¹ Irẹyi ọni yee si ki ya ka yụ wụ nin ọnọ vi ka: Yaa nyi oshirẹsụ arụfa ana yatụ tụni akụvọri ogede Oshomoshi Oshinọyi ẹbẹẹba bo. ² Ozida ọnọ vi tụ irasha ọnini ọnọ. Itabanaku ebebaani ọna fụri ineeku, ọni Ananyiyi mẹ, aivi ọni ọza mẹ. ³ Fụvọki oshirẹsụ arụfa ọzọọza vana nii ki ọọ mẹ irẹiza ọnri isẹvọ. Fụvavọ, ọ sẹrẹ ki a nyi isa ọna va sii mẹ isẹvọ. ⁴ Aaviki ini ẹshẹ ọnọni ọni Ikristi yaan yi ya, ọ zi yaan zụ vi arụfa vụụvụrụ, ụmọvi ka ọ nyi ẹnẹnaa mẹ irẹiza vene ofi mẹmẹ si ọ shiẹtẹ. ⁵ Itabanaku ana vi ụmama isa mẹ ya ineeku, ọnẹ yaa mẹ irafẹkẹ. Oshomoshi mẹmẹ tụ Imosisi ofuvọ ki ọ mẹ ẹ gẹdẹgẹdẹ̣ ẹfi ọnọ vaa da itabanaku ọnọ, avọ ọnọ mẹ ẹ. Di Oshomoshi ka, "Re kụ waa mẹ isa bo vene irima ana si zụ wụ ini irẹsụfa." ⁶ Ama ọmẹyani, Ikristi o re ụkọrọ ene funa ọnọ dọ da. O ze vi vene ọ mẹmẹ vi anakaakana irẹzẹ ene funa ọna bidi yinaani, one si shiẹtẹ tụni otoowu ene fu. ⁷ Fụvọki, aaviki irẹzẹ ipaapa ọzi yaan nyi ivi, ọzi yaan kụ zẹ nyi ki aa mẹ ọi ụpọfụụva. ⁸ Fụvọki ụmọni Oshomoshi re ivi ini ẹngwụ azẹneni, dọ ka, "Re, ẹkụshi aa vẹ --- avọ ọni Ananyiyi mẹ ka --- ọnim vee bere ireshi Isrẹni ọnri ireshi Ijuda mẹ irẹzẹ ọwọọwa. ⁹ O zee vene irẹzẹ ọnim bere oshuku aanini mẹ ini ọkụshi o nim za wa ụvọ, dil kụ wa jinẹ fụri ẹtẹ Ijipti. Fụvọki ẹ zi vatụra irẹzẹ ami, dim miu wa aba --- avọ ọni Ananyiyi mẹ ka. ¹⁰ Fụvọki irẹzẹ onim vee bere ireshi Isreni mẹ inaama ọkushi ẹnẹ yi--- avọ ọni Ananyiyi mẹ ka. Mva si ofi ami tụni oriro aanini, dim zẹ chẹrẹ ẹ wa tụni ọtụtụrụma aanini. Oshomoshi aanini ọnim vaa vi, dẹn zẹ vi aza mi. ¹¹ Ọzi nyi ọzọnzọnyi ana vaa zụ ọnọfụụva aani navẹki ọnyara aani, ka, 'Navọ wa yẹ Ananyiyi.' Fụvọki aza bo vaa yẹ mi, vẹrẹ fini ana vanẹtẹ inaanini paara na ngwụ ene fu inaanini. ¹² Fụvọki mvaa nyi ayụva yi arimamanasẹrẹ aanini, ọnri ki mai kụa tamayi aichama aanini vụụvụrụ." ¹³ Ọ mẹ kaa ka "ọwọọwa," ọnọ vi ka Ọ vara irẹzẹ ipaapa tụni ọkụkụ da; isa ana raikụ yini ụmẹ, dọ si ngwụọkụkụ vanaa gụrẹ ovivurii.