¹ Ijesu mẹ yẹ ki Ifarisi nini ẹẹ wụ da ka ọ naa nyi eziafụ, dọ naa mẹ isami yi aza fụni Ijọọnu, ² ama, dọ si viki eziafụ Ijesu ẹnaa mẹ isami, aivi ọni nyẹmbẹ. ³ Dọ fụri Ijụdiya, dọ zẹ varama ni Iganini. ⁴ Ama, ọ sẹrẹ ki, ọ va zi Isameriya parafụ. ⁵ Fụvavọ dọ vẹ irẹkụra ọnyi anaa shi Isika ini ẹtẹ Isameriya, ọgụri ẹtẹ ọni Ijekọbụ si yi Ijosẹfụ ozi aani. ⁶ Ikanga Ijekọbụ yi izọ. Inọpati iwakati shinọnyi, Ijesu oo ve tụ ikanga ọnọ, dọ yatụ peẹ, fụvọka ọ tụọ ọ.? ⁷ Ọnyẹnẹ ani Isameriya ọnyi ọ vẹ va denyi, di Ijesu kaa yọ ka, "Kenyi yi mi fụ." ⁸ Fụvọki eziafụ aani, ẹ ngwụ irẹkụra naa na shi isari. ⁹ Di ọnyẹnẹ ani Isameriya ọnọ tụoshi ka, "Ọ mẹ ya di ẹwụ Ijuu ee fisue enyi fini ụvọ ẹmi ani Isameriya?" Fụvọki ani Ijuu nini ọnri ani isameriya nini ẹẹ ma nyi ọrigẹ. ¹⁰ Di Ijesu voshi, dọ kaa yọ ka, "Aaviki wa yaan yẹ irẹiza ọni Oshomoshi mẹ yi ụ ọnri ẹzẹna kaa yụ wụ ka kenyi yi mi, ụ yaan fọ ọ, dọ yaan si enyi ifẹ yụ wụ." ¹¹ Di ọnyẹnẹ ọnọ kaa yọ ka, Ananyimị wazi nyi isodenyi, di ikanga nyinẹ. Izẹnụ ve yee re enyi ifẹ ọnọ fụrẹ? ¹² Ụ wa bani fụni Ijekọbụ adayi ana chi ikanga yi yi, di ọni nyẹmbẹ fụ inaani, vene ezi aani ọnri isụpa aani me ze fi fụ?" ¹³ Di Ijesu voshi yọ ka, "Oonyi vaa varama kụ ọzatụrọza ene ree fụ ini enyi ọnọni, ¹⁴ ama oonyi ọi kụa kụ ọzatụrọza ene ree fụ ini enyi ọnim va si yọ, oonyi ọi kụa varama kụọ poro-pooro. Akikọnọ, enyi ọni mva si yọ, vana va vara osụe ininẹ aani, ene cho-sere poro-pooro." ¹⁵ Di ọnyẹnẹẹ ọnọ kaa yọ ka, "Ananyimị, daka si enyi ọnọ yi mi doti a si oonyi kụ kụ mi, domotori ki maa vẹ izọni vaa denyi." ¹⁶ Di Ijesu kaa yọ ka, "Na shi ọva wụ, dụ wa varama vẹ izọnị." ¹⁷ Di ọnyẹnẹe ̣ọnọ o voshi ka, "Mazi nyi ọva." Di Ijesu voshi yọ ọ ka, "Irẹiza ụ kaa ki, 'Ma zi nyi ọva," ¹⁸ fụvọki, waa bidi nyi ọva ẹshi. ọnụ nyi ọmẹyani ọzi vi ọva awụ. "Irẹyi ọnụ ka vi irẹiza." ¹⁹ Di ọnyẹnẹ ọnọ ka, "Ananyimi mee re ka ọkise ọnụ vi. ²⁰ Adayi nini vana fẹkẹ Osho-moshi ini irẹsụfa ọbani ọnọni, ama ẹwụ ka Ijerụsanẹmu ọnọ vi izọ vọrọ ka aza ẹ ya mẹ irafẹkẹ." ²¹ Di Ijesu kaa yọ ka, "Ẹwụ ọnyẹnẹ ọnọni, dọ mi wu ka, ẹfi aa vẹ ana rai kụa fẹkẹ Adaa ini irẹsụfa ọnọni navẹka ini Ijerụsanẹmụ. ²² Waa fẹkẹ isa ọnụ ra zi yẹ nini. Ẹ ya a yẹ isa ọni ya fẹkẹ, fụvọka, ọdidọtụ vana fidi Ijuu nini vẹ. ²³ Ọmẹ ra vi, iwakati aa vẹ, ẹfi ọnọ o tụ da, ọni ọnirẹiza nini vaa fẹkẹ Adaa ini ifẹ ọnri ini irẹiza fụvọki, ẹngwụ aza ẹnẹ ọni Oshomoshi ee si ka ẹ fẹkẹ ọni. ²⁴ Oshomo-shi vi Ifẹ. Ẹnẹ naa fẹkẹ ẹ bẹdọ fẹkẹ ẹ ini ifẹ ọnri ini irẹiza." ²⁵ Di ọnyẹnẹ ọnọ kaa yi Ijesu ka, "Maa yẹ ka ọdọzatụ anaa shi Ikristi aa vẹ. Ọ vaa si afụ isa bo zụ yi ụmọnọ raa vẹ." ²⁶ Di Ijesu kaa yọ ka, "Ẹma vi ọzọnọ, ene pe wụ karẹyi." ²⁷ Ẹfiavọ, di eziafụ aani varama fini iboro vẹ. Ọọ shụweyi ka oo pe ọnyẹnẹ aa karẹyi, ama, ọzi nyi