¹ Ọmẹyani, ọdọwụ vi isẹni ọza kụ ọtụtụrụma bo tụra, ọnọọ nyi iribatọ aani. Ọni ọnọ vi ọdọrenu isọni ọza rezi ri re. ² Fụvavọ, oshuku nin ẹ dọwairenụ ini ọdọwụ aanini. ³ Zirẹngwụ ọdọwụ, yaa yẹ ki Oshomoshi ọnọ si ụmọ tụ isa bo vẹshẹ, fụvavọ azẹzi mẹ isa enee re fiini isa enee re. ⁴ Zirẹngwụ ọdọwu ọni Ebẹẹni ya mẹ isẹvọ one funa isẹvọ Ikeeni yi Oshomoshi, inaani ana ya mivenu ka ọnirẹiza ọnọ vi, di Oshomoshi ka ọiza inopati isẹvọ aani, ọnri ka ziri ọdọwụ, Ebẹẹni a kii karẹyi vetu ụmaani shọmẹ daka vi ki o fu su da. ⁵ Zirẹngwụ ọdọwụ ana ya si Enọkụ nẹbẹẹba, dọ razi siri gẹrẹ isu. "Azẹzi ku re, fụvọki Oshomoshi ọnọ si ọ." Fụvọki da va tangwa si ọ nebẹẹba, aa divenu aani ki ọ mẹ Oshomoshi inẹ shine. ⁶ Ọmẹyani, ọza razi nyi ọdọwụ, ọi zụa mẹ Oshomoshi inẹ shine. Fụvọki ọ sẹrẹ ki ọza ana raa vẹ inọvidi Oshomoshi ọ nyi ọdọwụ kẹ ẹzẹ na vi di Oshomoshi ki Oshomoshi yinaani, ọnri ki ẹnẹne si o vẹ venee re ọgụ dọ fiinụvọ aani. ⁷ Zirẹngwụ ọdọwu ọno ̣mẹ ki amẹ ki Oshomoshi mẹ titụ shi Inoa inọpati isa ọni eyi rezi ri re shi Inoa, ini angwashi Oshomoshi, di Inoa bẹ ẹpa ọnọ si dọ ireshi aani tụ. Ọ maan mẹ, dọ jivi yi ẹshẹ, dọ si vara ọzẹ̣na nyi ọgiga ini irẹiza ọminẹ inoze ọdọwụ. ⁸ Zirẹngwụ ọdọwụ, ẹfi ana shi Abrahamụ, dọ wụrẹyi tụ Oshomoshi irenu, dọ kwẹẹ̣tẹ, dọ nọ izẹni Oshomoshi si ọgụ yọ. Ọ mẹ kwẹẹtẹ ọzi yẹ irasha ọnọọ nọ, dọ vọ aa zụsẹẹ na kẹnẹ. ⁹ Zirẹngwụ ọdọwụ ọnọ si ra tụ irẹkụra azẹnẹsa vene ọzọga ini ẹtẹ ọni Oshomoshi da yọ. Ọn ri ezi aani Aiziki ọnri Ijekọbụ ẹnẹ gẹ ra tụni ajengwụ ẹnẹna nyi ọgiga ini otoowu Oshomoshi. ¹⁰ Fụvọki irẹkụra ana nyi oshiẹtẹ ọnọ kụeyitụra, irẹkụra ọnọ vi ki Oshomoshi ọnọ vi ọdareshi ọnri ọtụrareshi aani. ¹¹ Zirẹngwụ ọdọwụ, shọmẹ daka vi ki Isera nyẹmbẹ vi ọgụọri, di Abrahamụ dọ ụkata ozi ọmima, dọ si vara adozi. Ọ maan vi fụvọki ọmẹ daka vi ki Abrahamụ si para ẹfi ozi ọmima fu, ọ divenu ki ọzẹna mẹ otowu yi ọni vi ọnirẹiza. ¹² Fụvavọ fiini ọzọnya