¹ "Ini irẹiza, maa ka yi wụ nini ka, ẹzẹna raa zi zi oze ngwụ ireshi atẹmẹ, ama dọvika ọ zi irasha ọsa shirẹ ngwụ ireshi, ọzọnọ vi oyi ọnri ọjọzẹnya. ² Ẹzẹna raa zi oze ngwụ ireshi ọnọ vi ọkụatẹmẹ zi. ³ Di oseroze noze yọọ. Atẹmẹ nini vaa wụ ọngwẹ aani, di ọọ shi atẹmẹ aani irẹsha, dọọ kụ wa jinẹ nẹshẹ. ⁴ Ụmọnọ raa kụ ayani bo jinẹ vẹ da, di ọ yi inọvidi anini, dẹẹ vatụraa, fụvọka ẹ yẹ ọngwẹ aani. ⁵ Ẹ zaa vatụra ọzọga, ama akikọnọ e vee zụe kavana yọ, fụvọki ẹ zi yẹ ọngwẹ azẹga. ⁶ Ijesu o chụshi irẹyi ọnọni yụ wa, ama isẹnọ si irẹyi ọnọọ ka o zi ye wa. ⁷ Di Ijesu ze kaa yụ wa ka, "Ini rẹiza, Ẹma vi oze ireshi atẹmẹ." ⁸ Aza bo ana bidi vẹ dim va vẹ vi oyi onri ọjọzẹnya, ama atẹmẹ nini e zi bewa atọ. ⁹ Ẹma vi oze ana ngwụ ireshi. Ẹzẹna raa zi ida mi ngwụ ireshi, vana vaa dọ tụ, dọọ ngwụ ireshi, dọọ jinẹ, do o re ọriri ofụo-ofụ. ¹⁰ Oyi ọ ma vẹ, ọọ zivi ki o ve yi ụyi, dọ wụ ọza, ọnri ka, do du isa sha. Maa vẹ doti aza ẹẹ nyi ẹshẹ: dẹẹ nyọ ini ẹtụra-ẹtụra. ¹¹ Ẹma vi ọkụatẹmẹ zi obooro. Ọkụatẹmẹ zi obooro vana si ẹshẹ aani tẹtẹ yi atẹmẹ nini. ¹² Ozida ana dọ, de sio ụta ko sere atẹmẹ, ọzi vi ọkụatẹmẹ zi, aivi ọni nyi atẹmẹ. Oo re ka odụmi aa vẹ, dọ fụrẹ atẹmẹ nini ụvọ, do o zụe, di ọdụmi ọnọ yi ini atẹmẹ za, dọ gara wa sha. ¹³ Oo zụe fụvọka, a dọọ, de sio ụta. Ọzi seyi pe atẹmẹ ẹnẹ. ¹⁴ Ẹma vi ọkụatẹmẹ zi obooro. Maa yẹ ayami, di ayami yẹ mi. ¹⁵ Adaa ọ yẹ mi, di ẹmi zẹ yi yẹ Adaa, di mi si ẹshẹ ami tẹtẹ yi atẹmẹ. ¹⁶ Maa nyi atẹmẹ ọsa nini ana zi yi ineeshi atẹmẹ ọnọni. Mi va kụ waa vẹ, di ẹni zaa wụ ọngwẹ ami, di ẹnbo vara ọnya ini afụ ọkụatẹmẹ zi ọnya. ¹⁷ Isa Adaa si sirẹyi ami yi. Maa si ẹshẹ ami tẹtẹ, di ma zẹ zụ si ọ varama. ¹⁸ Ọzi nyi ọza ọna vaa zụ di ẹshẹ ami fụrẹ mi ụvọ, ama ma si ẹshẹ ami tẹtẹ. Maa nyi ụmọ ọ si si ẹshẹ ami tẹtẹ, ọnri dim zẹ nyi ụmọ ọ si siọ varama. Ada mi ọ si ụmọ ọnọni yi mi." ¹⁹ Di irẹyi ẹnẹni sụ ẹshankata inakaakana ani Ijuu nini. ²⁰ Di ẹrụrụ anini ka, "Ọọ nyi ifẹ azeeshi, irẹsụ aani ọzi gụ. Si ụ wee baatọ tụ nini." ²¹ Di azẹnẹsa ka, Irẹyi ẹnẹni ẹzi