¹ Fụvavọ, ọmẹ vi ki onivẹnụ ẹrụrụ ẹẹ varakara yi, a navọ di ya kụ isa bo ana vaya yi vasha, shi aichama one zu gẹ yi ẹngwụ. Navọ di ya vẹngwụnẹtẹ di yee zuechi ọdọwụ anạ yini ọvidi ayi. ² Navọ di ya kụ ọtụtụrụma tụra Ijesu ana vi ivẹrẹ ọdọwụ, ọnaa mẹ ọdọwụ ayi ọgụrigụ. Fụvọ ụjẹ ana si tụni ọvidi aani, dọ siẹngwụ dụya ini ọchi avashi, do mii ụshiọnyi ana yinaani aba, dọ na yatụ tụni aka ụvọri ogede Oshomoshi. ³ Fụvavọ, ro inọpati ọzẹnọ vi ki ọ siẹgwụ dụya ọkikachire oni anaichama nin mẹ shi o, doti asọ na tụ wụ ini ọtuturuma, dụụ va na varạma fiini ọdọwụ. ⁴ Wai di dinẹ gerigeri veyi irazi ka aichama netu ki e che anya awụ sẹte; ⁵ ọnri ki we shayi ọtitụ ọna tụ wụ nin ụkata zirẹngwụ ọzizụ vene ezi: "Ẹwụ ozi ami, asụụ sieyiwụ ofuvọ Ananyiyi, navẹki ọ tụ wụ aaviki ọ zụ wụ oze ana sẹrẹ." ⁶ Fụvọki, ọzẹni Ananyiyi sirẹyi aani ọnọọ tụ ofuvọ, dọọ mụyari ọzọọza ini ozi aani bo ọnọ ra tanụvọ dọ. ⁷ Siẹngwụ dọ ụyọọri vene ki Oshomoshi vanaa siọ zụ wụ irẹyi. Oshomoshi vene pe wu nin mẹ vene ada mẹẹ pe ozi mẹ. Ọwa nyi ozi ọni ada aani ra ma zụrẹyi? ⁸ Ama, aaviki wa zi nyi ọzizụ ọni aza bo nyi ọgiga inaani, ọnọ vi ki ozi inavi ọnụụ vi nini, wa zi vi ozi aani nin. ⁹ Zẹtụọ, ya nyi ada nin ini oze ẹchẹngwụ, ana zụ yi irẹyi, dii dụbani yụ wa. Ọwa razi vọrọ ki ya wụrẹyi tụ ana vi Ada ifẹ bo irenu, doti yaa mẹshẹ? ¹⁰ Fụvọki, inoze ọnya, ada ayi nini ẹ zụ yi ireyi ini ẹkụshi che inoze ana sẹrẹ ini eyi aanini. Ama inoze ọsa, Oshomoshi ọ zụ yi irẹyi, dọ siọ mọgụvọ yi yi, doti ya zụ nyi ọgiga ini ọnini aani. ¹¹ Ọzi nyi ọtituofuvọ onee shine ụmavọ. Ama, ụmoretu dọ tụ ẹtụtụ engwọrọ ọi ireizạ yi ẹnẹna siọ pa. ¹² Fụvavọ si ụviẹchi yi avọ awụ ana vashi, shi iduunku awụ ene ku che. ¹³ Waa zụsẹ inoze ana vọrọ ini Ijesu, doti asi isẹnẹ bidi kụmi tẹtẹzẹ na bụnẹ, akikọnọ navọ doti ọ vi. ¹⁴ Re ku wee pe aza bo ra ini engwụọrọ ọnri ọnini, fụvọki ọọzivavọ, ọzi nyi ẹzẹne ve zuu re Ananyiyi. ¹⁵ Yarazi, doti asọ na nyi ẹzẹna razi nyi ọiza ọfẹ Oshomoshi, onri ka asọ na nyi ẹpa inoodu, ana vaa chi jinẹ, dọọ na