¹ Fụvavọ, a navọ di ya si eyi pe ẹngwụ, doti aso ve ne vene ka ọzọnzọnyi inaawụ nin ọi zụ zi gụrẹ otoowu ọna mẹ tẹtẹ kụụ vaa ngwụni ifooshi Oshomoshi nin. ² Fụvọki irenube ọiza mẹ vi gẹdẹgẹdẹ, avọ ọna mẹ kaa yi yi. Ama, irẹyi ọnọ ọzi mẹ ọiza yi ẹnẹna razi si ọma vọnya ini ọdọwụ bẹrẹ ẹnẹna vatụra irẹyi ọnọ. ³ Fụvọki ẹyi ana dọwụ ọnọ vaa ngwụni ifooshi ọnọ, vene ọ mẹ kaa, ka "Vene mmẹ si ọikụ shieku, Ọzi nyi ẹfi ọnẹ va sii ngwụni ifooshi ami." Shọmẹ vọọ daka vi, ini ivẹrẹ ẹshẹ ọni ụkọ̇rụvọ aani ta mẹ. ⁴ Fụvọki ọ nyi irasha ọnyi ọnọ ya karẹyi inọpati ọkụshi ọfụshimba, ka, "Oshomoshi ọ shife fiini ụkọrụvọ aani bo ini ọkụshi ọfụshimba." ⁵ Dọ zẹ kaa ka, "Ẹ zaa ngwụni ifooshi ami." ⁶ Fụvavọ, fụvọki oze yi yinaani ki azẹnyi ẹ ngwụni ifooshi aani, ọnri ka ani Isirẹni ẹrụrụ ana wụ irenube ọiza aani ẹ zi ngwo ̣ọ fuvọ akamawụ. ⁷ Oshomoshi ̣ọ zẹ si ọkụshi ọnya tẹte anaa shi "Irajini." Inaama ọkụshi ọrụrụ dọ zirẹngwụ Idevidi zẹ kaa, vene a mẹ abidi kaa tụọvidi, ka, "Aaviki wa wụ ọngwe ami irajini, asụụ mẹ ọtụtụrụma ọkata nini." ⁸ Fụvọki aaviki Ijoshuwa ọ yaan si ifooshi yụ wa, Oshomoshi ọzi yaan kụ zaa karẹyi inọpati ọkụshi ọsa. ⁹ Fụvavọ, ọ nyi nyi ọkụshi ifooshi Isabati ana mẹ tẹtẹ yi aza Oshomoshi. ¹⁰ Fụvọki ẹzẹna ra ngwụni ifooshi Oshomoshi vene ze shi shifẹ fini ụkọrọ aani, vene Oshomoshi me shifẹ fini ụkọrọ aani. ¹¹ Fụvavọ, a navọ di yee sioze imẹmẹ vaa ngwụni ifooshi ọno, doti asọ nyi ọzọnzọnyi ọna vaa sẹdụ ngwụni ẹngwụ akamawụ ẹnẹ mẹ. ¹² Fụvọki irẹyi Oshomoshi ọ nyifẹ, dọọ mụkọrọ, dọ zẹ rẹ funa itakovi ọ nyi eyi ẹẹva. Ọọ rẹ netu ka ọọ ngwụninẹ ọtụtụrụma ọnri ifẹ, dọọ sha wa shi yiẹngwụ; shi ẹgẹ ngwụ bo ọnri ụshi ininẹ ọchụku vọnọ shaashi yi ẹngwụ. ¹³ Ọzi nyi isọnyọnyi ana tụ vẹshẹ ana tẹ yi Oshomoshi. Akikọnọ isa bo vana tụafụafụ, dọ fụ sha ineyi ẹzẹni ẹyi bo vaa karenube ụkọrụvọ ayi zụ. ¹⁴ Fụvavọ, ọmẹvi ki yaa nyi oshirẹsu arụfa ana zi ẹbẹẹba bo parafu da, ana vi Ijesu Ozi Oshomoshi, a navọ di ya ta ọdọwụ ayi ku ẹtẹrẹ. ¹⁵ Fụvọki aivi oshirẹsụ arụfa ọna razaa nyi ayụva yi yi fụvọ ụkụmi ayi ọnii nyi. Akikọnọ, yaa nyi ọza ọno ̣vi ki a zamare inoze turoze venebiri a mẹ zẹ zama nyẹmbẹ re, ọọsifini ki ọ zi nyi aichama ọnyọnyi. ¹⁶ Fụvavọ, a vẹ di ya si ayiọvanẹtẹ kavape ogede ọiza ọfẹ Oshomoshi, di ye zu re ayụva dọ, shi ọiza ọfẹ ọna vaa mọgụvọ yi yi ini ụmẹ ọngwẹngwụ ayi.