Di aza ẹnẹ yatu. Ọpati akaashi oze ẹshi ọni aza ẹnẹ vi. ¹¹ Di Ijesu dọ wa ivụrẹdi ọnọ. Ọ mẹ kụ Oshomoshi avọ tụọ da, dọ ga a yi aza ẹna yatụ. Dọ zẹ ga isenyi ọnọ ọpa ana fụ ọzọza yụ wa. ¹² Ụmẹnẹ ri, di inẹ anini shi, di Ijesu kaa yi eziafụ aani ka, "Pere ewụri ana vọ gụ, doti a si ọ nyi ene dụ sha." ¹³ Dee pere ewụri ana vọ fi ini ivụrẹdi ẹẹshi ọnọ. Oo shi ụji ẹwụrẹẹva. ¹⁴ Ụmẹ aza ẹnẹni re oshishọzeyi ọnọ ọ mẹ, dẹ ka, "Inirẹiza, ọza ọnọni ọnọvi ọkisẹ anaa vẹ ẹshẹ." ¹⁵ Ụmọni Ijesu yẹ ka ẹẹ va si ọni ri oshinọyi ẹkẹẹka, di ọni renya fi nakaakana anini varama shirẹ ni irẹsụfa ọbani ọnọ naa ya. ¹⁶ Ụmọni orụva tụ, di eziafụ aani varama chi na ini irefụ ọnọọ. ¹⁷ Ẹẹ ngwụ ẹpa dẹ jinẹ irefụ aa ni Ikapanọmụ. Ẹtẹ o si shoozi da, di Ijesu rai vivẹ vetụ wa. ¹⁸ Ụmotụ, di ashi ọbani aa kụ, di enyi kụa da bụdụ. ¹⁹ Ẹ mẹ zụsẹ ọpati imairi ẹẹta navẹki ẹẹna, de re ka Ijesu aa zụsẹ inẹẹsụ enyi kavape ẹpa anini vẹ, di angwa ee shụwa. ²⁰ Dọ kaa yụ wa ka, "Ẹmi yọ! A si angwa shụwụ nini." ²¹ Dee si ka ẹnẹ di Ijesu ngwụ ini ẹpa, di ẹpa anini tụ izẹ ẹ nọ ụmụmọ. ²² Ineyi-nẹshẹ aani, di aza ọkọni ini aka jinẹ irefụ ọnọ ze pere gụ vee re Ijesu, fụvọka ẹẹ ka, ẹpa ọnya kẹnẹ ọnọ yi izọ. Dẹ zẹ va yi yẹ ka Ijesu ọ zi vatụra eziafụ aani ngwụ ini ẹpa ọnọ, ọchishi eziafụ aani renya ẹnẹ na. ²³ Ama ọọ nyi ẹpa ọsa ana fụri Itibẹriyasi vẹ, dọ yi ọgụri izi ẹ yaa ri ivụrẹdi, Ananyiyi mẹ tụozụrenụ, dọ mẹ avọkụ da. ²⁴ Ụmẹ aza ẹrụrụ ene re ka Ijesu ọnri eziafụ aani ẹikụ yi izọ, dẹ ngwụ ini ẹpa, ee si Ijesu ni Ikapanọọmụ. ²⁵ Ụmẹ ne ree aka jinẹ irefụ, dẹ fọ ọ ka, "Irabayi, yere ụmẹ ọnụ vẹ izọni kẹ?" ²⁶ Di Ijesu tụ wa oshi ka, "Inirẹiza, wee si mi nini, aivi fụvọka wee re oshishọzeyi, ama, fụvọka waa ri ivụrẹdi, di inẹ awụ nini shi. ²⁷ A sụ zụechi isari ene vee dụ, ama, wee zụechi isari ene ree me dụ, ana vaa si ẹshẹ poro-pooro yi ọza, isari ọni Ozi Ọza ọni Oshomoshi sụvọ tụra vaa sii yụ wụ." ²⁸ Dẹ fọ ọ ka "Si i bẹdọ vaa mẹ, di ya zụ mẹ ụkọrọ Oshomoshi kẹ?" ²⁹ Di Ijesu tụoshi ka, "Ọnọni ọ vi ụkọrọ Oshomoshi: ka kụ ọtụtụrụma awụ tụra ọza ọnọ tụ vi inẹshẹ." ³⁰ Di ẹ va fọ ọ ka, "Yere ụkọrọ oshishozeyi ọni ụ vaa sii zụ yi, di ya zụ dọ wụ, yee ree. Si u vaa mẹ?" ³¹ Ada yi nini ẹẹ ri imaana ini ụnọmi, vene a mẹ chẹrẹ ẹ ka, 'Ọọ si isari fụri ẹbẹẹba va yụ wa ri."' ³² Di Ijesu tụ wa oshi ka, "Inirẹiza, aivi Imosisi ọnọ si isari fụrẹ ẹbẹẹba yi ada wụ nini. Ada mi anaa si isari obooro yụ wụ nini fụrẹ ẹbẹẹba ọnọ si yụ wa. ³³ Fuvi ki isari Oshomoshi ọnọvi ana fụrẹ ẹbẹẹba vẹ va si ẹshẹ yi anẹshẹ. ³⁴ Dẹ kaa yọ ka, "Ananyiyị, waa si isari ọnọni yi yi ẹfi bo." ³⁵ Di Ijesu kaa yụ wa ka, "Ẹmi a vi isari anaa si ẹshẹ poro yi ọza; ụngwẹ ọikụa kụ ẹzẹna raa ka mi vẹ, Onyi ọikụa ku ẹzẹna raa kụayitụra mi. ³⁶ Ama, ma kaa yụ wụ nini, kụ wee re mi da, ama wa zi dọọ wụ nini. ³⁷ Ọzọtụrọza ọni Ada mi raa sii mi vaa ka mi vẹ. Ma zaa dụ ẹzẹna raa vẹ varama. ³⁸ Mee chi fụrẹ ẹbẹẹba va mẹ isa ẹzẹna tụ mi, aivi isim si ki ma mẹ, ama isa ẹzẹna tụ mi. ³⁹ Isa ọni ẹzẹna tụ mi yi, ka a sim vụ ọzọnyọnyi ini aza ọnọ kụ chire mi ụvọ, ama di ma zụ sha wa kwetẹ fini isụ inọkụshi kọọta. ⁴⁰ Fụvọka ana Ada mi si ka ọzọtụrọza ene ree re Ozi awọni, dọ nyi ọdọwụ inaani, dọ zụ nyi ẹshẹ poro-pooro, dim sha a kẉẹtẹ ini inọkụshi kọọta. ⁴¹ Di aani Ijuu aa rifufu fụvọ ka ọọ kaa ka, "Ẹmi a vi isari ene chi fụri ẹbẹẹba vẹ." ⁴² Dẹ ka, "Aivi Ijesu Ozi Ijosẹfụ ọni yẹ ada aani ọnri ọnyani yi? Ọ mẹ vaa si kaa ki, 'Mee chi fụre ebẹẹba vẹ." ⁴³ Di Ijesu voshi yụ wa ka, "A sụ kụ rifụfụ ini akaakana awụ nini. ⁴⁴ Ọzi nyi ẹzẹna va zụụ ka mi vẹ, ochishi Ada mi ana tụ mi re tụra a, di ẹmi zẹ sha a kwẹtẹ inọkushi kọọ̣ta. ⁴⁵ Aa chẹrẹ ẹ tẹtẹ ini iwe ọkisẹ nini ka, "Oshomoshi ọnọ vaa zụ ọzọọza." Ọzọọza ana za wụ, dọ nyi ọkikọsụẹ fidi Adami, vaa ka mi vẹ. ⁴⁶ Ọọviki ọzọnyọnyi o re Adaa da, ọọ si fini ẹzẹna fidi Oshomoshi vẹ, ene re Adaa da. ⁴⁷ Inirẹiza, inireiza, ẹzẹna raa dọ mi wụ ọọ nyi ẹshẹ poro-pooro. ⁴⁸ Ẹmi a vi isari anaa si ẹshẹ obooro yi ọza. ⁴⁹ Ada wụ nin ẹẹ ri imana ini ụnọmi de sụ. ⁵⁰ Isari ene chi fụrẹ ẹbẹẹba vẹ yi, doti ọza ọ zụ yi inaani ri di a sio sụ. ⁵¹ Ẹmi a vi isari ẹshẹ ene chi fụrẹ ẹbẹẹba vẹ. Ẹzẹna raa ri ini isari ọnọni vana vaa yẹshẹ poro-pooro. Ẹngwụ ami