¹ Fụvọki ofi vana vi ụmama isoiza ana vẹ, aivi isẹnẹ mẹmẹ ya ini irẹiza ọnẹ vi. Ẹnẹna si ẹngwụ isẹvọ ọni arụfa nin sii mẹ isẹvọ irayi irayi, nee tu Oshomoshi, azẹi zụa mẹ wa ọgụrigụ zirẹngwụ isẹvọ ẹnẹ. ² Ọ yaan vi ki isẹvọ ẹnẹ va zụụ mẹ wa ọgụrigụ, ẹ wa yaan kụa mi mẹ isẹvọ ẹnẹ? Inoze avọ, aaviki a yaan nyina aichama anirafẹkẹ ẹnẹ ụpọnya kọọta, ẹ zi yaan kụ tamayi aichama aanini. ³ Ama, isẹvọ ẹnẹ vanaa si irayi irayi tamawaayi inọpati aichama. ⁴ Fụvọki anya isụpa nin, ozi ụnọ, navẹki ẹvụ, ọi zụa kụ aichama fiini ẹshẹ ọza. ⁵ Ẹfi ọni Ijesu vẹ ini ẹshẹ ọnọni, dọ ka, "Aivi isẹvọ navẹki irafẹkẹ ọnọ vi osisi awụ Akikọnọ, engwu onuu teni tẹtẹ yimi ọnọ vi osisi awụ. ⁶ Osisi awụ ọzi yini isẹvo anaa rira navẹki irafẹkẹ ana mẹ fụvọ aichama. ⁷ Inaani, dim ka, 'Re mi, ẹmi yi, vene a mẹmẹ chẹrẹ ẹ tuni ụpa iwe inọpati ami, maa vẹ va mẹ osisi awụ.'" ⁸ Ipaapa, dọ ka, "ọzi vi isẹvọ navẹki irafẹkẹ navẹki isẹvọ ọvụọvụrụ ana rira, navẹki isẹvọ ana mẹ fụvọ aichama ọnu wee si. Ọzi nyi ẹfiẹnẹ si ngwụ wụ eyi vụụvụrụ." Isẹvọ ẹnẹni bo vana mẹ inoze ofi. ⁹ Dọ zẹ ka, "Re mi, maa vẹ ki ma va mẹ osisi awụ." Ọ si ọmimẹ ipaapa finaani doti o roze zạ ọminẹ ụpọfụụva dinẹ. ¹⁰ Zirẹngwụ osisi aani ọnọ, aa za yi dinẹ ini ọshishatụ renyi, zirẹngwụ isẹvọ ana si ẹngwụ Ijesu mẹ ụpọnya chọ yi anẹshẹ bo. ¹¹ Inoze ọnya arụfa ọnyọnya ọnọ vana dinẹ eyinieyini, dọọ fẹkẹ Oshomoshi. Ụmẹ tụrụ̣mẹ ọnẹ sii mẹ isẹvọ ọnya ọnya, ọzi nyi ẹfi ọnọ zụ si kụ aichama fụrẹtẹ. ¹² Inoze ọsa, Ikristi ọ mẹ Isẹvọ ọnya fụvọ aichama poro pooro, dọ na yatụ tụni akụvọri Oshomoshi. ¹³ Oo zi ẹfi ana vi sii si ọnivi aani bo mẹ irẹfụ afụ aani. ¹⁴ Fụvọki zirẹngwụ isẹvọ ọnya ọnọ ya mẹ aza bo ọgụrigụ ọnọ vi ki a ni ini ọshishatụ renyi ọnini poro poro. ¹⁵ Ifẹ Ọnini ọ zẹ di divenu yi yi: Fụvọki ọ kaa ini ipaapa ka, ¹⁶ "Ọnọni ọnọ vi irẹzẹ ọnim vee pe wa ji inaama ẹkụshi ẹnẹ, avọ ọni Ananyiyi mẹ ka. Mva si ofi ami tụni ọtụtụrụma aanini, ọnri ka mvaa chẹrẹ ẹ tụni ayi aanini. ¹⁷ Mai kụa tamayi aichama ọnri amẹdu aanini vụụvụrụ." ¹⁸ Ọmẹyani, izẹna ya si aichama vaya aanini fụvọ isẹnẹni, ọi kụ nyi isẹvọ ọnyọnyi ana vaa mẹ fụvọ aichama. ¹⁹ Fụvavo, ẹwụ nin enyara ami, yaa nyi ayiọvanẹtẹ kii vaa ngwụ irasha ọnini zirẹngwụ anya Ijesu. ²⁰ Ọnọni ọnọvi oze ọwọọwa ana nyi ẹshẹ, ọnọ fụ sha yi yi zirẹngwụ ita ọjioze, ọni ọshafụsha aani ọnọ vi ki zirẹngwụ ụpẹngwụ. ²¹ Fụvọki ya nyi Oshirẹsụ Arụfa Keekere anaa zama ireshi Oshomoshi, ²² a navọ di ya si ọtụtụrụma irẹiza ne tu o ini ọkụayitụra ọnii nyi ini ọdọwụ, di ya yẹ ki o che anya sẹ ọtụtụrụma ayi, doti ivefu ayi ọ vara ọnini fiini ọshimi, onri ki a si enyi ọnini nyina yi ẹngwụ. ²³ A navọ di ya zẹ si sụvọza ọkụayitụra ọnii nyi tụra iribatọ ayi ọnii divenu kokoro,asii na va afụ naama, fụvọki Oshomoshi ana mẹ otowu yi yi vi ọnirẹiza. ²⁴ Navọ doti ye sioze iimẹmẹ vaa tụ ẹngwụ ọtụtụrụma ini osisireyi ẹngwụ ọnri ọiza ọmimẹ. ²⁵ Navọ asii turafụ naama ini opiperẹngwụ gụ vene azẹnyi mẹ mẹ. Akikọnọ, a navọ di yaa tụ ẹngwụ̣ ọtụtụrụma kokoro ini opiperengwu gu di si kamarenu tụọ fụvọki yere ki ọkụshi ishọ aa kavaape. ²⁶ Fụvọki aaviki ya yẹ kụafụ shi aichama ọmimẹ inaama ọnii nyi ọyiyẹ ini ireiza da, ọi kụ nyi isẹvọ aichama ọnyọnyi ọna yinaani. ²⁷ Akikọnọ, angwashi iribatọ ishọọji ọnaa vẹ ọnọ ku vọ, ọnri ira ọbani ene vee vu ọnivi Oshomoshi nin irii. ²⁸ Ọza tụrọza ana razi vatụra ofi Imosisi vene vee su, azẹzaa nyi ayụva yọ, aaviki azẹnẹẹva navẹki azẹnẹẹta ẹẹ divenu ki ọ vọọ mẹ. ²⁹ Ọzẹna kụ afụ shi Ozi Oshomoshi mẹ fufu vaa rụyaa tu aavọ, ana zaa sii si anya ireji mishavara, doọ kaạ ki ọzi vi ọnini --- anya ọno ̣vi ki aa si mẹ ọshatụ renyi yọ --- dọ kụ Ifẹ Ọnini ọiza ọfẹ ụfụ? ³⁰ "Fụvọki ya yẹ ọzẹna kaa ka, atọ osisi vi ayami, mvee si atọ." Zẹtụọ, "Ananyiyi vaa jishi yi aza aani." ³¹ Irẹyi angwashi ọbani ọnọ vi ki ọza ọ ngwụ irẹpa Oshomoshi ana ra! ³² Ama, tamayi ụmẹ iyẹyẹ, ụmẹ ọnuụ̣ nyi ọyiyẹ, ụmẹ ọnụụ nyi ọsiengwudọ ọbani, dụụ sikamarenu ini ụyọọri. ³³ Aa mẹ ụshi nyi wụ ini orere, da kụ wụ ụfụ, da mụya rụ wụ fụvọ ọdọwu, di ẹwu ̣ri azẹrụrụ gẹ nyi ọgiga ini ụyọọri ọnọ. ³⁴ Fụvọki wa nyi ayuva yi ẹnẹna yini ijaaru, du nyi ọsiẹngwụdọ, dụụ si inoshine si o, a mẹ si ẹkẹẹka kụ ogu ireshi awụ. Waa yẹ ka ẹwụ nyẹmbẹ ọ nyi ogu ọsa ene fu, ene re me vurii. ³⁵ Fụvavọ asu ne ọkụayitụra awụ ta, ananyi ọgu ọbani. ³⁶ Fụvọki ọ vọrọ kụ a nyi nyi umẹnẹ, du we roze dọ isẹnẹ Oshomoshi mẹ otowu aani, ẹfi ọnu ra mẹ osisi aani da. ³⁷ "Fụvọki ini ẹfi che ọza naa vẹ, vaa vẹ inireiza, ini ene re zee ku. ³⁸ Ọmanasẹrẹ ami nin vana vaa ra ini ọdọwụ. Aaviki ẹ varama, inẹ ami ozee shinee tu wa." ³⁹ Ama ya zi bẹrẹ ẹnnẹna varama tụni ovivurii. Akikọnọ, yaa ya bẹrẹ ẹnẹna nyi ọdọwụ, anaa za ifẹ dinẹ.