¹ "Ẹma vi ọchi ivaini obooro, di Ada mi vi osieyi-pe ụbazi. ² Avọ-ọchi ana raa zi tụ ẹtụtụ bo ini ẹngwụ ami, vana vaa daa neta, de teni avọ-ọchi anaa raa tụ ẹtụtụ, ka o teni tụ ẹtụtụ tụọ. ³ Waa nii nini da, fụvi irẹyi ọnim ka yụ wụ. ⁴ Yi ininẹ ami, dẹ ma zẹ yi ininẹ awụ nini. Venebiri avọ-ọchi mẹ ṛai zụa tu ẹtụtụ yi ẹngwụ aani aa daa fini ọchi, avọọ u mẹ rại zụa tụ ẹtụtụ wa zi yi ininẹ ami nini. ⁵ Ẹma vi ọchi ivaini, dụ vi avọ-ọchi nin. Ẹzẹna raa yi ininẹ ami, dim yi ininẹ aani, ọnọ vaa tụ ẹtụtụ kokoro. Ọzi nyi isi ụ vaa zụ mẹ maa zi ya bẹrẹ ụ nini. ⁶ Ọnyi ọza ana raa zi yi ininẹ ami, e vee neta, vene avọ-ọchi dọ wẹngwani, de pere wa, nee wa ngwu ini ira, dẹ rira vaa sha. ⁷ Waa yi ininẹ ami, di irẹyi ami yi ininẹ awụ, fisụe isa ọnụ ree si, a vaa mẹ yụ wụ. ⁸ Ụga ọnọvi yi Ada mi, kụ waa tụ ẹtụtụ kokoro, dụ siọ zụ ka, eziafụ ami ọnụ vi nini. ⁹ Mee sirẹyi awụ nini vene Ada mi me sirẹyi ami. Dinẹ tụ ni osisi ami nini. ¹⁰ Waa vatụra ụmọ ami, ụ vaa yini osisi ọnim nyi yụ wụ nini, vene mme vatura umo Ada mi, dim dinẹ tu ni osisi aani. ¹¹ Maa karẹyi ẹnẹni yụ wụ, doti ụjẹ ami ọ yi ininẹ awụ, doti ụjẹ awụ o roze gụ. ¹² Ọnọni ọọ vi ụmọ ami, kụ we sirẹyi ẹngwụ vene mmẹ mẹ sirẹyi awụ nini. ¹³ Ọzi nyi ọza ana nyi osisi, ene fụni ọnọni ka, ọza ọ si ẹshẹ ẹngwu aani tẹtẹ yi ọta aani. ¹⁴ Ọta mi ọnụ vi, waa mi isa ọnim si ụmọ ka yụ wụ nini. ¹⁵ Mẹikụ shụ wụ nin ozida, fụvọka ozida ọ ma yẹ isọga aani aa mẹ. Maa shụ wụ nini ọta mi, fụvọki isa bo ọnim wụ fidi Ada mi, ọnim kụ wa yẹ nin. ¹⁶ Aivi ẹwụ nini ọ nii mi, ama ẹmi a nii wụ nini, dụ wa zụ na tụ ẹtụtụ, di ẹtụtụ awụ ọ yi naani, ọ maan ya, fụvọki isatụrisa ọnụ ree fisụe fi inụvọ Adaa ini irẹsha mi, ọ vaa siọ yụ wụ nini. ¹⁷ Ụmọ ọni mi si yụ wụ yi, ki, we sirẹyi ẹngwụ nini. ¹⁸ Ẹshẹ raa kụayi awụ nini, yẹ ka ẹẹ bidi kụayi ami dẹ tangwa va kụayi awụ nini. ¹⁹ Wa yaan vi ayi ẹshẹ, ẹshẹ yaan sirẹyi awụ venebiri ayani. Ama fụvọki maa tụ wụ fi inẹshẹ dụ raikụ vi ayi ẹshẹ, ọni ẹshẹ aa sii kụayi awụ. ²⁰ Tamayi ki ma kaa yụ wụ nini ka: 'Ozida ọzi bani fụna ọga aani.' Ooviki ẹ bidi mụya ri mi, ẹzẹ va mi mụya rụ wụ. E ̣dọ irẹyi ami wụ, ẹ vaa dọ irẹyi awụ wụ. ²¹ Ẹ vaa mẹ isa ẹnẹni bo shi wụ fụvi irẹsha ami, fụvọka, ẹ zi yẹ ẹzẹna tụ mi. ²² Ọọ yaan vi ki mazi vaa karẹyi yụ wa, ẹ zi yaan nyi ivi, ama ọmẹyani e ze ree kụ. ²³ Ọza ana raa kụayi ami, vana zẹ kị kụayi Ada mi. ²⁴ Aaviki mazi yaan mi mụkọrọ ẹrụrụ ọnọvi ka ọzẹnẹsa ọ zi mimẹ inakaakana anini, ẹ zi yaan nyi aichama; ama ee re ụkọrọ ẹnẹẹ, tụavọ-tụavọ dẹ kụayi ami ọnri Ada mi. ²⁵ Ama ọnọni vana mẹ ka, di irẹyi ana chẹrẹ ini ofi anini ọ sẹ, ẹẹ kụayi ami tụ ni osụsụ. ²⁶ Ụmọni ofufu-ọza ọnọ, ọni mva tụ shụ wụ fidi Adami ra vẹ; ana vi ifẹ irẹiza fidi Adaa, ọ vaa mi iveenụ inọpati ami. ²⁷ Ẹwụ nini ọ zaa di divenụ ami, fuvọka waa ya pe mi nini fi ini ivẹrẹ