¹ Navọ di osisi ẹnyara ọọ nọvidi ini akaakana awụ nin. ² Asu shayi kụ wa mẹ irẹiza ka azẹga na nini. Fụvọki zirẹngwụ ọnọni ọni azẹnyi ye si angẹni ọzọga dẹ razi yẹ. ³ Tamayi anijaaru nin venebiri ki e chire wu nini bẹrẹ wa. Tamayi ẹnẹnaa varuwa, venebiri ki ẹngwụ ẹwụ nin nyẹmbẹ vana yini ẹngwụ aanini. ⁴ Navọ doti aza bo ẹ sụbani yi ẹshẹ eserevạ. Navọ doti ode esereva ọ vi ọnini, fụvọki Oshomoshi vaa mishọọji yi ẹnẹna mẹ udu asụ ọnri irẹka ọsisẹ. ⁵ Navọ asụụ nyi osisi ẹkẹshi ini ọmimẹ awụ. Navọ di isa ọnụụ ra nyi ọ ̣fụ wụ, fụvọki Oshomoshi nyẹmbẹ ọ kaa ka, "Ma zaa fụrẹ wụ ụvọ, domotori ki maa jụ wụ tẹtẹ." ⁶ Navọ doti isa ọnii ra nyi ọ fụ yi, di ya zụ nyi ọtụtụrụma kaa ka "Ananyiyi ọnọ vi ọnọgụvọ ami; angwa ozee shi mi. Sọni anẹshẹ va zụụ sii mẹ mi kẹ?" ⁷ Si ọdọvidi awụ nin zama irẹyi ọnọni re deere, ẹnẹna kareyi Oshomoshi yụ wụ nin, dụ wa zama ọvairẹsụ ọmimẹ aanini. Fama wa ini ọdọwụ aanini. ⁸ Ijesu Ikristi mẹ ya irẹri, avọ ọnọ mẹ ya irajini, ọnri poro pooro. ⁹ Asụụ navọ ki ọzizụ renyi renyi ọ za wụ nin nyeeyi. Fụvọki o zoza ki ọiza ọfẹ ọnọ ra tụ ọtụtụrụma ayi ụkata, aivi zirẹngwụ isari ọna razi nyi ọgụvọ ọnọọ mẹ yi ẹnẹnọ vi ki ọi isari kẹnẹ ọnẹẹ wụ. ¹⁰ Yaa nyi ọpẹtẹ ọnọ vi ki ẹnẹnaa mẹ irafẹkẹ ini ireshi Oshomoshi ẹzi nyi ụmọ ki ẹ ri isari aani. ¹¹ Fụvọki anya isụpa ana wụ fụvọ aichama vọni oshirẹsụ arụfa si anya aani na ngwụni irẹngwụ ọnini, ama dẹẹ jinẹ tụra fiini akaakana aza na ri uye isụpa ẹnẹ ira ini ẹshẹẹshẹ. ¹² Avọ ọni Ijesu mẹmẹ rụya ini ẹshẹẹshẹ ọchiọfọ irẹkụra ana zi ngwụ irekura, doti a zirẹngwụ aani vara a tụni ọnini. ¹³ Fụvavọ a navọ di ya a jinẹ ne tuo ini ẹshẹẹshẹ̣ ọba, di ya siẹngụdọ ụshi ana mẹ nyi ọ. ¹⁴ Fụvọki ya zi nyi udi tụ irẹkụra izọni poro. Akikọnọ, ana yini ọvidi aa vẹ ọni yee si. ¹⁵ A navọ di ya zirẹngwụ aani mẹ isẹvọ ụga yi Oshomoshi, ụga ana vi ẹtụtụ onupa ọnaa shi irẹsha aani. ¹⁶ A navọ asii shayi ọiza ọminẹ ọnri ọgụvọ ọmimẹ yi ẹngwụ. Fụvọki ẹngwụ isẹvọ ẹnẹni ọnọọ mẹ Oshomoshi inẹ ẹ shine kokoro. ¹⁷ Wụrẹyi tụ oshirẹsụ awụ nin irenu, dụ we nyimarẹsụ nẹtẹ yi ẹnẹnaa kụ ụ nin zi, fụvọki eni ẹnaa sieyipe ifẹ awụ nini venebiri ẹzẹna vaa karenube inọpati awụ nin. Wụrẹyi tụ wa irenu, doti ẹ zụ mụkọrọ aanini bẹrẹ ụjẹ, aivi ka dẹẹ rifufu, ana razaa mọgụvọ yụ wụ nin. ¹⁸ Tụozurenu yi yi nin, fụvọki ya dọ ẹngwụ ayi irenu ki yaa nyi ivefu ọnini, ọnri ki yee si ki ya mẹ ana vọrọ ini isa bo. ¹⁹ Maa tụ wụ ụkata kụ wa sikamarenu tụọ nin, dụ waa mẹ isọnọni, doti a jantụ zụ si mi varama ve tu wu nini. ²⁰ Ọmẹyani, Oshomoshi ẹngwọrọ ana si ọkụatẹmẹri fiini akaakana ẹzẹne fu su va vẹshẹ, Ijesu Ananyiyi, zirẹnvwụ anya irẹzẹ poro pooro, ngwụ ini anya ni, ²¹ ọ va mẹ wụ ọgụrigụ ini isa bo ana vi isọiza, dụ wa va zụ mẹ osisi aani. Oshomoshi ọva va mẹ ụkọrọ ininẹ ayi, ana vaa mẹ yi inẹ shine inọvidi aani, zirẹngwụ Ijesụ Ikristi ana nyi ụga poro pooro. Aami. ²² Ọmẹyani, maa tụ wụ nin ụkata, ẹwụ nin ẹnyara ami, siẹngwụdọ irẹyi ọtitụ ọza ụkata ọnim chẹrẹ tushi wu nin. ²³ Mee si kụ wa yẹ nin ka, a na, ọnyara ayi Itimoti, tụ da; ẹmi riọ vaa vẹ vee rewu nini ini ene rezee ku, aaviki ọ jantụ vẹ. ²⁴ Kụ ọdọvidi awụ nin bo, shi anọdọwụ nin bo. Ẹnẹna fụri Itani vẹ ki a kụ wụ nini. ²⁵ Ọiza ọfẹ ọ va yabẹrẹ wụ nin bo.