¹ Fụvọki oshirẹsụ arụfa bo ana ra ni fiini akaakana aza, vọna ni ki ọọ mẹ irama aza inọpati isa bo ọni Oshomoshi nyụvọ tụ, doti ọ zụụ si isa mẹ irẹiza ọnri isẹvọ fụvọ aichama. ² Dọọ zụa si ẹngwọrọ za ẹnẹna razi nyi ọyiyẹ ọnri ọnudu nini fụvọki ọn nyẹmbẹ vọni ụkụmi varakara. ³ Fụvavọ, ọ sẹrẹ ki ọ zẹ mi mẹ isẹvọ yi ẹngwụ aani fụvọ aichama ayaani vene ọ mẹẹ mẹ ẹ gẹdẹgẹdẹ fụvọ aichama azẹnẹ. ⁴ Ọza ọma kwẹẹtẹ kẹnẹ dọ nayini ipo ụbani ọnọni. Akikọnọ, Oshomoshi ọnọ shi ọ, venebiri a mẹmẹ shi Erọọnụ. ⁵ Inoze ọnyọnya, aivi Ijesu ọnọ mẹ ẹngwụ aani oshirẹsụ arụfa fụvọ dọ zụ siọ nyi ụbani. Akikọnọ, di ọza enee pe e karẹyi, ka, "Ozi ami ọnụụ vi; Maa si vara Ada awụ irajini." ⁶ Avọ ọnọ mẹ zẹ ki kaa irasha ọsa ini iwe ọnini, ka, "Oshirẹsụ arụfa ọnụụ vi poro pooro venebiri Imẹchizẹdẹẹki mẹ vi." ⁷ Ụmẹ ọni Ikristi yini ẹchẹngwụ, ọ si owuọna tuozurenu, dọ mẹ ipọọdọ vabẹrẹ une ọnri ẹgọ shi Oshomoshi, ana va zụụ dọ ọ tụ fini isu. Di Oshomoshi wụ ozurenu aani fụvọki ọ si ọtụtụrụma aani yi Oshomoshi. ⁸ Shi ọmẹ vi ki ozi Oshomoshi ọnọ vi, ọ kọsuẹ a mẹmẹẹ wụrẹyi tụ ọ irenu fini ụyọọri aani bo. ⁹ Oshomoshi ọ mẹ ẹ ọgụrigụ, da si ọ mẹ ọza ọnọ vi ki aza bo ana ra vatụra irẹyi aani vaa nyi ọdidọtụ poro pooro. ¹⁰ Oshomoshi ọnọ si ọ mẹ oshiresụ arụfa venebiri ẹngwụ ọi Imẹkizẹdẹẹki mẹ ya. Asụụ va fiini ọdọwụ awụ ¹¹ Yaa nyi irẹyi ọrụrụ ọni vaa ka inọpati Ijesu, ama ọ ngwụyi ẹngwụ ọshishaafụ sha, fụvọki irẹyi ọma jantụ ngwụ wụ nin ụtọ. ¹² Fụvọki ọ vọrọ ki ẹwụ nin ọ yaan kụ zẹẹ zụ aza isa ọmẹyani, ama ọ nyi nyi ọna vọ che ọna vi pataki, ọnọ vọrọ ki a savọ zụ wụ nin da inọpati irẹyi Oshomoshi. Enyi irẹva ọnọ sẹrẹ wụ nin, aivi isari oboro! ¹³ Fụvọki ọzẹna re fi fu enyi ireva ọzi nyi ọnọ yẹ inọpati irẹyi ọmimanasẹrẹ; ozueyi ono si vi vi. ¹⁴ Ama, azẹkụ ẹnẹẹ ri isari oboro. Ẹni ẹnẹ vi aza ọnọ vi ka fụvọ ụvira aanini, ẹẹ kọsụẹ ọyiyẹ ana mẹ ka ẹ yẹ ọiza renyi yi ọshimi.