ọnọni ana gamo su, ọna ya ma ezi venebiri ụzomi ana chaka shi ovurukutu ini ụrụrụ, venebiri ezi ini ụtọ irefu ana rai zụa zika. ¹³ Zirẹngwụ ọdọwu ọni enbo ye su, de rezi ri otowu ẹnẹ dọ. Akikọnọ, inaama one re wa, dẹ kụ wa da, fụri irasha ọgọdọ, di ẹn nyẹmbe va dọ zẹ ki azẹga ọnri azẹna fụ tụẹshẹ ọnẹni vi. ¹⁴ Fụvọki ẹnẹna maan ka ẹngwụ irẹyi ẹnẹni ẹ siọzụ ki enee si irẹkụra ọnẹni va sii mẹ ayi awụọnini ụvọta. ¹⁵ Aaviki irẹkụra ọnẹ jinẹ fụrẹ ọnẹ yaan e ro inọpati aani, o yeen tu ụpọnya dẹ kaa ki ẹ naa neeshi. ¹⁶ Ama ọmẹ va ya aani, irẹkụravabẹ one zoza funa izẹnẹ fụrẹ; ọnọni ọnọvi irẹkụra ineeku. Fụvavọ, ọzi vi ụshiọnyi yi Oshomoshi ki ọni ọnọ vi Oshomoshi aanini, ọmẹ vi ki o teni irẹkụra ọbani ọsa tẹtẹ yụ wa da. ¹⁷ Zirẹngwụ ọdọwụ ọni Abrahamụ ya si Aiziki misevọ, ẹfiẹni Oshomohi zama a re. Ozi ọnya chọ ọnọ nyi ọnọ si misẹvọ yi Oshomoshi, ọni ọna mẹ otoowu yi. ¹⁸ Abraamu ọna kaa yi ka, "Zirẹngwụ Aiziki ọna va ya si irẹsha yi ezirama awụ." ¹⁹ Di Abrahamụ ro ki Oshomoshi va zụụ sha Aiziki fiini akaakana ẹnene fu su varama vẹshẹ; aa vana kaa ki a zama ireyi ọnọni re, fiini akaakana aanini ọni Abraamu dọ Aiziki varama fụrẹ vẹ. ²⁰ Zirẹngwụ ọdọwụ inọpati isẹnaa vẹ ini iramụrụọ, ọni Aiziki si mẹ ẹdabẹrẹ yi Ijekọbụ ọnri Isọọ. ²¹ Ẹfiẹni Ijekọbụ e vee su, zirẹngwụ ọdọwụ ọnọ si mẹ ẹdabẹrẹ yi ezi Ijosẹfụ ọzọọza. Ijekọbụ vana kụa vaa zirẹ ọchiọkẹtẹ, dọọ fẹkẹ Oshomoshi. ²² Ẹfi Ijosẹfụ me tu ọnọọ vaa na, zirẹngwụ ọdọwụ ọni Ijosẹfụ ya karẹyi inọpati ezi ani Isrẹni nin mẹ vaa fụri Ijipti, dọ sumọ kaa yụ wa inọpati ọchụkụ ẹngwụ aani. ²³ Inaama ana ma Imosisi, zirẹngwụ ọdọwụ ọna ya si Imosisi tẹ gụ gụ ụfẹ ẹẹta, fụvọki ee re ki ozi ozoza ọnọ vi. Angwa ozi shi wa ki oshinọyi ọ mofi tẹtẹ. ²⁴ Imosisi mẹ si fụ, zirẹngwụ ọdọwụ ono si yi ki asa shi ọni aazi Ifero. ²⁵ Dọ kaa ki ọn va bẹrẹ aza Oshomoshi rụya, akikọnọ ọ vọri ki ọnọ riẹshẹ aichama ini ẹfi keere. ²⁶ O roo netu ki ụshiọnyi ana yini