¹ Inaama ọnọni, ọnyi ụpe ọnya ọni ani Ijụụ nini ri, di Ijesu shirẹ ni Ijerụsanẹmụ. ² Ọọ nyi adagụ-enyi ana gụrẹ izọ, ọchọfọ-atẹme Ijerụsanẹmụ. Aa shi adagụ ọnọ Ibẹtisida ini irẹkụra Ihibụrụ. Ajẹngwụ ẹẹshi ẹ vara kara a. ³ Ọnikụ ẹrụrụ nini, ogụiri nini, osụafụ ọnri osụẹngwụ nini vana sụtụ shi izọ. ⁴ Fụvọka ọnyi ụmọni angẹni Ạnanyiyi sii vẹ, vaa wụ enyi ọnọ, dọvika ọnikụ tụri ikụ ana raa bidi ji ngwọ, aa mẹ wụọọ da, vọni ẹngwụọzi aani va ta. ⁵ Ọọ va nyi ọnikụ ọnyi ọniviki ọọsi mẹ irayi ofụrẹwụ-rishinta izọ. ⁶ Ijesu me ̣re ka ọ sụtụ tụ zọ, dọ yẹ ka oosi kụ ọnọ fụrẹ yi izọ, ọọ fọ ka, "Ụ wee si kụ wa dashi?" ⁷ Di ọnikụ ọnọ tụoshi ka, "Ananyimị, ma zi nyi ọzene vee chema mi nangwụ inenyi ọnọ. Di ma naa ngwụ izọ, ọzẹnẹsa o chi ngwụọ da." ⁸ Di Ijesu kaa yọ ọ ka, "Kwẹtẹ, kari ụpoto awụ, dụ wa zụsẹ." ⁹ Ụmụmọ, di ẹngwụọzi aani ta, dọ kari ụpoto aani, dọ zụsẹ. Ọkụshi ishọ vi Isabaati. ¹⁰ Di aani Ijuu nini kaa yi ọnọrụ ọna fụ ikụ sha ka, "Ọkụshi Isabaati ọni irajini vi, dụ yẹ ka ofi ọ zi zẹẹ, kụ wa zi ụpoto." ¹¹ Do voshi yụ wa ka, "Ẹzẹna na fụm iku sha ọnọ kaa yi mi ka, 'Kari ụpoto awụ dụ wa zụsẹ.'" ¹² Dẹ fọ ọ ka, "Ẹnẹ vi ọnọrụ ọnọ ana kaa yi wụ, kụ wa kari ụpoto awu, dụ wa zụse?" ¹³ Ama, ẹzẹna fụ ikụ sha, ọọ zi yẹ ẹzẹnọ vi fụvọki Ijesu oo bebe jinẹ fi inakaakana aza ọkọni ana yi izọ. ¹⁴ Inaama ọnọ, Ijesu oo ve ree ini itẹmpụrụ, dọ kaa yọ ka, "Ree, aa fụ ụ ikụ sha da, asi kụ varama ni ini aichama, doti asi isene fụni ẹngwụọzi ọnọ mẹ ụ." ¹⁵ Di ọnọrụ ọnọ fi izọ, dọ na kaa yi ani Ijuu nini ka, Ijesu ọnọ fụ ọni ikụ sha. ¹⁶ Di ani Ijuu nini aa kụọ kata Ijesu ẹngwụ fụvọka, ọọ mụkọrọ oshishozeyi ini ọkụshi Isabaati. ¹⁷ Di Ijesu voshi yi wa ka, "Adami aa mụkọrọ vetụ ụmaani, di ẹmi nyẹmbẹ aa mụkọrọ." ¹⁸ Fụvọ ọnọni, di ani Ijuu nini kwe soze ọwi wụọ, ka aivi ka ọọ ngwụ ofi anini, ka ọọ mụkọrọ ini ọkụshi Isabaati, ama ka ọọ zẹ shi Oshomoshi Adaa aani, dọ sẹngwụ aani mọrọ Oshomoshi. ¹⁹ Ijesu ọ tụ wa oshi ka, "Inirẹiza, Ozi ọizụ aa mẹ isọnyọnyi yẹngwụ aani, ọchishi ono re ki Ada awọni aa mẹ. Fụvọka isatụrisa ọni Ada ra mẹ ọni Ozi aani zaa mi mẹ. ²⁰ Fụvọka Adaa ọọ sirẹyi Ozi, dọ si isa bo ọnọ mẹ zu ọ. Ọ vana vaa si isa ẹna bani fụna aani zụọ, doti ọ zụ shụ wụ nini eyi. ²¹ Adaa mẹ sha oku kwẹtẹ, dọ si ifẹ yọ, avọọ Ozi ọnọ mẹ zee si ifẹ yi aza ono ree si ki ọni aa si ifẹ yi. ²² Ada ọ zaa mi ishọji yi ọzọnyọnyi, fụvoki ọ si ishoji bo chire Ozi aani ụvọ, ²³ doti