ẹzẹna zai fọ ọ ka," Sụ wee si?" navẹka, "Sẹnẹvẹ dụ wee pe e karẹyi." ²⁸ Ọnyẹnẹ ọnọ ọ fụri isodenyi aani ụvọ, dọ varama ngwụ ini iboro na kaa yi aza ka, ²⁹ "Waa vẹ nini, dụ we ve re ọnọrụ ọnya ana kaa yi mi, isa bo ọnim mẹ tụrama. Ọnọnị ọi zụa vi Ikristi, naveki ọni yọ?" ³⁰ Ḍẹ fini irẹkụra ọnọ ve tụo. ³¹ Ụmavọ, di eziafu aani aa kaa yọ ka, "Irabayi, ri isari." ³² Ama di Ijesu kaa yụ wa ka,"Maa nyi isạri ọnim vaa ri, ọnụ ra zi yẹ inọpati aani nini." ³³ Di eziafu aani aa fọ ẹngwụ ka, ọzi nyi ẹzẹna si isari va yọ, navẹki ọ nyi?" ³⁴ Di Ijesu kaa yụ wa ka, "Isari ami ọnọ vi ki ma mẹ osisi ẹzẹna tụ mi, di ma mẹẹ na zẹtẹ." ³⁵ Aivi ụ kaa nini ka, 'Ọọ si vi ụfẹ ẹẹna, doti a tangwa va kụ isa irarẹ gụ nin.' Maa kaa yụ wụ nin zama, irare awụ nin, ụ vee re, ẹẹ si vi da, enee pere. ³⁶ Ẹzẹna re pere isa irarẹ gụ, vee re ọgu, dọ zẹ kụ ẹtụtụ gụ yi ẹshẹ poro-pooro, doti ọ vi ka ezene chire isa ọnri ezene pere gụ ẹ zụ jụje. ³⁷ Fụvọki, irẹiza ana kaa ka, "Ọza ọnya o chire, di ọzẹnẹsa fa, do peree gụ." ³⁸ Maa tụ wụ nin, kụ we ne pere isa irarẹ ọnụ razi mụkọrọ aani. Azẹnẹsa ẹnẹ mụkọrọ, ama ẹwụ nin ọnọ aa kụ ọgu aani." ³⁹ Ani Isameriya ẹrụrụ ana yi irẹkụra ọnọ ẹnẹ dọ wụ fụvi irẹyi ọni ọnyẹnẹ ọnọ ka yụ wa ka, "Ọọ ka isa bo ọnim mẹ tụrama yi mi. ⁴⁰ Ani Isameriya ẹnẹ me vetụo, dẹ dipẹ yọ ka, ọ ya pe ẹni; dọ yizọ mẹ ẹkụshi ẹẹva tụọ. ⁴¹ Aza ẹrụrụ ọsa, ẹẹ dọwụ fuvọ irẹyi ọnọ ka. ⁴² Di ẹ kaa yi ọnyẹnẹ ọnọ ka, "Aiku vi fụvi irẹyi ọni wụ renya ọnọ mẹ yi ̣dọọ wụ, ẹyi nyẹmbẹ ọ bidi wụ da, di yẹ ka inirẹiza, ọnọni ọnọ vi ọdọzatụ anẹshẹ." ⁴³ Inaama ọkụshi ẹẹva ẹnẹ, di Ijesu fi izọ ni Iganini. ⁴⁴ Ijesu nyẹmbẹ ọ kaa ki ọkisẹ ọ zi nyi ụbani ini irẹkụra aani. ⁴⁵ Ụmọni Ijesu ngwu Iganini, ani Iganini nini ẹ kụọ kanẹ, fụvọki, ẹni nyẹmbẹ ẹ ri ụpe ọpiparafụ, de re isa bo ọnọ mẹ Ijerụsanẹmụ. ⁴⁶ Di Ijesu varama vi Ikana ini ẹtẹ Iganini, izẹni ọ bidi ya si enyi vara eche. Ọnụkọrọ oshinọyi ọnyi yi izọ, ọni ẹngwụ ozi aani, ana yi Ikapanọmụ, ra zi ni. ⁴⁷ Ọ mẹ wu ki Ijesu ọ fụri Ijụdiya va ngwụ Iganini, do ne tụ Ijesu, dọ dipẹ yọ ka, ̣ọ va fụ ozi ọnọrụ awọni ana razi dashi, ikụ sha. ⁴⁸ Di Ijesu kaa yọ ka, "Wa zaa dọọ wụ nin, ọchishi kụ ree ọtẹrẹwạ ọnri isa oshisho-zeyi." ⁴⁹ Di ọnụkọrọ ọnọ dipẹ yọ ka, "Ananyimi, daka vẹ di ozi ami ọ tangwa ve sụ." ⁵⁰ Di Ijesu kaa yọ ka, "Waa na, ozi awụ ọ dashi da." Di ọzọnọ dọ irẹyi Ijesu wụ, dọ na. ⁵¹ O mee chi na, di ezida aani vara gẹrẹ ẹ, dẹ kaa yọ ka, ozi aani ọ si da shị. ⁵² Dọ fọ wa ka yere ụmẹ ọnọ si nyima aa daashi? Dẹ voshi ka, "Irẹri inọpati iwakati ọfụri-shimba ọni iva ọnọ fụrẹ ẹngwụ." ⁵³ Umavọ, di ada ozi ọnọ tamayi ka ẹfiavọ ọni Ijesu si kaa yọ ni ka, "Ozi awụ ọọ dashi," di ọni ọnri anireshi aani, dọ Ijesu wụ. ⁵⁴ Isa oshishozeyi ọfụva ọni Ijesu me, ọ mẹ, jinẹ fụri Ijụdiya va ngwụ Iganini.