¹ Dọ tangwa va nyi ka vaa ri Ụpe Ọpiparafụ. Ijesu ọ yẹ kẹfi o tụ da ọnọni va fụrẹ ẹshẹ ụvo varama ni idi Adaa. Oo sirẹyi ẹnẹna vi ayi aani ana yi inẹshẹ. Do sirẹyi anini ne tu ẹtẹ, ² Ụmavọ, eshụ ọ ngwụ Ijụdasi ọtụtụrụma ana shi Isikariyọti, ozi Isaimọ̣ni kọ si Ijesu chire wa ụvọ. ³ Ijesu ọọ yẹ ka Ada aani, ọ kụ isa bo chire ọni ụvọ da, dọ zẹ yi yẹ ka idi Oshomoshi ọnọni fụre, ọni za vi varama ni idi Oshomo-shi, ⁴ Di Ijesu kwẹtẹ fini isari, dọ tụ aụrụ ono chire tụra, do si vi ọtụnẹ aụrụ. Dọ si itawẹẹni kara ọtẹ. ⁵ Do kenyi tụni ipaanụ, dọ vẹrẹ aa nyina eziafụ aani afụ, dọ si itawẹẹni ọṇo si kara ọtẹ aavọ ee nyee wa ụfụ. ⁶ Ome tụ idi Isaimọni Ipita, di Ipita fọ ọ ka, "Ananyiyi, Ụ wa vaa nyina afụ ami?" ⁷ Di Ijesu tụoshi ka, "Isi maa mẹ, o zee ye wụ ọmẹyani, ama o ve ye ụmoree tụ." ⁸ Di Ipita ka, "Wa zaa nyina afụ ami." Di Ijesu kaa yọ ka, "Maa zi nyina afụ awụ, ọzi nyi isẹm ri ẹwụ kụ nyi vabẹ." ⁹ Di Isaimọni Ipita kaa yọ ka, "Ananyiyi, aivi afụ ami kẹnẹ ọnu vaa nyina, ama ụ vaa zẹ nyi nyina avọ shi irẹsụ amị." ¹⁰ Di Ijesu kaa yọ ka, "Ọza a fụ enyi da, ọikụ zẹ nyi ka ọ varama na fụ enyi, ọchishi ka ọ nyina afụ aani kẹnẹ. Ẹngwụ aani ọ ni da. Waa nii nin da, ama aivi ẹwụ nini bo." ¹¹ (Ijesu ọọ yẹ ẹzẹna vaa si ọni chire ọnivinin ụvọ. Fụvavọ ọnọ si ka ki, "Aivi ẹwụ nini bo ọnọni.") ¹² Ijesu mẹ nyina wa afụ da, do chire aụrụ aani varama da, ọọ yatu, dọ fọ wa ka, "Ụwa yẹ isi ma mẹ yụ wu nini? ¹³ Waa shi mi 'Ọzụọzisa' ọnri 'Ananyiyi' irẹiza ̣ọnụ ka nini, isi mi vi vọnọọ. ¹⁴ Ọọ va vi ka, ẹmi Ananyiyi ọnri ọzụọzisa ọọ nyina ụfụ awu nini, ọ vọrọ ka ẹwụ nini ọ zẹẹ nyina ẹngwụ afụ. ¹⁵ Maa mẹ ọsisi zu wụ nini, fụvọ dẹ ẹwụ nini ọ zẹẹ mẹ veni mmẹ mẹ yụ wụ nini. ¹⁶ Ini rẹiza, maa kaa yụ wụ nini ka, ozida ọzi bani fụni oshi aani, ọnitu ọzi fụna ẹzẹna tụọ itụ. ¹⁷ Waa yẹ isẹnẹni, ọdabẹrẹ ọnọ vaa vi yụ wụ, waa mẹẹ nini. ¹⁸ Aivi ẹwụ nini bo maa karẹyi aani. Maa yẹ ẹnẹ ọnim ni da, ama isi aa chẹrẹ tụni iwe ọnini doti ọ zụ ge: 'Ẹzẹna ri isari ami, oo vareyi irazi kami, dọọ bafu ami.' ¹⁹ Maa karẹyi ọnọni tụọvidi yụ wụ nini, doti ọ tangwa va mẹ, ụmọ ra