¹ "Asi ụ zẹ ka ọtụtụrụma awụ o sheni. Di Oshomoshi wụ, dụ wa zẹ di dọ mi wụ bẹrẹ. ² Ini ineeshi Ada mi, irẹngwụ erụrụ ọnọ yi naani. Ọọ zi yaan vi avọ, mi yaan kaa yụ wụ nini. ³ Fụvọki mee ne teni irasha tẹtẹ yụ wụ da, mva varama vẹ vaa dọ wụ nin pẹngwụ, dọ vi ka, izi mi raa ya, ọni ẹwụ nini zẹ vaa ya. ⁴ Waa yoze nangwu izẹni maa nọ nini". ⁵ Di Itọmọsi kaa yi Ijesu ka, "Ananyiyi, ya zi yẹ izẹni waa nọ, imẹmẹ vaa yẹ oze ọnọ". ⁶ Di Ijesu kaa yọ ka, "Ẹma vi oze, dim vi irẹiza ọnri ẹshẹ; ọ zi nyi ẹzẹna ra vaa vị idi Adaa, ọọ zi vi zirẹngwụ ami. ⁷ Waa yaan yẹ mi, ụ yaan zẹ yi yẹ Ada mi. Fụri ụmaani vaa na, waa yẹ ẹ nin, dụ ze ri ree nini da." ⁸ Di Ifinipi kaa yi Ijesu ka, "Ananyiyi, si Adaa zụ yi, ọnọ vaa fụyị." ⁹ Di Ijesu tụ Ifinipi oshi ka, "Wa zi yi yẹ mi ini ẹfi ọnim fụrẹ ya pe wu nini? Ọzatụrọza ene ze ree mi, oo re Adaa da. Ụ mẹ zụ si ka ki, a si 'Adaa zụ yi ke?" ¹⁰ Wazi dọ wụ, ka mi yi inịnẹ Adaa, di Adaa yi ininẹ ami? Irẹyi ọni maa kaa yụ wụ nini, ọ zi fi ini aaro ami vẹ, ama Adaa ana ra ininẹ ami ọ naa mụkọrọ aani. ¹¹ Dọ mi wụ, ka mi yi ininẹ Adaa, di Adaa yi inịnẹ ami, navẹki wa dọ mi wụ fụvọ ụkọrọ ẹnẹ nyẹmbẹ. ¹² Irẹiza ma kaa yụ wụ nini, ẹzẹna raa dọ mi wụ, vaa mụkọrọ ọnim mẹ, di ọọ vana zẹ mẹ fụna avọọ, fụvọki maa ni idi Adaa. ¹³ Isatụrisa ọ nu ree fisụe ini irẹsha ami nini mva mẹẹ, doti a zụ si ụga yi Adaa ini ozi aani. ¹⁴ Wee fisụe isọnsọnyi ini irẹsha ami, mva mẹ ẹ.' ¹⁵ Wee sirẹyi ami, ụ va vatụra ụụmọ ami. ¹⁶ Mva tụozụrenụ shi Adaa ka, ọ tụ ofufu-ọza shi ụ nini, dọ ọ tụ ofụfụ-ọza ọsa ana vaa yaa pe wụ nini poro-pooro, ¹⁷ Ifẹ ọi irẹiza. Ẹshẹ ọi zụa dọọ wụ fụvọka ẹ zi yẹ, ọi ze ri ree. Ama ẹwụ nini ọọ yẹ ẹ fụvọka ọ ra pe wụ nini, ọnri ka ọ vaa ininẹ awụ nini.' ¹⁸ Maa zaa navọ ụ nin renya. Mva varama vee tụụ nini. ¹⁹ Ini ẹfi keere tụọ, anẹshẹ eikụ e re mi, ama ẹwụ nini ve rii re mi. Fụvọka mi yẹshẹ, ụ vaa me eshe nini. ²⁰ Ini ishọnọ, ụ va yẹ ka mi yi ininẹ Adaa, di ẹwụ nin zẹ yi ininẹ ami, ọnri ki ẹmi yi ininẹ wụ. ²¹ Ẹzẹna yẹ ụmọ ami, dẹ vatụraa, ẹnẹ ̣vi azẹnẹ sirẹyi ami. "Ada mi vee sirẹyi ẹzẹne ree sirẹyi ami, di ẹmi nyẹmbẹ sirẹyi aani, dim sẹngwụ zụọ. ²² "Di Ijụdasi (ana ra zi vi Isikariyọti), dọ fi Ijesu ka, "Ananyiyi, sẹnẹvẹ dọvika ẹyi kẹnẹ ọnụ vaa sẹngwụ zụ, dụ raa zaa sẹngwụ zụ ẹshẹ bo?" ²³ Di Ijesu voshị, dọ kaa yọ ka, "Azẹne ree sirẹyi ami, vaa sụvọ zarẹyi ami. Ada mi vee sirẹyi aani, di ẹmi ri Ada mi gẹ vaa ra pee. ²⁴ Azẹne ree zi sirẹyi ami, ọ zaa sụvọ zarẹyi ami. Irẹyi ọnu waa wụ nini, vana fidi Adaa ana tụ mi vẹ, aivi fini ụvọ ami. ²⁵ Maa bidi karẹyi ẹnẹni yụ wụ mmẹ ya pe wụ nini. ²⁶ Fụvavọ, ofụfụ-ọza ọnọọ, ana vi Ifẹ Ọnini ọni Adaa vaa tụ vẹ ini irẹsha ami vaa zụụ nini isa bo, dọ zẹ tama wụ ayi nin, isa ọnim bidi ka yụ wụ nini. ²⁷ Maa si ẹngwọrọ yụ wụ nini. Ẹngwọrọ ami ọnim si yụ wụ nini. Ọ zi vi ẹshẹ mẹ siọ yi ọza ọnim siọ yụ wụ nini. Asi ụ navọ ka ọtụtụrụ-ma awụ nini o sheni. Asi angwa zẹ shụ ụ nini. ²⁸ Waa wụ ki ma kaa yụ wụ nini ka, 'Maa na, dim za vi varama ve tụ ụ nini.' Wee sirẹyi ami ụ yaan jụjẹ nini, fụvọki maa ni idi Adaa, Adaa ọna bani fụna ami. ²⁹ Ọmẹyani ma kaa yụ wu ̣nin da, doti ọ tangwa va mẹ fụvọ du wa zụ nyi ọdọwụ ụmọnọ raa si mẹ. ³⁰ Maizụ kụe pe wụ nini karẹ̣yi, fụvọka oshinọyi ẹshẹ ọnọni ọọ vẹ. Ọ zi nyi ụkata tụra mi. Ama fụvọ doti ẹshẹ ọ yẹ ka mee sirẹyi Adaa, ³¹ ụmọ ọni Adaa si yi mi ọni maa mẹ. Waa vẹ di yaa fi izọni nini."