¹ Ọ mẹ si vọ ẹkụshi ishinọnyi di upe ọpiparafụ oo tu, di Ijesu vẹ Ibẹtani izi Inazarọsi ọni Ijesu sha fini isu ya. ² Da mi isari yi Ijesu izọ. Imata aa ga isari, di Inazarọsi bẹ tụni ẹnẹna yatụ, ee pe Ijesu ri isari. ³ Di Imeri si ipanava etụrari ọkatarishi ọnya, dọ vaa shi Ijesu afụ, dọ va si ẹyi-rẹsụ aani e nyee Ijesu afụ. Di agu ọiza etụrari ọnọ shi ireshi bo. ⁴ Di Ijụdasi Isikariyọti, ọnya ini eziafụ aani ana vaa si Ijesu chire wa ụvọ ka, ⁵ "Sẹnẹvẹ da razi na etụrari ọnọni ọpati ampo ẹẹta, da yaan si ọ yi oniriwa nini?" ⁶ Ijụdasi vana maan ka kẹnẹ, ọzi viki o sirẹyi oniriwa nin, fụvọ dọ zụ roze yi fini ẹkẹshi ọnọ, fụvọki oyi ọnọ vi, di ampo ẹkẹshi zẹ yini uvo aani, doo yi ẹkẹshi fi inaani. ⁷ Di Ijesu tụoshi ka, "Navọ doti ọ mẹẹ tẹ ọkụshi ene ve sii ne mi. ⁸ Oniriwa nini vana yini akaakana awụ nini ẹfi bo. Ama, ẹma zaa yini akaakana awụ nini ẹfi bo.̣" ⁹ Iju ẹrụrụ ẹẹ wụ ka Ijesu yi izọ, dẹ vẹ ka ene ve zi ijesu ọnri Inazarọsi ọnọ sha fi ini isu. ¹⁰ Di arụfa ọbani ẹnẹ geyi ka ẹnẹ zẹ wụ Inazarọsi nyẹmbẹ; ¹¹ fụvọki, fụvọ Inazarọsi ọni ani Ijuu ẹrụrụ si varama fi ida anini na vatụra Ijesu. ¹² Ini ẹyinẹshẹ aani, di azọkọni vẹ ini upe ọnọ. Ẹfi ẹnẹ wụ ki Ijesu aa vẹ Ijerụsanẹmụ. ¹³ dẹ ji avi ụda na gẹrẹ ẹ, dẹẹ̣ ka, "Hosanna! Ẹdabẹrẹ ọnọvi yi ẹzẹna vẹ ini iresha Ananyiyi, ana vi Oshinọyi Isrẹni." ¹⁴ Ijesu o re ozi Ikẹtẹkẹtẹ ọnyi, dọ shirẹ ẹ, vene a mẹ chẹrẹ ẹ tẹtẹ ini iwe ọnini ka, ¹⁵ "A sụ shangwa, ẹwụ ozi ọnyẹnẹ Izayọni. Ree, Oshinọyi awụ nini, ọọ shirẹ ozi ikẹtẹkẹtẹ aa vẹ." ¹⁶ Isẹnẹni o zi yee eziafụ aani oshẹtẹ; ama ụmẹ asi Ijesu tụẹba da, dẹ vaa tamayi isa chẹrẹ tẹtẹ inọpati aani, ọnri isa aza mẹ shi o. ¹⁷ Di azọkọni ẹnẹ divenụ ka, ẹni yi izọ ọmẹ shi Inazarọsi fini irikụta, dọ sha a fini isụ. ¹⁸ Fụvọ irẹyi ọnọni ọni azẹrụrụ ọsa nini si jinẹ na gẹrẹ Ijesu, fụvọka ẹ wụ ka ọ mẹ ụkọrọ oshishozeyi ẹnẹni. ¹⁹ Di Ifarisi ka yi ẹngwụ anini kaa, "Re, ọzi nyi isẹnụ va zụụ mẹ nini. Ẹwụ nin o re ki ẹshẹ bo ọ vatụraa da." ²⁰ Ọ ọnyi ani Igiriki ẹnyi anaa shirẹ naa mẹ irafẹkẹ ini upe ọnọ. ²¹ Di azẹnẹni netu Ifiripi ana fụrẹ Ibẹtẹsayida, irẹkụra Iganini vẹ, dẹ ka, "Adamị, yee si ki ye re Ijesu. ²² Di Ifiripi na kaa yi Andụrụ, dẹ gẹzi na kaa yi Ijesu. ²³ Di Ijesu ka yụ wa ka, "Ẹfi o tụ ana vaa si sụga yi Ozi Ọza. ²⁴ Inirẹiza, inirẹiza, ma ka yụ wụ nini, ka ifinẹ aku raa zi javọ ngwụ inẹtẹ, do sụ, ma kaa dọ vọọ ya yi ẹngwụ aani; ama aaviki o sụ, dọ varama chi, dọ va nyi ẹtụtụ ọrụrụ. ²⁵ Ẹzẹne ree si irẹyi ẹshẹ aani vee vụ o; ama ẹnẹna raa zi mẹ ọni ẹchẹngwụ si inẹshẹ ọnọni, vaa si ẹshẹ aani tẹ poro-pooro. ²⁶ Aaviki ọnyi ẹzẹnaa fẹkẹ mi, ọ vatụra mi; ka