¹ Fụvavọ, a navọ di ya fiini enyima irenube Ijesu, di yaa si irẹyi ayi nọvidi na ngwụni irẹyi ụvira. Navọ asii shẹshẹ zẹ nee nyima tụni irẹyi oshiẹtẹ oririnẹ varama fiini ụkọrụvọ aichama, ọnri ọdọwu ini Oshomoshi, ² navẹki ọzizụ inọpati isami, ọkikụavọ tụra aza, ọshisha kwẹẹte fiini isu, ọnri ishọọji ana vaa yinaani poro pooro. ³ Ii vọọ zẹ va mii mẹ ọnọni aaviki Oshomoshi ọ yi yi oze. ⁴ Fụvọki ọ vaa ngwẹngwụ yi ẹnẹna bidi nyi ọyiyẹ inọpati Ikristi, dẹ da irẹiza ọnọ mẹ yi yi fụri ẹbẹẹba ree da, dẹ nyi ọgiga ini Ifẹ Ọnini; ⁵ dẹ zẹ da irẹyi ọiza Oshomoshi ree da, ọnri ụkata ọni Oshomoshi va sii zụ ini iramụfụọ, ⁶ ama dẹ sẹdụ fiini ọdọwụ --- azẹi kụ zụa za wa varama vini oririnẹ varama. Ọmaan vi fụvọki ee teni sụvọ aanini kani Ozi Oshomoshi za ọchi avashi, dẹẹ mụshi nyi ọ ini orere. ⁷ Fụvọki ẹtẹ enee fu enyi orishi ọnaa zụụ tụ ọ ụmẹ tụrụmẹ, dọọ mẹ ki isararẹ ọ chi, ọna vaa mụgụvọ yi ẹzẹna fụvọ aani mụkọrọ tụni ẹtẹ ọnọ --- ẹtẹ ọnọni ọni Oshomoshi mẹ ẹdabẹrẹ yi. ⁸ Ama, aaviki ọchi ikeyi ọnri ọchi irẹmani ẹnẹ chi fi inaani, ọnọvi ki ọzi za rẹsu, dọ dọgụ gụrẹ ekuochi. Ọvairẹsụ aani ọnọ vi ki a vaa riọira. ⁹ Ama, ẹwụ nin ọnim ngwụayi aani, shọọ daka vi ka ii maan aa ka, maa yẹ ini oze ana razi nyi ọjirẹka kụ waa mẹtẹrẹ funa wa nini inọpati ọdidọtụ. ¹⁰ Oshomoshi ọzi vi anarima manasẹrẹ ene vee shayi ụkọrọ awụ nin ọnri osisi ọnụụ si zụ fụvọ irẹsha aani, fụvọki waa mọguvọ yi anọdọwu nini, venebiri ụụ maa mii mẹ nini. ¹¹ Osisi ayi ọnọ vi ka ọzọnyọnya awụ nin ọ si kamarenu poro na ngwụrẹsụ, fụvọ ọkụayitụra ọnụụ nyi nini, ọna razi nyi ọjirẹka. ¹² Ọ maan vi fụvọ asi iriworo na ngwụ wụ nin ẹngwụ, ama dụ waa fama ẹnẹna zirẹngwụ ọdọwu ọnri ọsiẹngwụdọ kụ otoowu ẹnẹ ogu. ¹³ Fụvọki ẹfiẹni Oshomoshi mẹ otoowu aani yi Abrahamu, dọ si ẹngwụ aani shieku, fụvọki ọzi nyi ọza ene funa ọnọ va sii shieku. ¹⁴ Dọ ka, "Mi bẹdọ vaa mẹ ẹdabẹrẹ yụ wụ, dim mẹ ka ezirama awụ ẹ rụrụ." ¹⁵ Avọ ọni Abrahamụ me re isa ana mẹ otoowụ aani yọ dọ inaama ọnọ si ishuru zi otoowu ọnọ. ¹⁶ Fụvọki aza vanaa si ọza ene funa waa shieku. Inaama ẹshankata, dẹẹ si eku ọshishi vuoirẹsụ. ¹⁷ Ẹfiẹni Oshomoshi si ka ọ naa si ọ zu ẹnena vaa kụ otoowu awụọni ogu ẹtẹrẹ ki ọnọ zaa vara ọmimẹ otoowu awụọni, dọ si eku ọshishi vuoirẹsụ. ¹⁸ Fụvọ isọnọ maan si mẹ ọnọ vi ka, zirẹngwu isa ẹẹva ana rama vara --- ọnii va sii yẹ ki Oshomoshi ọizụa nyapinẹ, doti ẹyi ene zue na riẹngwụ aani, azụ tụ yi ụkata, di ya zụ sụvọ za ọkikụayi tụra ana si tụ yi ọvidi ẹtẹrẹ. ¹⁹ Yaa nyi ọkụayitụra ọnọni, ana za ọtụtụrụma ayi dinẹ ẹtẹrẹ, ọkụayitụra ọna jinẹ ita-ọjioze na ngwụ irẹngwụ ininẹ ọnini. ²⁰ Ijesu ọ fụvọ̣ ayi dọvidi na ngwụ izọ, ọ mẹ vara oshirẹsụ arụfa ireshi Oshomoshi poro pooro venebiri Imẹkizẹdẹẹki.