¹ Fụvavọ, ẹwụ nin ẹnyara ami ọnini, waa nyi ọgiga ini ọshishi ana fụri ineeku. Ẹwụ nin ọ nyi oriro inọpati Ijesu, ọna vi ẹzẹnatụ vẹ ọnri oshi arụfa ọnụụ divenu ki ya dọwụ. ² Ọnirẹiza ọnọ vi yi Oshomoshi ana shaatụ renyi, vene Imosisi mẹmẹ vi ọnirẹiza ini ireshi Oshomoshi. ³ Ijesu ọ nyi ụga funa Imosisi, fụvọki ọzẹna da ireshi ọ nyi ụbani funa ireshi ọnọ. ⁴ Fụvoki reshi bo ọnọ nyi ọza ana da a, ama Oshomoshi ọnọ misa bo. ⁵ Inoze ọnya, Imosisi vi ozida ọna nyi irẹiza ini ireshi Oshomoshi bo. Ọni ọnọ divenu tụọvidi inọpati isẹyi ana vaa ka ini iramụfụọ. ⁶ Ama, Ikristi ọnọ vi Ozi ana si ireshi Oshomoshi chirụvọ. Ireshi aani ọnii vi aaviki yaa nyi ayọọvi ọnri ayiọvanẹtẹ ini iribatọ ayi ne tuẹtẹ. ⁷ Fụvavọ, vene Ifẹ Ọnini mẹmẹ kaa gẹdẹgẹde ọnọ vi, ka: "Aaviki wa wụ ọngwẹ aani irajini, ⁸ asụụ mẹ ọtụtụrụma ọkata nini vene ọmẹ vi ini ụmẹ akamawụ ini ẹfi ọni oshuku awụ nin si mọ Oshomoshi re ini ụnọmi. ⁹ Ẹfiavọ ọni oshuku awụ nin mẹ akamawụ, dẹ zama mi re, ẹfiavọ ọnẹ zẹ si si irayi ẹbẹrẹva re ụkọrụvọ ami. ¹⁰ Fụvavọ inẹ ami ozi shine tu evereze ọnọ. Dim ka, 'Ọtụtụrụma aanini vanaa za wa nyeeyi ẹfi bo. Ẹ zi yi yẹ oze ọni me si ki ẹẹ vaa zi.' ¹¹ Vene mmẹ si ọikụ shieku gẹdẹgẹdẹ ọnọvi: 'Ọzi nyi efi ọnẹ va sii nyi ẹngwọrọ ana yini ifooshi ami.'" ¹² Sieyipe ẹngwụ, ẹwụ nin ẹnyara ayi, doti asọ va na nyi ọzọnzonyi ini akaakana awụ nin ọna nyi ọtụtụrụma ọshimi ana razi nyi ọdọwu, ọtụtụrụma anaa varama finaama Oshomoshi ọna nyifẹ. ¹³ Akikọnọ, waa tụẹngwụ ụkata nini eyinieyini, aa si si ọ shi ka "irajini" ọnọ vi, doti asọ nyi ọzọnzọnyi inaawụ nin ọna vaa navọ ki aichama oọ jiọnvene na nyi ọtụtụrụma ọkata. ¹⁴ Fụvọki yaa si vara aza Ikristi aaviki yaa si ụvọ za ọkikụayitụra Ijesu fiini ivẹrẹ poro na ngwụ ikọọta. ¹⁵ Inọpati irẹyi ọnọni, a maan kaa, ka, "Aaviki wa wụ ọngwe aani irajini, asụụ mẹ ọtụtụrụma ọkata nini, vene ẹ mẹ mẹ ini ụmẹ akamawụ." ¹⁶ Ẹnẹ vi ọzẹna wụ ọngwẹ Oshomoshi, dọ mẹ akamawụ ke? Ọ wa para ẹnẹni ẹnri Imosisi jinẹ fụri Ijipiti fu? ¹⁷ Ẹnẹ vi aza ọni Oshomoshi si irayi ẹbẹrẹva mọikụ shi kẹ? Ọ wa para ẹnẹna chamayi fu, ene su tụni ụnọmi? ¹⁸ Ẹnẹ vi azẹni Oshomoshi shieku ki ẹ zaa ngwụni ifooshi awụọni kẹ, ọọ zi vi ẹnẹna mẹ akamawụ shi O? ¹⁹ Ye re e ka ẹizụ ngwụni ẹdabẹrẹ ifooshi aani fụvọ arimạdọwu aanini.