kụ ireyi shiẹtẹ, doti asi azẹrụrụ va na kụ ẹngwụ ku inaani. ¹⁶ Yarazi asọ na nyi ẹzẹna mẹ abedu asụ navẹki ẹzẹna razi nyi Oshomoshi venebiri Isọọ ana fụvọ isari ụpọnya na ọkụshi irẹsụ aani. ¹⁷ Fụvọki waa yẹ ka, inaama ọnọ, doo vee si ki ọ naa ri ọgụ ẹdabẹrẹ aani, de yi o tẹtẹ, fụvọki ọi ve ku roze rinẹ varama, shi ọ mẹ daka kẹgọ tụọ, o mee sio varama. ¹⁸ Fụvọki aivi irẹsụfa ana va zụụ sụvọ kani ọnụụ vẹ inaani, irẹsụfa ira anaa za, oozi, ọkarẹsụshi, ọnri opoonu. ¹⁹ Aivi izẹni ikakanchi yaa sụrẹyi ọnụụ vẹ, naveki u ve tu ọngwẹ ana kareyi, di ẹnẹnaa wụ irẹyi ọnọ aa dipẹ ki asọ kụ karẹyi ọsavyi ẹni. ²⁰ Fụvọki ẹi zụ siẹngwụdọ iisẹnakaa yụ wa ki ẹ mẹ, ka, "Shọọ daka vi ki ụsụpa ọnọ kani irẹsụfa ọnọ, a bẹdọ vaa si irẹta wụ ọ." ²¹ Izọ o shu wa angwa netu ka, di Imosisi kaa ka, "Angwa o shimi ee shi mi, ẹngwụ ami aa ba." ²² Akikọnọ, izẹnụụ vẹ vi irẹsụfa Izayọni ọnri irẹkụra Oshomoshi ana nyifẹ, Ijerusanẹmụ ineeku ọiza ọnri idi angẹni akashi oze ẹẹwụ avaavọ oze ọrụrụ anaa jụjẹ. ²³ Iragụ ozi ipaapa ọnụụ vẹ nini, ana si irẹsha aani tẹtẹ tụ ineeku ọiza. Wa vẹ idi Oshomoshi ọmishọọji isa bo ọnri ife aza ọiza bo ọnọ vi ki a vara ọgụrigụ da. ²⁴ Wa vẹ idi Ijesu ana vi anakaakana irẹzẹ ọwọọwa ọnri anya one che sẹte,̣ ọnọ si vi ki irẹyi ọni anya aani ka o funa irẹyi ọni anya Ebẹẹni ka. ²⁵ Re kụ wa zi mẹ akamawụ shi Oshomoshi ọnaa karẹyi yụ wụ. Fụvọki ẹ mẹ razi javọ rẹsụ rẹsụ ẹfiẹnẹ mẹ akamawụ shi ẹzẹna kareyi shi wa in ẹshẹ ọnọni, ọmẹ fufuvaavii yi ẹyi aavọ, aaviki ya mẹ akamawụ shi ẹzẹnaa kayọnọ fụri ineeku ọiza. ²⁶ Ini ụmẹ ọnyi, ọngwẹ aani o sheni ẹshẹ. Ama, ọmẹyani, o woto da ka "Ụpọnya tụọ, aivi ẹshẹ renya ọnim vee sheni, shi ẹbẹẹba bo vọnim vee sheni." ²⁷ Ọshafụ sha irẹyi ẹnẹni, "Ụpọnya tụọ," onọ vi ka, a vaakụ isẹnẹ va zụụ sheni kụra, ini isa bo ana tụ vẹ vẹshẹ, doti isẹne re me zu sheni ẹ dinẹ. ²⁸ Fụvavọ a navọ di ya kụ Oshomoshi avọ fụvọki yee re ijọva ọni isọnsọnyi rei zue sheni, di ya si ụbani ọnri angwashii fẹkẹ Oshomoshi. ²⁹ Fụvọki Oshomoshi ayi vi ira enee vu isa bo irii.