¹ Ijesu mẹ karẹyi ẹnẹni da, di ọnri eziafu aani jinẹ ni akẹnẹ osụsụụ Ikidirọni, dẹ ngwụ ụbazi ọnyi ana yi izọ na. ² Ijudasi ana si Ijesu chire ọnivi nini uvọ, ọọ yẹ izọ fụvọki Ijesu bidi ni izọ bẹri eziafụ aani. ³ Di Ijudasi kụ ashoja ọnri ọga ashoja ẹnyi fidi arụfa ọbani ọnri Ifarisi ninị, dẹ kụ irakọpa ọnri itọọchi, shi enyarẹkụ, dẹ ni izọ. ⁴ Ijesu mẹ yẹ irẹyi ene vee tụ ọni. Dọ kava nọvidi ne tu wa, dọ fọ wa ka, "Ẹnụ wee si nini?" ⁵ Dẹ voshi ka, "Ijesu ani Inazarẹti." Di Ijesu kaa yụ wa ka "Ẹmi yọọ," Ijudasi anaa va si ọ chire wa ụvọ ọ dinẹ pe wa. ⁶ Ijesu mẹ tụoshi kẹnẹ kaa, "Ẹmi yọ ọ," dẹ kava naama, dẹ sẹdụ nyẹtẹ. ⁷ Dọ zẹ teni fọ wa ka, "Ẹnụ wee si nini kẹ?" Dẹ tụoshi ka, "Ijesu ani Inazarẹti." ⁸ Di Ijesu voshi ka, "Ma kaa yụ wụ nini ka ẹmi yi. Ọmẹvi ka ẹmi ọnụ wee si nini aavọ, navọ di aza ẹnẹni ẹẹ na. ⁹ Ọnọni ọọ mẹ doti irẹyi ọnọ ka, ọ maa tụozụrenụ ka, "Me zi vụ ọnyọnyi ini aza ẹnụ kụ yi mi." ¹⁰ Ụmavọ, di Isaimọni Ipita tụ itakovi dọ si ọ ji ụtọ ụvọọri, Imakọọsi ozida arụfa ọbani. ¹¹ Di Ijesu kaa yi Ipita kaa "Vi itakovi awụ rama tụni apara aani." Ụ wa ki asi mfu ini ipa ana Adami si yi mi?" ¹² Di ashoja ẹnẹ ọnri ọdọvidi anini, shi ọga aani Ijuu nini dẹ zi Ijesu dẹ sụọ. ¹³ Dẹ bidi si ọ ni idi Anaasi, ana vi anda ose Ikayafaasi. Ọza ọnọni ọnọ vi arụfa ọbani ireshi Oshomoshi irayi ọnọ. ¹⁴ Ikayafaasi ọnọ si ụmọ yi ani Ijuu nini ka, o vee zoza ozenya ree su yi aza bo. ¹⁵ Di Isaimọni Ipita ọ vatụra Ijesu vabẹri oziafụ aani ọsa. Arụfa ọbani ọọ yẹ oziafụ ọfụva ọnọni. Oziafụ ọnọ vatụra Ijesu na ngwụ ofenje arụfa ọbani ọnọọ. ¹⁶ Ama, Ipita ọni vana dinẹ tụ inoze inẹshẹ shẹ. Di oziafụ ọsa ọnọ, ọni arụfa ọbani yẹ jinẹ na karẹyi shi ozi ọnyẹnẹẹ ene sere oze, dẹ si Ipita ngwụ ireshi. ¹⁷ Di ozi ọnyẹnẹẹ ọnọni fọ Ipita ka, "Aivi ọnya ọnụ vi ini eziafụ Ijesu?" Di Ipita ka, "Eiye, mazi bẹ." ¹⁸ Ezida arụfa ọbani ọnri oserẹtẹ itẹmpụrụ nini ẹ kaira aremi, de ẹ waira fụvọki ashi aa za inẹfi ọnọ, di Ipita ọni zẹ dinẹ pe wa aa waira. ¹⁹ Di arụfa ọbani ọnọ aa fi Ijesu isue inọpati eziafụ aani, ọnri ka isẹnọ zụ wa. ²⁰ Di Ijesu tụoshi ka, "Ineyi gede ọnim ya karẹyi yi anẹshẹ. Di maa zu aza ini isinagọọgụ, shi ini itẹmpụrụ inẹfi bo ọnri izi aza peregụ tụ. Ọzi nyi isi mi ka inangwụmi. ²¹ Ọmẹzi dụ wa fo ̣mi kẹ? Fọ aza ana wụ irẹyi ọnim ka yụ wa." Ree, azẹnẹni ẹ wụ isa ọnim