izim raa ya, ọni ẹnẹna fẹkẹ mi zẹ va yii ya. Adaa vaa si ụbani yi ẹzẹna raa fẹkẹ mi. ²⁷ Ọmẹyani, ọtụtụrụma ami oo du. Si mvaa ka? Mmi vaa ka ki 'Adaa, dọ mi tụ fini ẹfi ọnọni?' Eeye, fụvọka isim fụvọ aani vẹ ẹshẹ yi. ²⁸ "Adaa, sụga yi irẹsha awu." Inaani di ọngwẹ ọnya fụrẹ ẹbẹẹba vẹ ka, "Maa vidi sụga yi irẹsha ami da, mi ze ve teni mẹ ẹ. ²⁹ Di azọkọni ana dinẹ wụ ọngwe ọnaa karutu. Di azẹnyi ka, "Angẹni ọọ karẹyi yọ." ³⁰ Di Ijesu voshi ka,"Ọngwẹ ọnọni ọzi vẹ fụvọ ami, ama, fụvọ awụ nini. ³¹ Ẹfi ishọji ẹshẹ ọnọni oo tu da Ọmẹyani: e vee ne oshinọyi ẹshẹ ọnọni jinẹ. ³² Ụmẹ a raa si mi tụẹẹba fi nẹshẹ da, mi vee tụra aza bo pe ẹngwụ ami." ³³ Irẹyi ọnọni vọnọ ka, doti aa siọ zụ ẹngwụ isụ ono vee su. ³⁴ Di azọkọni ẹnẹ tụoshi ka, "Yaa wụ fi ini iwe ofi ka Ikristi ọnọ vana vaa ya poro-pooro. Ụ mẹ va sii kaa ki, 'A vaa si Ozi Ọza tụẹba?' "Ẹnẹ vi Ozi Ọza ọnọ?" ³⁵ Di Ijesu kaa yụ wa ka, "Ẹtofei va yi inaani pe wụ nini ini ẹfi che. Waa zusẹ ini ẹfi ọni ẹtofei yi yi inaani, doti a si nangwụ ini oozi. Ẹzẹna zụsẹ ini oozi ọ ma yẹ izọnọ. ³⁶ Di ẹtofei ọnọ wụ nini, ọ mẹ yi ya pe wụ nini, dụ wa zụ vi ozi ẹtofei nini." Ijesu mẹ karẹyi ẹnẹni da, dọ fizọ, do ne vụ tẹ. ³⁷ Shọmẹ daka viki Ijesu ọ mụkọrọ oshishozeyi ọrụrụ inọvidi anini, ọzi nyi umọni ẹ si dọọ wụ, ³⁸ doti irẹyi ọni Aizaya ọkisẹ ka, ọ zụ gẹ ka: "Ananyiyi, ẹnẹ dọ irẹyi wụ kẹ. Ẹnụ si ụvọ ụkata Ananyiyi zụ kẹ?" ³⁹ Fụvọ irẹyi ọnọni, ẹizụ dọọ wụ, fụvọka Aizaya ọọ zẹ ki ka kaa, ⁴⁰ "Oo gụ wa eyi da, dọ zẹ mẹ ka ẹ nyi ọtụtụrụma ọkata, ọzivavọ, e ve zụụ retẹ, dẹ vana nyi ọyiyẹ, de rinẹ varama, dim dọ wa tu." ⁴¹ Aizaya ọ karẹyi ẹnẹni fụvọka, oo re ụga Ijesu, dọ karẹyi aani. ⁴² Tụavọ-tụavọ, ọdọvidi Ijụụ nini ọrụrụ ẹ dọ Ijesu wụ, ama fụvọki ee shangwa Ifarisi nini, ẹ zi siọ zụ, doti asẹ ne gụ wa, ki asẹ kụ vini Isinagọgụ. ⁴³ E sirẹyi ki ẹnẹ dọ ụga fini ụvọ aza, fụna ka ẹnẹ dọ ụga fini ụvọ Oshomoshi. ⁴⁴ Di Ijesu nowụ tụẹshẹ ka, "Ẹzẹna raa dọ mi wụ vana zẹ di dọ ẹzẹna tụ mi wụ, aivi ẹmi renya ọni dọ wụ." ⁴⁵ Ezene ree mi, oo ze rire ẹzẹna tụ mi vẹ. ⁴⁶ Maa vẹ inẹshẹ vene ẹtofei ka, ọzatụrọza ana raa dọ mi wụ, ọ zaa yini oozi. ⁴⁷ Ọzi vi ẹmi ọnọ vaa ji ivi yi ẹzẹna raa zi wụ irẹyi ami, dọ razi vatụraa. Maa vẹ ki ma va dọ anẹshẹ tụ, ma zi vẹ va mishọji yi anẹshẹ. ⁴⁸ Ọ ọnyi ẹzẹna vaa mi ishọji yi ezene yi mi tẹtẹ, dọ raa zi dọ irẹyi ami wụ. Irẹyi ọnim ka ọnọ vaa mi ishọji yọ ini ọkụshi kọọta. ⁴⁹ Ma zi karẹyi ẹngwụ ami. Ada ami ana tụ mi ọnọ si irẹyi ọni mva kaa yi mi ọnri mmẹ mẹ vaa ka a. ⁵⁰ Maa yẹ ka irẹyi Oshomoshi vi ẹshẹ poro-pooro, irẹyi ọni ma ka yi, vene Ada mi mẹ karẹyi yi mi, avọ mmẹ za ki kaa."