nbtt-igb-x-etuno_jhn_text

Irẹsụ 11

¹ Ọ ọnyi ọzenyi anaa shi Inazarọsi di ẹngwụ aa ziọ, ani irẹkụra Ibẹtani ọnọ vi, irẹkụra Imeri ọnri ọọnyara aani ọnyẹnẹ ana shi Imata. ² Imeri ana si eturari mụna ngwụ Ananyiyi, dọ si ẹyi-rẹsụ aani nyee afụ Ijesu, ọni ẹngwụ aa zi ọọnyara ani Inazarọsi. ³ Di ẹnyara anyẹnẹẹ ẹnẹ tụshi Ijesu ka, "Ananyiyi, ree, ẹngwụ aa zi ọzọnụ sirẹyi aani." ⁴ Ijesu mẹ wụ itụ ọnọ, dọ ka, "Ẹngwụọzi ọnọni ọzi vi ọi sụ, ama aa vaa si ụga Oshomoshi zụ, da zẹ zirẹngwụ aani si Ozi Oshomoshi tụẹba." ⁵ Ijesu o sirẹyi Imata, shi ọọnyara aani ọnyẹnẹẹ, ọnri Inazarọsi. ⁶ Ijesu mẹ va wụ ka ẹngwụ aa zi Inazarọsi, dọ mẹ ẹkụshi ẹẹva tụọ izẹnọ ya. ⁷ Ụmonotụ, dọ kaa yi eziafụ aani ka, "Wa vẹ ya varama ni Ijụdiya nini." ⁸ Di eziafụ aani ẹẹ kaa yọ ka, "Irabayi, ọmẹyani ani Ijuu nini e si ka ene ne wụ irẹta. Ụ zaa varama ni izọ?" ⁹ Di Ijesu tụoshi ka, "Aivi wakati ẹwụrẹva ọnọ vi ẹtofei ini irẹkụshi? Ọza a zụsẹ ini ọọdu, ọ zaa ji gege, fụvọka ẹtofei ẹshẹ ono si re ẹtẹ." ¹⁰ Ọmẹrayiya, ọọ zụsẹ inaafụ, ọ vaa ji gege fụvọka ẹtofei ọzi yi ininẹ aani. ¹¹ Ụmọnọ karẹyi ẹnẹni da, dọ kaa yụ wa ka, "Ọtayi Inazarọsi aa sụara, ama, maa na, ma na sha a fini ara." ¹² Di eziafụ aani ka, "Ananyiyi, aaviki ọ sụara, ọ vaa sha." ¹³ Ijesu vana karẹyi inọpati isụ aani, ama de ro ka ara obooro ọnọ ka. ¹⁴ Di Ijesu shụ wa ka, "Inazarọsi o sụ da." ¹⁵ Inẹ ami o shine, fụvọ awụ nini, ki ma zi yi izọ dụ nyi ọdọwụ nini. Waa vẹ ye ne tụo." ¹⁶ Di Itọmọsi, anaa shi Ididimọsi, kaa yi eziafụ anavọ ka, "Waa vẹ nini, di ẹyi ri Ijesu o ne sụ vabẹ. ¹⁷ Ijesu mẹ naa vẹ do ve tụ ki Inazarọsi ọọ si mẹ ẹkụshi ẹẹna ini irikụta, ¹⁸ Ibẹtani ọgụri Ijerụsanẹmụ, ọpati imairi ẹwụrẹshi ọnọvi. ¹⁹ Ani Ijuu ẹrụrụ ẹẹ vẹ ki ene fufu Imata ọnri Imeri ini ọnyara anini ene sụ. ²⁰ Imata mẹ wụ ki Ijesu aa vẹ, do ne tụo, ama Imeri vana yatu tụ neshi. ²¹ Di Imata kaa yi Ijesu ka, "Ananyiyi, ọọnyara ami o zi yeen sụ, wạ yaan yi izọni. ²² Tụavọ-tụavọ, maa yẹ ka isatụrisa ọni ụ ree fisụe fini ụvọ Oshomoshi, ọ va mẹẹ yi wụ." ²³ Di Ijesu ka yọ ka, "Ọọnyara awụ vaa sha kwẹtẹ." ²⁴ Di Imata tụoshi ka, "Ma yẹ ka ọ vaa sha kwẹtẹ ini ọkụshi ọshisha kwẹtẹ aza bo, ini ọkụshi kọọta." ²⁵ Di Ijesu kaa yọ ka, "Ẹ maa vi ọshisha ọnri ifẹ; ẹzẹna raa dọ mi wụ, sho sụ, ọ va mẹshẹ. ²⁶ Ẹzẹna raa yi inẹshẹ, dọ dọ mi wụ, ọ zi nyi ọ mẹ ve sụ. Ụ wa dọ ọnọni wụ." ²⁷ Do tụoshi ka, "Ee, Ananyiyi, maa dọọ wụ ka ẹwụ a vi Ikristi ọnọ, Ozi Oshomoshi, anaa vi inẹshẹ. ²⁸ Ọ mẹ si ọnọni ka, dọ shi Imeri tụni oboka, dọ ka, "Ọzuọzisa yi izọni, ọọ shụ wụ." ²⁹ Ọ mẹ wụ, dọ sẹ kwẹtẹ ne tụo. ³⁰ Ẹfiavọ, Ijesu vana yi yi izi Imata ne tụo, ọi ngwi ngwụ izẹni irẹkụra ya. ³¹ Ụmọni ani Ijuu nini, enee fufuo inẹ ineshi re ka ọọ si kwẹtẹ a