¹ Ọmeyani, shi ireji ipaapa vana nyi eto ọmẹ vọrọ ki afẹkẹ Oshomoshi; dazẹ nyi irasha ọnini anaya fẹkẹ ini ẹshẹ ọnọni. ² Fụvọki ọ nyi irasha ene teni anaa shi itabanaku. Ini irẹngwụ ipaapa ọnaa shi irasha ọnini. izọ ọchi ọpa ya, shi itẹbụrụ ọnri ivụrẹdi ana yini ọvidi Oshomoshi; izọ ọnaa shi irasha ọnini. ³ Irẹngwụ ọsa ọna yinaama ita ọfụụva ọna si jioze, ọnọni anaa shi irasha ọna vi ọnini fu bo. ⁴ Ọ nyi ọpẹtẹ ana si igoonu mẹ izẹna yaa ri eturari ira. Izọ ọna zẹ si si apoti irẹzẹ tụ, ọna si igoonu ku ẹngụ aani bo. Inaani, ọ nyi oji oweyi ọna si igoonu mẹ, ininẹ aani ọni imana ya, ọchi ọkẹtẹ Erọọni ọna tụ ododo ọnri irẹta irẹzẹ ẹẹva. ⁵ Ini ẹbẹba apoti irẹzẹ ọnọ, icherebumi ọna nyi ụbani dọ gana avaka aani ku apoti ọnọ, Yazi zụa ka isabo inọpati aani ọmẹyani. ⁶ Inaama one teni isẹnẹni tẹtẹ da, arụfa nin vanaa ngwụ irẹngwụ ẹshẹẹshẹ itabanaku naa mụkọrọ aanini. ⁷ Ama, oshirẹsụ arụfa renya ọnọ ngwụ irẹngwụ ọfụụva ụpọnya ini irayi, ọ ma ngwụọ ọchishi ki ọ nyi anya ọnọ va sii mẹ isẹvọ yi ẹngwu ọnri aza, fụvọ aichama ẹnẹ razi yẹ mẹ. ⁸ Ifẹ ọnini ọ siọzụ ki azẹzi si si oze ọna na ngwụ ini irasha ọnini ene fu keekere ẹfiẹni itabanaku ipaapa di dinẹ. ⁹ Ọnọni vana si me ọpajiwe yi ẹyi ana yini ẹshẹ ụmaani. Irẹiza ọmimẹ ọnri isẹvọ ana kụa mẹ aani ọzi fụ teni ivefu ẹnẹna mirafẹkẹ tụni ọgụrigụ. ¹⁰ Ayaanini ozi funa ọriri ọnri ofifu, bẹrẹ oze renyi renyi ọnẹ sii nyina ẹngwụ. Isẹnẹni bo vi vana mẹ tẹtẹ kk a siọ za ẹchiẹngwụụ sụ netu ẹfi ana va sii mẹ irẹzẹ ọwọọwa. ¹¹ Ikristi ọ vẹ vene oshirẹsụ arụfa ọi isọiza bo ọna vẹ da. Itabanaku ana bani fu, dọ zẹ vi ọgụrigụ, ana razi sụvọ mẹ, ọnọ zi parafu, ọnọni ọzi bẹrẹ ẹshẹ ọnọni ọni Oshomohi mẹ. ¹² Ọzi vi zirẹngwụ anya ẹvụ ọnri ozi ụnọ, ama zirẹngwụ anya ẹngwụ aani ọnọ si ngwụ irasha ọna vi ọnini fu bo na ụpọnya yi ẹyi bo, dọ mẹ oze ọdidọtụ ayi poro pooro. ¹³ Fụvọki aaviki anya ẹvụ ọnri ụnọ bẹri atitọ ọnẹ che shi ẹnẹna razi nii, ọ sha wa tu yi Oshomoshi, do roze nyina ẹchẹngwụ aanini, ¹⁴ ọ vọọ vi, anya Ikristi me fufu vaa vi, ọni ọna zirẹngwụ Ifẹ Ọnini ana ra poro pooro, dọ si ẹngwụ aani mẹ isẹvọ ọna razi nyi