vi irẹyi ọza ọna nyi ifẹ azeeshi. Azeeshi wa va zụ sha ogụeyi iri?" ²² Ẹfiavọ vi ẹfi ẹnẹ si rụpe ọtitamayi ọvi vara ireshi Oshomoshi ọnini Ijerụsanẹmụ. ²³ Ụmẹ ọgụ ọni ẹfi ọnọ vi. Di Ijesu aa zụsẹ izi aa shi ajẹngwụ Isoromọni, inọvidi itẹmpụrụ. ²⁴ Di ani Ijuu nini varakara a, dẹ fọ ọ ka, "Ishụ vene si ki ya yinị ọjiji ụ rẹka tụ kẹ? Aaviki ẹwụ ọnọ vi Ikristi ọnọ, kaa, yi yi ini eyigede." ²⁵ Di Ijesu tụoshi ka, "Maa kaa yụ wụ nini, ama wa zi dọ wụ nini. Ụkọrọ oshishozeyi ọni ma si irẹsha Ada mi mẹ, ẹẹ divenụ irẹyi ami. ²⁶ Tụavọ-tụavọ, wa zi dọ wụ fụvọki ụ wa zi vi atẹmẹ ami nini. ²⁷ Atẹmẹ ami vana wụ ọngwẹ ami, dẹ ẹ vatụra ami. Maa yẹ wa. ²⁸ Maa si ẹshẹ poro-pooro yụ wa. Ẹikụ ee sụ ọnri ọzọnyọnyi ọizụ aa dọ wa fụrẹ mi ụvọ. ²⁹ Ada mi ana kụ wa yi mi ọọ bani fụni aza bo. Ọzi nyi ẹzẹna va zụ dọ wa fi ini ụvọ Adaa. ³⁰ "Ẹmi ọnri Adaa vi ọnya." ³¹ Di ani Ijuu ẹnẹ kụ irẹta ka, ene ve nee irẹta. ³² Di Ijesu tụoshi ka, "Maa mụkọrọ ozoza-ozoza, ọni Ada mi si yi mi ki ma mẹ ini eyi awụ nini. Yere ọnya ini ụkọrọ ẹnẹ ọnụ fụvọ aani, ee ve ne mi rẹ̣ta nini"? ³³ Di ani Ijuu ẹnẹ tụoshi ka, "Ye zi ne wụ rẹta fụvi ụkọrọ ozoza ọnyọnyi, ama fụvi irẹyi ofoto ọnụ ka. Ẹwụ ọza kẹnẹ kẹnẹ aa si ẹngwụ awụ mọrọ Oshomoshi." ³⁴ Di Ijesu fọ wa ka, "Azẹ zi chẹrẹẹ tụ ini iwe ofi awụ nini ka, "Ori onụ vi nini?" ³⁵ Aavika ọọ shi ẹnẹni irẹyi Oshomoshi vetụ, Ọnri ka, (ọza ọizụa vara irẹyi iwe ọnini), ³⁶ Ụ wa vaa kaa nini ka, ẹmi ana Ada mi ni, dọ tụ mi vẹ ẹshẹ aa ka ofoto, 'fụvọki maa ka ki Ozi Oshomoshi ọni mi vi'? ³⁷ A si ụ dọ mi wụ nini, aaviki aivi ụkọrọ Ada mi maa mẹ. ³⁸ Ama, aavika maa mẹ wa, di isa ụkọrọ ẹnẹ ka yụ wụ inọpati ami, shi waa zi dọ irẹyi ami wụ, dụ wa zụ yẹ nini ka, Ada mi yi ininẹ ami, di ẹmi zẹ yi ininẹ aani." ³⁹ Ee si ki ẹnẹ zẹ zaa, ama dọ tụ fụrẹ wa ụvọ. ⁴⁰ Di ọ zẹ varama ni akajinẹ̣ Ijọdani, izi Ijọọnụ bidi yaa mi isami yi aza, dọ naa yizọ. ⁴¹ Di aza ẹrụrụ zẹ vetụo, dẹ ka, "Inirẹiza, Ijọọnụ ọzi mụkọrọ oshishozeyi, ama isa ọnọ ka inọpati ọzọnọni bo vi irẹiza". ⁴² Di aza, ẹrụrụ dọ ọ wụ izọ.