jinẹ, dẹ vatụra. De ro ko o nee sụne ini irikụta aani. ³² Ụmọni Imeri ve tu izi Ijesu ya, do ree, dọ va kuẹtẹ ini afụ aani, dọ ka, "Ananyiyi waa yaan yi izọni, ọọnyara ami o zi yeen sụ." ³³ Ijesu me re ka oo sụne, di ani Ijuu ana vatụra dẹni ze sune, di irẹyi ọnọ kani Ijesu kokoro, dẹngwụ aani vashi ini ifẹ. ³⁴ Dọ ka, "Izu ụ tụọ sụ tẹtẹ tụ nin kẹ." Dẹ tụoshi ka Ananyiyi ve ree." ³⁵ Ijesu o sune. ³⁶ Di ani Ijuu ẹnẹ ka, "Avụ re ọ mẹmẹ sirẹyi Inazarọsi!" ³⁷ Di azẹnyi ina anini ka, "Ẹzẹna zụ sha ogụri iri, wa rai zụ raa mi mẹ ki asi ọzọnọni su?" ³⁸ Di irẹyi ọnọni zẹ kani Ijesu ọtụtụrụma, dọ ni ini irikụta aani. Irikụta ọnọ vana yini ụtafa, da vi irẹta kụo. ³⁹ Di Ijesu kaa yu wa ka, "Chemi irẹta ọnọ fi noze nini." Di Imata, ọnyara Inazarọsi ene sụ ka, "Ananyiyi, oku ọnọ ọ sii vẹrẹ aa vụ. Ọọ gụ ẹkụshi ẹẹna ọnọ fụrẹ sụ." ⁴⁰ Di Ijesu fọ ọ ka, "Mazi kaa yi wụ ki, ụ vee re ụga Oshomoshi waa dọ mi wụ." ⁴¹ De chima irẹta ọnọ fi noze. Ijesu ọọ kụreyi tụẹba, dọ ka, "Adaa, ma kụ ụ avọ fụvọka ụụ bematọ. ⁴² Maa bidi yẹ ki ụụ bematọ inẹfi bo, ama, fụvọ aza ọkọni ana varakara mi, ọni ma si ka a, doti ẹ dọ wụ ka ẹwa tụ mi. ⁴³ Ọ mẹ maan ka da, dọ nowụ tụẹẹba ka, "Inazarọsi, jinẹ ve!" ⁴⁴ Di ezene sụ ọnọ jinẹ vẹ. Afụ ọnri avọ aani vana si ita sụụ, da si ita sụụ eyi aani, Di ijesu kaa yụ wa ka, "Ngwara a nini, dọ ọ na." ⁴⁵ Inaani, ani Ijuu ẹrụrụ ana vi idi Imeri, ee ri isi Ijesu aa mẹ, dẹ dọ wụ. ⁴⁶ Di azẹnyi fi izọ na kaa yi Ifarisi nini, isa ọni Ijesu aa mẹ. ⁴⁷ Di arụfa ọbani ọnri Ifarisi nini pere ẹngwụ gụ, dẹ ka,"Si vaa mẹ kẹ? Ọzọnọni ana mụkọrọ oshishozeyi ẹrụrụ ẹnẹni. ⁴⁸ Yaa maan va ni aavọ, aza bo va dọ ọ wu; ẹfiavọ di ani Iromụ nini va dọ yi ẹtẹ ọnri irẹkụravabẹ ayi." ⁴⁹ Di ọzẹnyi ana shi Ikayafasi ana vi ọdọvidi arụfa ọbani ini irayi ọnọ, kaa yi wa ka, "Ọzi nyi isa ọnụ yẹ nini. ⁵⁰ We zi roo nini ka ọza ọnya re sụ yi aza bo, ọ mẹ funi ki irekụravabẹ bo vụri." ⁵¹ Aziviki ọni ono ro o dọ maan ka, ama ọọ kisẹ ki Ijesu o sụ yi irẹkụravabẹ bo, fụvọka, ọnọvi arụfa ọbani ana yi ineshi Oshomoshi irayi ọnọ. ⁵² Aizẹ vi vi irẹyi irẹkụravabẹ kẹnẹ, ama doti ẹ zụ pere ezi Oshomoshi ana gara shi irasha bo gu. ⁵³ Fụrẹ ẹfiavọ, dẹ kụ aa shọma ẹmẹmẹ vaa wụ ijesu. ⁵⁴ Fụvavọ, Ijesu ọikụ zụsẹ inakaakana aza ini eyi-vovo. Ọọ fi izọ, dọ ni irẹkụra anaa shi Efiremụ ini ẹtẹ ana gụri ụnọmi, di ọnri eziafụ aani na yi izọ. ⁵⁵ Ụpe Ọpiparafụ ani Ijuu nini oo vee tụ, di aza ẹrụrụ fi irẹkụra ọna varakara shirẹ ni Ijerụsanẹmụ ka, ẹnẹ na mẹ ido ọmimẹ ẹngwụ nii, di ishọ o ve tụ. ⁵⁶ De e si Ijesu ini itẹmpụrụ, dẹ ẹ fọ ẹngwụ ka, "Ụ we ro ka, ọ zaa vẹ ini ụpe ọnọni. ⁵⁷ Oshirẹsụ arụfa nini ọnri Ifarisi nini ẹẹ sụmọ kaa da ka, ọọ nyi ẹzẹna yẹ izi Ijesu ya, ọ ka a, doti a zụ na za a.