¹ Inaani, di Ipairẹti za Ijesu, dọ nya a ijampa. ² Di ashoja ẹnẹ si ọchi ikeyi mẹ okurẹsụ oshinọyi. Ee kụ Ijesu yọ, de chire e auru angẹrẹ. ³ De e tụo, dẹ ka, "Maa kụ wee, Oshinọyi Ijuu nini," dẹẹ nya a isạ. ⁴ Di Ipairẹti zẹ jinẹ na kaa yi Ijuu ẹnẹ ka, "Maa si ọọ jinẹ vaa yụ wụ nini, dụ wa yẹ ki me zi re ivi inẹngwụ aani." ⁵ Di Ijesu jinẹ vẹ, ọnri auru angẹrẹ oshinọyi ono chire, shi okụrẹsụ ikeyi ikeyi oshinọyi ene kụ o. Di Ipairẹti ka yụ wa ka,"Ree, ọza ọnọ yi. ⁶ Arụfa ọbani ẹnẹ ọnri ọnụkọrọ itẹmpụrụ me re Ijesu, dee nowụ kaa, "A kani ọ zọchi, a kani ọ zọchi." Di Ipairẹti kaa yụ wa ka, "Si ọ wana kani ọ zọchi yẹngwụ awu nini, fụvọki me zi re ivi inẹngwụ aani." ⁷ Di Ijuu ene tụoshi ka, "Yaa nyi ofi, venebiri ofi ọnọ mẹ kaa, o vee sụ fụvọka ọọ ka ki Ozi Oshomoshi ọnọni vi." ⁸ Ipairẹti mẹ wụ irẹyi ọnọni, di angwa sho tụọ. ⁹ dọ zẹ varama ngwụ ireshi na fọ Ijesu ka, "Izụ fụrẹ vẹ?" Ama ọ zi tụoshi. ¹⁰ Efiavọ, di Ipairẹti fọ Ijesu ka, "Wa zi tụ mi oshi? Ụ wa yẹ ki maa nyi ụkata ọfifụrẹ wụ ụvọ, dim zẹ nyi ụkata ọkikani wụ zọchi. ¹¹ Di Ijesu tụoshi ka, "Wa zi nyi ụkata ọnyọnyi tụra mi para ọni Oshomoshi ra si wụ fụrẹ ẹbẹẹba. Fụvavọ, ẹzẹna si mi chire wụ ụvọ, ọnọ nyi aichama fu. ¹² Inaama ọni Ijesu maan voshi da, di Ipairẹti ee si oze ka ọnọ fụrẹ ẹ ụvọ, ama di Ijuu nini ee nowụ ka, "Aaviki waa fụrẹ ọzọnọni ụvọ, wai ku zu vi ọta Isiza. Ọzẹna ra si ẹngwụ aani mẹ oshinọyi vana kaa chire Isiza." ¹³ Ipairẹti mẹ wụ irẹyi ẹnẹni, dọ si Ijesu jinẹ vẹ, dọ va yatụ tụni ụdi ishọji aani, anaa shi Ogede Irẹta."Igabata" ọni ani Ihibụrụ nini shiọ. ¹⁴ Ụmotu, inọpati iwakati ishinọnyi, ọni ẹfi vi, ini ẹkụshi ọni Ijụụ nini si teni ẹngwụ tẹtẹ yi ụpe ọpiparafu. Di Ipaireti kaa yi Ijuu nini ka, "Re, Oshinọyi awụ nin yi." ¹⁵ Dẹ si ọngwe tụẹba ka, "Siọ fi izọni, siọ fi izọni, aa kani ọ zọchi!" Di Ipaireti fọ wa ka, Maa kani Oshinọyi awu nini zọchi?" Di Arụfa ọbani ka, "Yazi nyi oshinọyi ọsa ọchishi Isiza." ¹⁶ Ụmavọ, di Ipairẹti si Ijesu yụ wa, ka na kani ọ zọchi. ¹⁷ Dẹ si Ijesu jinẹ, do chema ọchi-avashi ọnọ yengwụ aani, dẹ si ufufu aa ni izẹna shi, "Irasha Ọchụkụ Irẹsu." anavi "Igọgọta" ini irẹkụra Ihibụrụ. ¹⁸ Ẹẹ kani Ijesu za ọchi-avashi, bẹrẹ azẹnẹ ẹẹva ọsa izọ, dẹ si Ijesu tụ ni akaakana azẹnẹ viva ẹnẹ. ¹⁹ Ipairẹti ọọ chẹri isa, dọ siọ gẹ ẹbẹẹba ọchi-avashi ọni Ijesu ya. Ọọ chẹrẹ ẹ ka, "IJESU ANI INAZARẸTI, OSHINỌYI IJUU NINI." ²⁰ Di Ijuu ẹrụrụ ee ree, dẹ kaa fụvọki, ọgụrẹ iboro irẹkụra ọna kani Ijesu zọchi-avashi tụ. Irẹkụra Ihibụrụ ọnri Iratini shi Igiriki ana si chẹrẹ isa ọnọni. ²¹ Di arụfa ọbani nini kaa yi Ipairẹti ka, "Varaa fini 'Oshinọyi Ijuu nini', da chẹrẹ ka, Ọza ọnọni ka, 'Ẹ ma vi Oshinọyi Ijuu nini.'"" ²² Di