ka. ²² Ijesu mẹ maan tụoshi da, di oserẹtẹ ọnya ana dinẹ pe Ijesu nya arifẹ, dọ ka, "Avọ ụmẹ wa voshi yi arụfa ọbani." ²³ Di Ijesu tụoshi ka, "Maa ka ọna zi gẹ, divenụ aani nini, Ama aavi irẹiza ọni ma ka, sụ va nya mi arifẹ tụ?" ²⁴ Di Anaasi ki ẹ si Ijesu netụ arụfa ọbani Ikayafaasi, a mẹ sụọ da. ²⁵ Isaimọni Ipita ọọ dinẹ dọ waira izọ. Di aza fọ Ipita ka, "Aivi ọnya ini eziafụ aani ọnụ vi?" Di Ipita yi, dọ ka, "Ma zi bẹ tụọ." ²⁶ Di ozida arụfa ọbani ọnyi ana vi anda ẹzẹni Ipita dụtọ aani kaa, ime re zi ree ẹwu riọ ini ụbazi?" ²⁷ Di Ipita ze yi, ki aivi ọni. Inafụnọ di ụkọkọrọ nowụ. ²⁸ Di ashoja ẹnẹ si Ijesu inọnẹnẹ viri-viri fidi Ikayafaasi na ngwụ idi Igomina ani Iromụ nini. Ani Ijụụ ẹẹ zi ngwụ ini ofenje ireshi ijọva, fụvọka sẹ nyi ẹvụụvụ, doti ee roze ri isari ụpe-ọpiparafụ. ²⁹ Fụvavọ, di Ipairẹti jinẹ ve tu wa, dọ fọ wa ka, "Sẹnẹvẹ vi ivi ọnụ wa si para ọzọnọni kẹ"? ³⁰ Dẹ tụoshi ka, "Ọzọnọni raa zi yaan vọzọ ọshimi, ya zi yaan za ve tụ wụ nin." ³¹ Di Ipairẹti ka, "Si ọ na, dụ wa na mi ishọji yọ ini oze ụmọ awụ nini." Di ani Ijuu ẹnẹ ka,"Ya zi nyi ụkata ọmimẹ ishọji isụ yi ọzọnyọnyi." ³² Ẹẹ maan ka doti irẹyi ọni Ijesu si zụ inọpati oze ọnọ va zi su, ọ zụ gẹ. ³³ Ẹfiavọ, di Ipairẹti zẹ varama ngwụ ini ivishẹ aani, dọ shi Ijesu, dọ fọ ọ ka, "Ẹwa vi oshinọyi ani Ijụụ?" ³⁴ Di Ijesu tụoshi ka, "Ụwa karẹyi ọnọ yẹngwụ awụ, navẹki aza ẹẹ karẹyi ami yi wụ?" ³⁵ Di Ipairẹti voshi ka, "Ma zi vi ani Ijụụ, navẹki ani Ijuu ni ni ọnụ wa vi? Aza awụ ọnri arụfa ọbani nini ẹ za wụ va mi, sụ mẹ?" ³⁶ Di Ijesu tụoshi ka, Ijọva ami ọzi vi ayi ẹshẹ ọnọni. Ijọva ami ra yaan vi ẹshẹ ọnọni, ụmavọ, di ezida ami yaan vụrẹvụ, di aa zi yaan si mi chire ani ijuu nini ụvọ. Ama, ijọva ami ọzi fụri izọni vẹ." ³⁷ Di Ipairẹti fọ ọ ka, "Oshinọyi ọnụ wa vi." Di Ijesu voshi ka, Irẹiza ụ ka ki oshinọyi mvi. Isẹna ma mi vẹshẹ tụ yi, ki ma divenụ irẹiza. Ẹzẹna vi ọni rẹiza, va si utọ tụni irẹyi ami." ³⁸ Di Ipairẹti fọ ọ ka, "Sẹnẹvi Irẹiza"? Ọ mẹ maan fọ ọ da, dọ zẹ jinẹ ne tụ ani Ijuu nini, dọ kaa yụ wa ka,"Me zi re ivi fini ụvọ ọzọnọni." ³⁹ Ama, ọ mẹ vi ki, ini isa oshẹtẹ awụ nini, ọvọrọ ki ma fụrẹ ani ijaarụ ọnya ụvọ yụ wụ nin ini ụpe ọpiparafụ; "Ụ wee ve si ki ma fụrẹ oshinọyi ani Ijuu ụvọ yụ wụ nini?" ⁴⁰ De ze nowụ ka, "Eeye, aivi ọzọnọni, ama Ibarabaasi." Ibarabaasi anạ vi oyi, dọ daaji ọza.