ẹvụvụ yi Oshomoshi, dọ nyina ivefu ayi fiini ụkọrọ ọnarazi nyi ọgụ bo, doti ye roze fẹkẹ Oshomoshi ọna ra poro pooro. ¹⁵ Fụvavọ, ọ vẹ ini akaakana ireji ọwọ̣ọwa. Ọ maan vi, ọmẹ vi ki, ọza ọnya o su, do roze ji ẹnẹna yini ireji ipaapa tụ fiini aichama aanini, ẹnẹna shi vaa dọ otoowu ẹshẹ poro pooro. ¹⁶ Fụvọki izẹni ọza ya chẹrẹ iwe osisi a mẹmẹ vaa ga ogu awụọni ụmọni on re fusu, a bẹdọ siọzụ ki irẹiza ọni ọzọnọ fu su. ¹⁷ Fụvọki ẹfi ọni ọzẹna chẹrẹ iwe tẹtẹ re fu su ọni osisi ana chẹrẹ tẹtẹ vaa zụụ vẹrẹ ọmimụkọrọ, fụvọki ọ zi nyi ụkata ẹfi ọni ọzọnọ yi yẹshẹ. ¹⁸ Fụvavọ, shi irẹzẹ ipaapa nyẹmbẹ vana si anya si shiẹtẹ. ¹⁹ Fụvọki, ẹfi ọni Imosisi si ụmọ bo ana yini ofi yi aza bo da, dọ si anya ozi ụnọ ọnri ẹvụ bẹrẹ enyi, owotutu ovivi ọnri avi ana shi ihisọpụ, do chiesẹ iwe Oshomoshi nyẹmbẹ ọnri aza bo. ²⁰ Inaanị, dọ ka, "Ọnọni ọno ̣vi anya ireji ọni Oshomoshi si ụmọ ka yụ wụ nin kụ wa mẹ. ²¹ Avọ ono me ze chi che anya shi itabanaku ọnri ọnya irafẹkẹ bo. ²² Ofi mẹmẹ kaa ọnọ vi ki isa bo ọnọ vọrọ ki a si anya nyina. Fụvọki, aaviki ọzi nyi ki aa ji anya, azẹzaa nyi ki a si aichama aza vayi aanini. ²³ Fụvọki, ọ sẹrẹ ki a si anya isụpa nyina isa bo ene vene isa ana yineeku. Tuavọ tuavọ, isẹvọ ene funa ọi isụpa ana va sii nyina isa ana yi ẹbẹẹba. ²⁴ Fụvọki, Ikristi ọzi ngwụ irasha ọna vi ọnini fu bo, ọna si ụvọ mẹ, do vene ọna vi oboro; akikọnọ, ọ ngwụ ineeku ọiza nyẹmbẹ na, dọ na si ẹngwụ zụ ini ọvidi Oshomoshi yi yi. ²⁵ Ọzi ngwụ izọ na ki ọnọ na si ẹngwụ aani mẹ isẹvọ ụperika venebiri oshirẹsụ arụfa nin anaa si irayi irayi naa ngwụ irasha ọna vi ọnini fu bo zirẹngwụ anya ọzẹnẹsa. ²⁶ Aaviki ọyaan vọọ vi, ọ̣ yaan vọrọ ki ọọ si ẹfi tụrẹfi rụya fụrẹ ẹfi ana fụrẹ si ẹshẹ kẹtẹ. Ama, ọmẹyani, ụpọnya kẹnẹ ini ẹfi ọni ẹshẹ aa vaa ta, ana si siọzụ do roze kụ aichama finoze zirẹngwụ isẹvọ ọno ̣si ẹngwụ aani mẹ. ²⁷ Aa mẹ ẹ tẹtẹ ka ụpọnya ọni ọza vee su, oo su da, dọọ veyika ishọji. ²⁸ Inoze ọnyọnyạ, Ikristi nyẹmbẹ, ọna si mẹ isẹvọ ụpọnya ki ọ kụ aichama azẹrụrụ na, vaa si ẹngwụ zụ ụpọfụụva, aziviki ọ va jivi aichama, amaa fụvọ ọdidọtụ ẹnẹna vẹngwụnẹtẹ ee zi o.