ọ vi isari ọnọ ọni mi va sii yi anẹshẹ. ⁵² Di ani Ijuu nini vẹrẹ aa mọikụ ka, dẹẹ vareyi ngwụ ẹngwụ irenụ ka, "Ọza ọnọni mẹmẹ va zụ si ẹngwụ aani vara isari yi yi ri kẹ?" ⁵³ Ụmavọ, di Ijesu tụ wa oshi ka, "Inirẹiza, inirẹiza, ọọ zi vi ka ụ ri ẹchẹngwụ Ozi Ọza, dụ ze fụ anya aani, wa zaa nyi ẹshẹ poro-pooro nini. ⁵⁴ Ọzatụrọza ana raa ri ẹchẹngwụ ami, do fu anya ami bẹrẹ ẹ, ọọ nyi ẹshẹ ana raa mata. Mva sha kwẹtẹ ini ọkụshi kọọta. ⁵⁵ Ẹngwụ ami vi isari obooro, di anya ami vi enyi obooro ene fụ. ⁵⁶ Ẹzẹna raa ri ẹchẹngwu ami, do fụ anya ami, ọọ yi ininẹ ami, dẹ ẹmi zẹ yi ininẹ aani. ⁵⁷ Venebiri Adaa ana nyi ẹshẹ poro-pooro mẹ tụ mi vẹ ẹshẹ, dim zirẹngwụ aani aa mẹ ẹshẹ, avọọ ọni ẹzẹna raa ri ẹchẹngwụ ami mẹ vaa zirẹngwụ mi mẹ ẹshẹ. ⁵⁸ "Isari ene chi fụrẹ ẹbẹẹba vẹ yi. Ọ zi vene ọni ada wụ nini ri de sụ. Ẹzẹna raa ri isari ọnọni vana vaa yi ẹshẹ poro-pooro." ⁵⁹ Ijesu maa zụ aza isa ini ireshi Osbomoshi ana yi Ikapaṇọmụ, ọnọ ya karẹyi ẹnẹni. ⁶⁰ Eziafụ Ijesu ẹrụrụ ẹẹ wụ irẹyi ọnọni dẹ ka, "Irẹyi ọ̣kata ọọ zụ aani no. ẹnẹ va zụ dọ ọ kẹ?" ⁶¹ Di Ijesu fọ wa ka, "Irẹyi ọnọni wa kụ nini ayi?" fụvọka ọọ yẹ ka eziafụ awọni aa rifụfụ? ⁶² "Ụmẹ vaa ka nini we re ki Ozi Ọza ọọ varama aa shirẹ ni ẹbẹẹba ọnọ bidi ya?" ⁶³ Ifẹ ọnọọ si ẹshẹ yi ọza, ẹchẹngwụ ọizụa siọ yi ọza. Irẹyi ọni maa zụ wụ nini vi Ifẹ ọnri ẹshẹ. ⁶⁴ Tụavọ-tụavọ, ẹrụrụ awụ nini ọ zi dọ mi wụ. Fụvọki Ijesu ọọ yẹ fini ivẹrẹ ẹnẹna raa zaa dọ ọ wụ, shi ẹzẹna vaa siọ chire aza ụvọ. ⁶⁵ Di Ijesu ka, "Isim kaa yụ wụ nini yi ka, ọ zi nyi ẹzẹna va zụụ ka mi vẹ, ọọ zivi ka Adaa ọnọ soze yọ." ⁶⁶ Eziafụ ẹrụrụ ẹẹ va fụrẹ irama fụvi irẹyi ọnọni. ⁶⁷ Di Ijesu fọ eziafụ ẹwụrẹva aani ka, "Ẹwụ nin wa zẹ vaa va fụrẹ mi rama?" ⁶⁸ Di Ipita anaa shi Isimoni tụoshi ka, "Ananyiyi, ẹni kụ vee ne tụ? Ẹwụ ọnọ nyi irẹyi ana si ẹshẹ poro-pooro yi ọza, ⁶⁹ yaa dọ ụ wụ, di yẹ da ka ẹwụ a vi Ọza Ọnya ayi Oshomoshi. ⁷⁰ Di Ijesu ọ kaa yụ wa, "Aivi ẹmi a ni ẹwụ nin ẹwụrẹẹva, ama di ozenya awụ nini vi eshụ." ⁷¹ Ijụdasi, ozi Isimoni Isikariyọti, ọni ọọ ka, fụvọka ọni, ọnya ini ẹwụrẹẹva ẹnẹ ọnọ vaa si Ijesu chire aza ụvọ.