¹ Ẹnyarami, asụụ nyi ọza remeyi ini ọdọwụ ọnụụ nyi ini Ananyiyi Ijesu Ikristi, ọna nyi ụga. ² Aaviki ọza ọ ngwu izụ ya mi iragụ nini, dọ kụ ochin-gege igonụ, dọ zẹ chire auru ozoza, di ọnọrụ onriwa ana kụẹnya ẹvụvụ shẹngwụ ọnzẹ vẹ, ³ wee re ọza ana kụẹnya ozoza shẹngwụ, dụ ka yọ ka, "Mi yarẹwụ, yatụ tụ irasha ize ne zoza ọnọni," ama dụ va ka yi onriwa ọnọọ ka, "Ẹwụ, dinẹ tụni aka izọ," navẹki, "Yatụ tụ nafụ ami," ⁴ aivi wa jishi inakakana ẹngwụ awụ aavọ? ⁵ Bematọ, ẹnyarami ọnim-ngwụayani, aivi aza ana vi onriwa ini isẹshẹ ọni Oshomoshi nii, ka ẹvi opisa ini ọdọwụ, doti aza ẹzụ vi ana va riọgụ ijọva ọnọ garogụ aani yi aza ẹne sirẹyi aani? ⁶ Ama wa si eyi oweyi re onriwa nini! Aivi opisa nin ẹnẹ vaa wụ onriwa? Aivi ẹni ẹnaa si ẹkẹẹka shụ wụ̣ irẹka tụni ikotụ. ⁷ Ẹ wa raa ma karẹyi ọshimi irẹsha ọiza ọnụ bẹ tụ nin? ⁸ Aaviki wa vatụra ofi enefụ kekere ana yini iwe ọnini, "Ụ vee sirẹyi ọzọfụva awụ venebiri ẹngwụ awụ," waa mẹ ẹtẹrẹ. ⁹ Ama, waa niọza remeyi, waa chamayi, dụ ụ vi oodụ ofi, wa zi sụbani yọọ. ¹⁰ Fụvọka ọzatụrọza ana raa vatụra ofi boo, do vi ka ọnya kẹnẹ ọni ono dụ, ọza ọnọ ọ rivi ini onboo. ¹¹ Fụvọka ọza ana kaa ki asụ sẹrẹka, ọnọ zẹ kaa ki, asụ wụ ọza. "Waa zi sẹrẹka, ama dụ wụ ọza, wa si vara oodụ ofi. ¹² Fuvavọ, waa karẹyi, dụ waa mẹ nini venebiri ẹzẹna vaa si ofi ọninatu mi ọkarẹyi yi. ¹³ Fuvọka ivi ve chi vẹ iresụ ẹnẹna raa zi nyi ayụva yi ọza ọfụụva aani. Ayụva ọnọ fụrẹkụ ivi. ¹⁴ Ọza raa ka ọnọ nyi ọdọwụ, ẹnyarami, dọ raa zi si ọ zụ ini ọmimẹ, yere ọgụ ọnọ vi yọọ. Ọdọwụ ọnọ wa va zụụ jọọ tụ? ¹⁵ Aaviki ọnyara ọnọrụ navẹki ọnyẹnẹ, ọzi nyi ita navẹki isari ini ishọọnọ. ¹⁶ Ọnya ini awụ nini raa kaa yụ wa ka "Waa na ini ẹngwọrọ, a si ashi za wụ, inẹ awụ oshi." Ama, wa zi si isa enesi ini ẹchẹngwụ yụ wa, yere ọiza ọnọ vi yụ wa! ¹⁷ Inoze ọnyọnya ọnọni, ọọdọwụ yi ẹngwụ aani razi nyi ụkoro, vene sụ. ¹⁸ Ọzẹnyi vaa zụ kaa ki, "Waa nyi ọdọwụ, ẹ maa nyi ụkọrọ." Si ọdọwụ awụ zụ mi ini arima nyi ukọrọ, ẹmi vaa si ọdọwụ ami zụ wụ zirẹ ụkọrọ ami. ¹⁹ Waa dọwụ ka Oshomoshi vi ọnya, waa mẹ ẹtẹrẹ. Ama ifẹ azeeshi nini nyẹmbẹ ẹzẹ ki Oshomoshi vi ọnya, de shi angwa. ²⁰ Ụ wee si ki wa yẹ, ẹwụ ọnụra, kaa ọdọwụ ana ra zi si nyi ụkọrọ bẹrẹ ẹngwụ, vi osụsụ. ²¹ Aivi zirẹngwụ ụkọrọ ụvọ adayi Abrahamụ ana si jishi yọ, ọmẹ si ozi aani mi isẹvọ ini ọpẹtẹ? ²² Wee re ka ọdọwụ bẹrẹ ụkọrọ aani vana dinẹ, ọnri ka zirẹ ụkọrọ odowu aani ọ nyi afu shẹtẹ kokoro. ²³ Irẹyi iwe ọnini ọ kaa ki, "Abrahamụ ọ do Oshomoshi wụ, da zaika yọ ka, ọni reiza ọnọvi," ọnọ mẹ ka shiọ ọta Oshomoshi. ²⁴ Wee re ka zirẹ ụkọrọ ụvọ ana si jishi yi ọza, aivi zirẹ ọdọwu renya. ²⁵ Inoze ọnyọnya, ana si jishi yi Irehabụ ọsẹrẹka, ọmẹ dọ ọnitụ ẹnẹ ngwụ ireshi, dọ zẹ kụ wa jinẹ zi oze ọsa. ²⁶ Ẹngwụ mẹ vi osisụ ifẹ ra si fi inaani, avọ ọ mẹ zẹ vi yi ọdọwu ana ra zi nyi ụkọrọ.