¹ Ẹwụ nin ẹnyarami, ọzi vọrọ ka aza ọrụrụ, ee si ki ẹnẹ vi ọzụozisa. Fụvọki ya yẹ ki iva di ishọji ana katẹngwụ fụ. ² Fuvoki ẹyi bo vana nyieyi inoze renyi renyi. Aaviki, ọ nyi ọza ana ra ma nyeyi ini irẹyi ọkika, ọnọviki ọzọnọ ọ si vira ọna va zụ za ẹchẹngwụ aani su. ³ Ini ọshishi ireyi ọnọni afu sha, aa si enyisuẹ oweyi chire irenụ ovụrata, doti oroze mi isẹni ee si ki ọmẹ, di aa zẹ va zụ vara ẹngwụ anini bo. ⁴ Nyi oriro inọpati ẹpa ọbani, ọpọ ọni bani tụ, da ki ashi ọkata ọna siọ zụsẹ, ẹzẹna siọ vana si ọchi oweyi siọ zụoze ono si kọ zi. ⁵ Inoze ọnyọnya, irarẹ vi aka oweyi inẹngwụ bo, ama ọọ karẹyi ẹbani-ẹbani. Waa yẹ nini ka, ira oweyi vazụ ri irikụ-ọbani ira. ⁶ Irarẹ nyẹmbẹ vi ira ẹshe, aichama ana si tụ inakaakana ẹngwụ ayi bo. Ọ di ẹvụvụ pari ẹngwụ ayi bo, dọ va jira tụ inoze ẹshẹ ayi. Eshụ fi neekụ ọrọkọtọ oodụvi ọnọvi. ⁷ Ụye ẹkata renyi renyi vọni ọza vazụ pa, ụnomi, isẹchichi ọnri ụye bo ana ini enyi vana va zụ pa, di aza paa wa. ⁸ Ama, ọzi nyi ẹzẹna vazụ zi irarẹ chire. Isa ọnọvi ka oshi yi irẹyi azeeshi, ama ọza zụa za chire, oshi yi ẹchipa anava zụ wụọza. ⁹ Yaa si irarẹ sụga yi Ananyiyi ọnri Adayi, di za sisi siọ chi aza ekụ, aza ọni Oshomoshi mẹ vene ẹngwụ aani. ¹⁰ Fini irenụ ọnya ọni ọdidabẹrẹ ọnri ekụochi aa jinẹ fụrẹ. Ẹwụ nin ẹnyarami, ọzi vọrọ ki ọ vọọ vi. ¹¹ Oosụe waa si enyi onee shine ọnri ọnaa nyirẹyi jinẹẹ? ¹² Ẹwụ nin ẹnyarami, ọchi eezụ wa vazụ tụ ẹtụtụ oromi? Navẹki ọ zụ tụ ẹtụtụ Onivi? Enyi ana nyi anọ ọizụa si si enyi ene shine vẹ. ¹³ Ẹnẹ nyi ụvira, dọ zẹ nyi ọyiyẹ inakaakana awụ nini kẹ? Navọ di ọza ọnọ ọsi ẹshẹ ozoza zụ zirẹngwụ ụkọrọ ụvọ aani ini ọvivẹ-ngwụnẹtẹ ini ụvira. ¹⁴ Ama, waa kụshini nini, dụ we ro ayawụ renya ini ọtụtụrụma awụ, asụụ wooto, dụ wa nyapinẹ kụ irẹiza. ¹⁵ Ọnọni ozi vi ụvira ana vẹ fụre ẹbẹẹba. Akikọnọ, ayi anẹshẹ, ọi ifẹ oozi, ọnri ifẹ azeeshi ọnọvi. ¹⁶ fụvọki izẹna ra ya kụshini, di ọzọza ee si anyani, izọ̣ vanaa vazi ọnri ụkọrọ azeeshi bo. ¹⁷ Ama, ụvira ana fụrẹ ẹbẹẹba vẹ, va bidi vi ọnini, dọọ nyi ẹngwọrọ, dọ vi ọvivi ẹgwụnẹtẹ, aa shọọ, do tụoshi, do shi yi ayụva, ọnri ẹtụtụ ọiza, ọma ki ọtụ ọza, dọ zẹ vi ọnirẹiza. ¹⁸ Ẹtụtụ ọmimẹ anasẹrẹ vene chire ini ẹngwọrọ tụni akaakana ẹnẹna ra mẹ ki ẹzẹnẹsa ẹ mi isa ini ẹngwọrọ.