ọzọza ọ si ụbani yi Ozi venebiri ọ mẹ si ụbani yi Ada. Ọza ana ra zi si ụbani yi Ozi, ọ zi si ụbani yi Ada ana tụọ. ²⁴ Inirẹiza, ẹzẹna raa wụ irẹyi ami, dọ di ẹzẹna tụ mi wụ, ọọ vaa nyi ẹshẹ poro-pooro, ọọ fi ini isụ, nangwụ inẹshẹ da, azẹikụ a ji ivi yọ ọ. ²⁵ Maa ka irẹiza yụ wụ nini ka, ẹfi aa vẹ, ụmẹ ọnọ gẹdẹ-gẹdẹ yi, ọni oku nini vaa wụ ọngwẹ Ozi Oshomoshi, di ẹnẹna wụ sha kwẹtẹ. ²⁶ Adaa mẹmẹ nyi ifẹ inẹngwụ aani, avọọ ọmẹ zẹ mi mẹẹ ka Ozi ọ nyi ifẹ inẹngwụ aani. ²⁷ Oshomoshi ọọ si ụmọ yi Ozi da ka ọmẹ ishọji, fụvọka Ozi Ọza ọnọvi. ²⁸ A si ọnọni shụ wụ nini eyi, fụvọki ẹfi aa vẹ ọni aza ẹna yi ini irikụta bo vaa wu ọngwẹ aani, ²⁹ dẹ jinẹ vẹ: di ẹnẹna mẹ ọiza, dẹ ngwụ ini ọshisha kwẹtẹ ẹshẹ poro-pooro, ọnri ẹnẹna mẹ ọshimi, ngwụ ni ọshisha kwẹtẹ ayi ishọji. ³⁰ Mẹi zụa mẹ isọnsọnyi yi ẹngwụ ami, isi mi wụ fidi Adami ọni maa sii ji ishi. Ishọji ami vi irẹiza fụvọka, aivi isa ẹnẹ zemeyi ma mẹ, ama isa ene ze Adaa ana tụ mi eyi. ³¹ Aavika ẹmi ọna divenu irẹyi ẹngwụ ami, iveenụ ami ọ za vi irẹiza. ³² Ama, ọnyi ọzẹnẹsa ana vaa divenụ tụ ni irẹyi ami, di ma vaa zụ yẹ ki iveenụ ọnọ vi irẹiza ³³ Waa tụ netụ Ijọọnụ nini da, dọ ki irẹiza. ³⁴ Aivọvi kim ve nee si iveenụ aza, maa ka irẹyi ẹnẹni, doti e roze dọ ọ wụ nini tụ, ³⁵ Ijọọnụ vi ọpa anaa za kokoro, du nyi inoshine ini ẹtofei ọnọ, ini ẹfi keere. ³⁶ Ọọ nyi iveenụ ene fụna ayi Ijọọnụ inọpati ami, fụvọka ụkọrọ ọni Adami si mi, ọni maa mẹ, ẹẹ siọ zụ ka Adami ọ tụ mi. ³⁷ Adami ana tụ mi nyẹmbẹ ọọ divenụ inọpati ami. Wai wiwụ ọngwẹ aani, wei ze ri ree ọ mẹmẹ ya nini inẹfi ọnyọnyi. ³⁸ Irẹyi aani ọ zi nyi ininẹ awụ nini, fụvọki wa zi dọ ọzọnọ ọtụ wụ nini. ³⁹ Waa ki iwe Ọnini kokoro nini, fụvọka wee ro ka ụ vaa nyi ẹshẹ poro-pooro nini. Iwe Ọnini ọnọ nyẹmbẹ oo divenụ inọpati ami, ⁴⁰ ama, wa zi zẹẹ kụ wa vi idami, doti wa zụ nyi ẹshẹ poro-pooro. ⁴¹ Me zi si ki aza ee gono mi, ⁴² ama, maa yẹ ki wa zi nyi osisi Oshomoshi inẹngwụ awụ nin. ⁴³ Maa vẹ ini irẹsha Ada mi, wazi dọ mi wụ nini, ama, azẹnẹsa raa vẹ ini irẹsha ẹngwụ aani, ụ vaa dọ ọ wụ nini. ⁴⁴ Ụ mẹmẹ va zụụ dọ wụ ini ụmọni ụ waa ga ẹngwụ awụ nini, dụ ree zi si ụga ana fidi Oshomoshi renya? ⁴⁵ A sụ ro ki mva si irẹyi awụ nini tụ Adaa rẹka. Imosisi ọnụ kụeyi tụra nini, ọnọ si irẹyi awụ nini tụ Adaa rẹka. ⁴⁶ Waa di Imosisi wụ, ụ vaa dọ mi wụ nini, fụvọka ọ chẹrẹ isa inọpati ami. ⁴⁷ "Waa zi di isa ọnọ chẹrẹ tẹtẹ wụ, ụ mẹmẹ vaa di irẹyi ami wụ."