¹ Ọọ nyi Ifarisi ọnyi anaa shi Inikodemọsi, ọnya ini ọdọvidi ani Ijuu ọnọvi. ² Ọza ọnọni oo ve tụ Ijesu inaafụ, dọ ka, "Irabayi, yaa yẹ ka ọzụọzisa ana fidi Oshomoshi vẹ ọnụ vi, fụvọka ọ zi nyi ẹzẹna va zụụ mụkọrọ oshishozeyi ẹnẹni Oshomoshi ra zi ya bẹrẹ ẹ." ³ Di Ijesu tụoshi ka, "Inirẹiza, inirẹiza, ọọ zivi ki e teni ọza ma, ọi zụe re ijọva Osho-moshi." ⁴ Di Inikodemọsi fọ ọ ka "A mẹmẹ va zụ teni ọza ma ini ụmẹ ọnọ si vi ọzọku?" Ọ wa va kụ zụụ varama ngwụ ininẹ ọnya aani?" ⁵ Di Ijesu voshi ka, "Inirẹiza, inirẹiza, ọza ọizụa ngwụ ini ijọva Oshomoshi aa zivi ka asi enyi ọnri Ifẹ maa." ⁶ Ozi ana ma ini ẹchẹngwụ, vi ọza ẹchẹngwụ, di ana ma zirẹngwụ Ifẹ, vi Ifẹ." ⁷ A si ọ shụweyi ki ma kaa ki aa bẹdọ ve teni ụ ma. ⁸ "Ashi va naa kụ ni aka ene zee yi kẹnẹ, dụ wa wụọ irẹyi, ama wa zi yẹ izọ fụrẹ, navẹki izọnọ. Avọ ọ mẹ ya yi ọza ọ̣ni Ifẹ ma." ⁹ Inikodemọsi ọọ zẹ tụoshi ka, "Isa ẹnẹni mẹ va zụ mẹ kẹ?" 0 Di Ijesu tụoshi ka, "Aivi ọzụọzisa ọnụ vi ini Isrẹni, tụavọ-tụavọ dụ ra zi yẹ isa ẹnẹṇi?" ¹¹ Ma kaa yụ wụ inirẹiza, isa ọni yẹ, ọni yaa ka, di ya divenụ inọpati isi re da. Tụavọ-tụavọ, wa zi dọ iveenụ ayi wụ nini. ¹² Ma a karẹyi isa ẹshẹ yụ wụ, dụ ra zi dọ mi wụ nini, ụ mẹmẹ va dọ ọ wụ ma karẹyi isa ineekụ? ¹³ Ọ zi nyi ọza ana shirẹ nẹbẹẹba da, ọọ zi vi ẹmi Ozi Ọza ene chi fi ineekụ vẹ. ¹⁴ Venebiri Imosisi mẹ si isẹchichi tụ ẹbẹẹba ini ụnọmi, a vọ amẹ vaa si Ozi Ọza tụ ẹbẹẹba, ¹⁵ di aza bo ana raa dọ ọ wụ, ẹ zu nyi ẹshẹ poro-pooro. ¹⁶ Oshomoshi oo sirẹyi anẹshẹ poro netụ ka, ọọ si Ozi aani ọnya chọ yi anẹshẹ ka, ọzatụrọza ana raa dọ ọ wụ, o zee sụ, ama dọ nyi ẹshẹ poro-pooro. ¹⁷ Oshomoshi ọ zi tụ Ozi aani vẹshẹ ka ọ va ji ivi yi ẹshẹ, ama ka, aa zirengwụ aani di anẹshẹ tụ. ¹⁸ Osho-moshi ọzi ji ivi yi ẹzẹna dọ ọ wụ, ama Oshomoshi ọ ji ivi yi ẹzẹna ra zi dọwụ da, fụvọka, ọ zi di irẹsha Ozi aani ọnya chọ wụ. ¹⁹ Ọnọni ọ vi afụrẹyi ishọji ọnọ: ẹtofei ọ ngwụ ẹshẹ vẹ, ama aza ee sirẹyi oozi fụvọka ọmimẹ anini vi ọshimi. ²⁰ Fụvọka ẹzẹna ra mẹ ọshimi vana a kụayi ẹtofei. Ọ ma vị ini ẹtofei doti a si ọshimi ọnọọ mẹ va tụẹshẹ. ²¹ Ama ẹzẹna mẹ irẹiza vana vị ini ẹtofei doti aza ee zụ re ka ọ mẹ isa Oshomoshi si." ²² Inaama ọnọni, di ijesu ọnri eziafụ aani ni Ijụdiya. Ẹmẹ gẹ yi izọ ini ẹfi chee, di ọ mẹ isami yi aza. ²³ Ijọọnụ ọni vana za mi mẹ isami yi aza ini Enọọni ana gụrẹ Isanimị fụvọki enyi ọrụrụ yi izọ. Di aza a vẹ vetụo, dọ mẹ isami yụ wa. ²⁴ Azẹi zi za Ijọọnụ tụ ini ijaaru ini ẹfi ọnọ. ²⁵ Ụmavọ di ẹshankata ngwụ ini akaakana eziafụ Ijọọnụ ọnri ani Ijụụ inọpati ẹngwụ ọnyinyina. ²⁶ Ee ne tụ Ijọọnụ, dẹ ka "Irabayi, ọza ene ve tụ ụ akẹnẹ Ijọdani ọ nụ karẹyi aani, ree, ka ọọ mẹ isami yi aza, di aza bo nee tụo." ²⁷ Di Ijọọnụ tụoshi ka, ọza ọizụe ri isa dọ ọọ zivi ka a siọ yọ fụrẹ ẹbẹẹba. ²⁸ Ẹwụ nini nyẹmbẹ va zụụ divenụ ki ma kaa ka 'Aivi ẹmi ọno vi Ikristi', ka, 'A tụ mi dọvidi aani.' ²⁹ Ẹzẹna vaa nyi ọnẹẹ, ọnọ nyi ose aani. Ọmẹyani ọta aani ọna dinẹ pe, dọ wụ ọngwẹ aani, oo beree jẹ, ọọ wụ ọngwẹ ọta aani; ọnọni ọnọ vi ka ụjẹ ami ọọ gụ. ³⁰ Ọ bẹdọ vaa kashirẹ tụọ, de mee weyi tụọ. ³¹ Ọza ene chi fụrẹ ẹbẹẹba ono fụni aza bo. Ọza ana fụri ẹshẹ vẹ, vi anẹshẹ kẹnẹ, dọọ karẹyi ẹshẹ. Oza ene chi fi ineekụ vẹ ọnọ fụna aza bo ³² Ọọ divenụ isa ono re ọnri ọnọ wụ da, ama ọzi nyi ẹzẹna divenụ aani wụ. ³³ Ẹzẹna divenụ aani wụ, ẹẹ sụvọ tụọ ka Oshomoshi vi irẹiza. ³⁴ Ọza ọni Oshomoshi tụ vẹ va naa karẹyi aani. Fụvọki Oshomoshi ọ ma si ọnya mọ Ifẹ aani yi aza. ³⁵ Adaa oo sirẹyi Ozi, dọ kụ isa bo chire ụvọ. ³⁶ Ọza ana raa kụ ọtụtụ-rụma tụra Ozi Oshomoshi, ọnọ nyi ẹshẹ poro-pooro, ama ẹzẹna raa mẹ akamawụ shi Ozi ọnọ, o zee re ẹshẹ. Ọikụ Oshomoshi yi inẹẹsụ aani."