mẹẹ da, dụ wa zu dọ wụ ka, 'ẸMI YỌ. ²⁰ Irẹiza ma kaa yụ wụ nini ka, ẹzẹna raa dọ ọzatụrọza ọnim raa tụ, ọzọnọ ọ zẹ di dọ mi. "Ẹzẹna raa zẹ va dọ mi, ọọ dọ ẹzẹna tụ mi." ²¹ Ijesu mẹ si irẹyi ọnọni ka, di ọtụtụrụma aani ee sheni, dọ ka, "Irẹiza ọ vi ka ozenya awu nini vaa si mi chire ọnivi ụvọ." ²² Di eziafụ aani vareyi nee re ẹngwụ, de e roo ka, ẹni ọọ karẹyi aani kẹ. ²³ Ọnya ini eziafụ aani, ọni Ijesu sirẹyi aani kokoro, ọọ yatu gụrẹ ini itevụrụ isari. ²⁴ Di Isaimọni Ipita si ụvọ karẹyi yọ ka, "fọ kaa, ẹnọ karẹyi aanị.̣" ²⁵ Di oziafụ ọnọ sẹngwụ va zirẹ Ijesu, dọ fọ ọ ka, Ananyiyi, ẹnọ vi kẹ?" ²⁶ Di Ijesu ka, Ọza ọnim raa ji ivụrẹdi ngwụ enyi, dim si ọ yi, ọnọ vi ọza ọnọ." Umọnọ ji ivụrẹdi ngwụ enyi da, dọ si ọ yi Ijụdasi ozi Isaimọni ọnaa shi Isikariyọ̣ti. ²⁷ Ẹ mẹ ri isari ta da, di azeeshi ngwụọ inẹ. Di Ijesu kaa yi Ijụdasi ka, "Jantu mẹ isẹnụ raa va mẹ." ²⁸ Ọ zi nyi ẹzẹna yẹ isọ maan si ka yọ ini ẹnẹna yi ini itevụrụ pee, ²⁹ di azẹnyi ro ka Ijesu vana kaa yọ ka, "na shi isọ ana vọrọ ka shi fụvọ ụpe-ọpiparafụ, navẹki, ọ si isa na yi oniriwa nini, fụvọka ọni ọnọ za ampo ẹkẹshi. ³⁰ Ijụdasi mẹ di ivụrẹdi ọnọ da, dọ jantụ jinẹ ụmụmọ. Ọ umavọ irafụ o si tụ. ³¹ Ijụdasi mẹ na da, di Ijesu ka, "Ẹfi ootụ ka asi ụga yi Ozi Ọza, azẹ sụga yi Oshomoshi dụga ini ozi." ³² Oshomoshi vaa zirẹngwụ aani sụga yọ. Ọ va jantụ suga yọ. ³³ Ẹwụ nini ezi ami, maa yi ya pe wụ nini ini ẹfi che. Ụ vee si mi nini vene mmẹ kaa yi ani Ijuu nini ka, 'Wai zụa vẹ izi maa nọ nini.' Avọ mmẹ zaa ki ka yụ wụ nini. ³⁴ Maa si ụmọ ọwọwa yụ wụ nini ka, we sirẹyi ẹngwụ nini. Sirẹyi ẹngwụ nini venebiri mmẹ sirẹyi awụ nini. ³⁵ Wee sirẹyi ẹngwụ nini, ọzọọza vaa yẹ ka eziafụ ami ọnụ vi nini." ³⁶ Di Isaimọni Ipita fọ ọ ka, "Izi ụ waa nọ, Ananyiyi?" Di Ijesu ka, "Wai zụ aa vatụra mi ni izi ma nọ ọmẹyani, ama, Ụ vaa vatụra mi vẹ umoretụ." ³⁷ Di Ipita fọ ọ ka, "Ananyiyi, sẹnẹvẹ dim maizụa vatụra ụ ọmẹyani? "Mva si ẹshẹ ami tẹtẹ yụ wụ." ³⁸ Di Ijesu tụoshi ka, "Ụ wa vaa si ẹshẹ awu tẹtẹ yi mi? "Maa ka yụ wụ ini irẹiza ka, ụkọkọrọ ọi si e nowụ, dụ wa va tangwa ka ki wa zi yẹ mi."