Ipairẹti tụoshi ka, "Isim chẹrẹ, ma chẹrẹ ẹ da." ²³ Ashoja ẹnẹ mẹ kani Ijesu zọchi-avashi da, dẹ ga auru aani tụ oze ẹẹna, di ishoja ọnyọnya si aka ọnyọnya ini ita ẹnẹ. Dẹ zẹ si ọtụnẹ aani. Ama, ọtụnẹ aani vana vọọ vi ita ọnya, ọzi nyi iza ya gẹẹ. ²⁴ Dẹ kaa yẹ ẹngwu ka, "Asi naa, ama a navọ di ya ji pẹpẹmpẹ tụọ, di ya yẹ ẹzẹna raa vaa siọ." Ọnọni ọọ mẹ fụvọ di irẹ̣yi ana chẹrẹ tẹtẹ tụ ni iwe ọnini ọ ge ka: Ẹẹ ga auru ami shi ẹngwụ ụvọ. Dẹ ji pẹpẹmpẹ tụra ọtụnẹ ami." Isẹni ashoja ẹnẹ mẹ vọnọ. ²⁵ Di ọnyi Ijesu shi ọọnyara aani, ọnri Imeri ose Ikirọpasi shi Imeri Imagdarini, ẹẹ dinẹ pe ọchi-avashi ana kani Ijesu za. ²⁶ Ijesu me re ọnya aani ọnri oziafụ o ne sirẹyi aani, ka ẹ dinẹ gụrẹ ẹngwụ, dọ kaa yi ọnya aani ka, "Ẹwụ Ọnyẹnẹ re ozi awụ." ²⁷ Dọ kaa yi oziafụ ọnọ ka, "Re ọnyi awụ!" Fụrẹ ẹfiavọ, di oziafụ ọnọ siọ neeshi. ²⁸ Inaama ọnọni, di Ijesu ka,"Onyi aa kụ mi." doti isa a chẹrẹ tụ ni iwe ọnini ọ zụ gẹ, fụvọki ọọ yẹ ka isẹni aa tụ ọni va mẹ, ọọ mẹ bo da. ²⁹ Aa si ipa eche ana nyirẹyi tu izọ. Dẹ si ikanka, dẹ jọ ọ ngwu eche ọnọ, dẹ va ka ngwụ ọchi, dẹ tana shi Ijesu irenụ ko fụo. ³⁰ Ijesu mẹ di eche ana nyirẹyi ọnọ da, dọ kaa, "Ọ ta mẹ." Oo nyimarẹsụ, dọ zifẹri, do sụ. ³¹ Di Ijuu nini kaa yi Ipairẹti ka, o che wa afụ doti a kụ wa fi izọ ọmẹvi ka ọkụshi ẹngwu otiteni yọ, fụvọ doti asi oku anini gẹ ọchi-avashi ini ọkụshi Isabaati (Ọkụshi Isabaati vi ọkụshi eebebani yụ wa). ³² Di ashoja ẹnẹ vẹ, de che ọza ipaapa afụ, dẹ ze che ọza upọfụva afụ, ẹnẹ viva ana sụ zọchi pe Ijesu. ³³ Eme ve tụ Ijesu de ree ka oo sụ da, fụvavọ e zi che afụ. ³⁴ Ama, di ọnya ini ashoja ẹnẹ si ọbọdọ aani, dọ jọ ọ ngwụ Ijesu akamava. Ụmụmọ, di anya ọnri enyi ka jinẹ va shitẹ. ³⁵ Ẹzẹni isọnọni vi eyi aani, de ree, ẹnẹ divenụ irẹyi ọnọ, iveenu aani vi irẹiza. Ọọ yẹ ka irẹyi ọnọn ka vi irẹiza, dụ wa zụ dọ wụ nini. ³⁶ Ẹnẹni bo vana mẹ ka a si isẹna chẹrẹ tụ ni iwe ọnini ọ gẹ, ka,"Ọchụkụ aani ọnyọnyi ọzaa chaka." ³⁷ Zẹtuọ, aa chẹrẹ ẹ tụ irasha ọsa ka, "E vee re ọza ana ji ọbọdọ ngwụ." ³⁸ Inaama isẹnẹni, di Ijosẹfụ ani Arimatiya, oziafụ Ijesu ọnya (ana si ẹngwụ tẹ fụvọ angwashi Ijuu) nini, na fọ Ipairẹti ka ọ wa vaa zụ si oku Ijesu yi ọni. Di Ipairẹti zẹẹ yọ ka, ọ na si ọ. Inaani, di Ijosẹfụ va si oku Ijesu fi izọ. ³⁹ Di Inikodemọsi ana vidi bebe ve tụ Ijesu inaafụ, ọnọ zẹ vi vẹ. Dọ si etụrari ọni ụrata aani vi ẹfi ampo anọ ẹẹva, ana si Imaya ọnri Arosi mẹ. ⁴⁰ Dẹ si Ijesu, dẹ si ita ọvụọvụ ọnri etụrari ọnọ chire Ijesu okụma, venebiri ani Ijuu mẹẹ mẹ. ⁴¹ Ụbazi ọnyi yi iza ya kani ọ zọchi-avashi, dọ nyi irikụta ọnọvi ka azẹi ni ne ọza tụ. ⁴² Fụvọki ọkụshi otiteni ẹngwu, ọnọvi yi ani Ijuu, irikụta ọnọ ọ gụrẹ wa, de ne Ijesu tụ zọ.