¹ Ini ọkụshi ọfụta aani, ọnyi izana ya si ọnẹẹ ini irẹkụra Ikana, inẹtẹ Iganini, di ọnyi Ijesu yi izọ. ² Aa shi Ijesu ọnri eziafụ aani vẹ izọ. ³ Eche anini mẹ ta, di ọnyi Ijesu kaa yọ ka "Eche anini ọikụ vọ." ⁴ Di Ijesu tụoshi ka, "Ẹwụ ọnyẹnẹ, sụ ve tụ mi tụ kẹ? Ẹfi ami oi titụ." ⁵ Di ọnya aani kaa yi eziafụ aani ka, "Isatụrisa ọnọ raa ki yụ wụ, mẹẹ nini." ⁶ Ọọ nyi oji irẹta ishinọnyi ana yi izọ ọni ani Ijụụ nini si nyina ẹngwụ. Ọnyọnya ọ dọ ọpati enyi igarọọni oofụ nangwụ ofụrẹ-ẹwụ. ⁷ Di Ijesu kaa yụ wa ka, "Na denyi shi inoji ẹnẹ. Dẹ denyi shi ụwa," de shi naka irẹnụ. ⁸ Dọ kaa yi eziafụ ẹnẹ ka, "Yi naani ka, du wa sio yi oshirẹsụ irajẹ ọnọ." Dẹ kaa na yọọ. ⁹ Oshirẹsụ ọgisa ọnọ mee fụ enyi ana vara tụ ni eche. Ọ zi yẹ izi a siọ fụrẹ vẹ, (ama eziafụ ana denyi ọnọ ẹẹ yẹ). Ụmavọ dọ shi ọnọrụ ana si ọnee, ¹⁰ dọ kaa yọ ka, "Aza bo vana bidi si eche ene zoza fụ jinẹ vẹ, da va tangwa si anapọ jine ụmọnọ ọzọza si fụ kokoro, dọ mẹrẹ wa. Ama ẹwụ asi ozoza aani tẹ tụ mani." ¹¹ Ụkọrọ oshishozeyi ipaapa ọni Ijesu mẹ Ikana inẹtẹ Iganini yi, dọ zirengwụani sụga aani zụ, di eziafu̇ aani dọ ọ wụ. ¹² Inaama ọnọni, di Ijesu ọnri ọnyani, shi ẹnyara aani ọnri eziafụ aani nangwụ ini Ikapanọọmụ, na mẹ ẹkụshi chee izọ. ¹³ Ụmọni ụpe ọpiparafụ ani Ijuu nini me vee tụ, di Ijesu shirẹ ni Ijerụsanẹ̣mụ. ¹⁴ Do netụ ka osofụ nini aa nanụ ụnọọ, shi atẹmẹ ọnri obenekụkụ, shi ẹnẹna vara ẹkẹshi, ẹẹ yatụ tụ ineeshi Oshomoshi. ¹⁵ Di Ijesu si ̣ijampa ọnọ sị dụ ẹnbo jinẹ fini itẹmpụrụ, shi ụnọọ, shi atẹmẹ nin. Dọ vi itevụrụ ọnri ẹkẹshi anini gara. ¹⁶ Dọ kaa yi ẹnẹna aa na obenekụkụ nini ka, "Kụ isẹnẹni fi izọni. A sụ vari ireshi Ada mi tuni ofụ nini." ¹⁷ Di eziafụ aani tamayi ka, aa chẹrẹ tẹtẹ ka, "Ọshishẹngwụ sha mẹ isa yi ireshi awụ̣, ọnọ vaa wụ mi." ¹⁸ Ụmavọ di ọdọvidi ani Ijụụ nini fọ ọ ka, "Yere ọtẹrẹwa ọnụ va sii zụ yi, onụ wa si mẹ isa ẹnẹni?" ¹⁹ Di Ijesu voshi ka, "Wụ itẹmpụrụ ọnọni, ini ẹkụshi ẹẹta mva daa varama." ²⁰ Di ọdọvidi ani Ijụụ nini fọ ọ ka,"Itẹm-pụrụ ọnọni ana si irayi ẹbẹrẹva-rishinọnyi da, ọni ụwa ka kụ ve teni da, ini ẹkụshi ẹẹta?" ²¹ Ama, ẹngwụ aani ọnọ vi itẹmpụrụ ọnọ ka. ²² Ụmọni a shaa kẉẹtẹ fini isụ da, di eziafụ aani tamayi kọ bidi kaa tẹtẹ, dẹ isena aa chẹrẹ tụ ni iwe ọnini, shi irẹyi ọni Ijesu ka yụ wa. ²³ Ụmọnọ yi ini Ijerụsanẹmụ ini ụpe opiparafụ, aza ẹrụrụ ẹ nyi ọdọwụ ini iresha aani, eme ree ọtẹrẹwa ọnọ mẹ. ²⁴ Ama Ijesu ọ zi vẹngwụ sha yụ wạ, fụvọki ọọ yẹ wa bo. ²⁵ Ọ zi nyi ka ọza ọ savọ zẹ na karẹyi ọza yọ, fụvọka ọọ yẹ isẹnẹ yi inine ọza.