ọvivatụra Ikristi ọ nyi ụbani funa ogu keekere ana yi Ijipti. Fụvọki ọgụ ọnọ vaa ri ini Ananyiyi ọnọ kụeyitụra. ²⁷ Zirẹngwụ ọdọwụ ọni Imosisi kwẹẹtẹ fụri Ijipti. Ozi nyi angwashi ọikụ oshinọyi, fụvọki ọ nyi ọsiengwụdọ, do vene ki o re Ananyiyi ọni ọza re me re. ²⁸ Ziri ọdọwu ọnọ si ri Upe Ọpiparafu ọnri ochiche anya sẹ, doti asi odusa vasha ana wụ ozi ipapa nin zụ kani ezianẹrụ ipapa ani Isrẹni nini. ²⁹ Zirẹngwụ ọdọwụ ọnẹ si sụfụfụ jinẹ okufa Iridi venebiri ki ẹtẹ osusu ẹnẹ zi parafu. Ani Ijipti nin mẹ moọ̣re, di enyi mụnẹ wa. ³⁰ Zirẹngwụ ọdọwu ọni ọvọ Ijẹriko ye wu nyẹtẹ inaama ọnẹ si ẹkushi ishimba vara kara a. ³¹ Zirẹngwụ ọdọwụ Irehabu ọsẹrẹka rezi si su bẹrẹ anakamawụ nin fụvọki ọ tanụvọ ẹngwọrọ dọ azẹna tụ ki e bebe na zamẹtẹ. ³² Yere ọnim kụ zẹ vaa ka tụọ? Ma zi nyi ẹfi ọnim va zụ ku si karẹyi inọpati Igidiọni, Ibaraki, Isamsini, Ijefita, Idevidi, Isamụẹni ọnri ọkisẹ nini. ³³ Zirẹngwụ ọdọwụ ọnẹ si fụrẹku ijọva, dẹ jishi ẹtẹrẹ, dẹ ri ọgụ otoowu. De za idu nini irenu kuoku, ³⁴ De mii ụkata ira, dẹ javo finụvọ itakovi, da fụ wa ikụ ẹrụrụ ẹrụrụ sha, dẹ vara azẹbani ini irẹkụ ọkikụ, dẹ fụrẹkụ one pe irẹkụra ẹrụrụ ẹrụrụ kụ. ³⁵ Anyẹnẹ nin e re aza aaniniene fusu varama zirẹngwụ ọshi sha kwẹẹtẹ fiini isu. Ẹnyi vana mụyari ̄noze ana razi sẹrẹ, dẹ razi zẹ ki a fụrẹ ẹni ụvọ, doti ọshisha kwẹẹtẹ aani ọ zụ vi ebebaani. ³⁶ Ẹnyi vana zamare ini ụshiọnyi ọnri ọsi si inori tu, ọkikụ ẹba shi wa afụ, da kụ wa shini ijaaru. ³⁷ Ee ne wa akụkụ. A sha wa tụ oze ẹẹva. Aa si itakovi wụ wa. Dẹ kụ ụpa atẹmẹ ọnri ụpa ẹvụ ku ẹngwụ aa ngwụọ ziizi. Onriwa ọnẹ vi, daa va wa iriw, daa mụyaa rụ wa. ³⁸ Anẹshẹ nin ẹzi nyi ụbani yaa wa. Dẹẹ ngwụ ọ ziizi ini ụnọmi, ifege ọnri ụtafa; shi ụsi inẹtẹ vọnẹẹ ngwụ. ³⁹ Shọmẹ daka vi ki azẹnenị bo ọni Oshomoshi dọ ivenu fuvọ ọdọwụ aanini, ama ezi re otoowu ọnọ dọ. ⁴⁰ Oshomoshi ọ mẹ eto ene fu bo tẹtẹ yi yi, doti asa vara wa ọgụrigụ, ọọzi vi zirẹngwụ ayi.