¹ Fụvavọ ii bẹdọ vaa kụ ọtụtụrụma ayi tụni irẹyi ọnii wụ kokoro, doti asii va na va finaani. ² Fụvọki aaviki itụ ọna zirẹngwụ angẹni nin va ka vi irẹiza ana dinẹ, ọnri ka aichama ọnri akamawụ vee re ụyọọri ana sẹrẹẹ dọ, ³ ii mẹmẹ va zụụ javọ fini ụyọọri ọnọni ke, aaviki ya sieyiwụ ọdidọtụ ana maan bani? Ọnọni ọnọ vi ọdidọzatụ ọni Ananyiyi bidi showu aani, di ẹnẹna wụ inọpati aani dọirenu. ⁴ Avọ ọni Oshomoshi ọn mẹ zẹ di dọirenu zirẹngwụ ami renyi renyi, isoshishozeyi ọnri oze renyi renyi ọnọ ya si ụkata aani zụ, shi ọiza Ife Ọnini renyi renyi ọnọ ga yi yi vene o me si o. ⁵ Fụvọki aivi angẹni nini ọni Oshomoshi si ẹshẹ anaa vẹ, oni yaa kareyi inọpati aani, chire ụvọ. ⁶ Akikọnọ, ọ nyi ọzọnyi ana yi irasha ọnyi ana divenu ka, "Sẹni ọza vi kẹ, ọna mẹ ki irẹyi aani ọ ngwụ wụ ayi? Navẹki sẹni ozi ọza vi kẹ, dụ waa sieyipe e? ⁷ Waa mẹ ọza, dụụ kaachi che ini ụbani funa angẹni nini; dụụ si ụga ọnri ụbani mẹ okurẹsụ ku o. dụụ si ụkọrụvọ awụ bo chireụvọ. ⁸ Waa si isa bo tụni ẹpẹẹpẹtẹ afụ aani." Fụvọki ọni, ọni Oshomoshi si isa bo chireụvọ. Ọ zi nyi isa ọnọ razi si tụni ẹpẹẹpẹtẹ afụ aani." Ama, ọmẹyani, ye zi savọ ri re isa bo ọna si chireụvọ. ⁹ Ama, yee re ọzẹna mẹ, da kaachi che ini ụbani funa angẹni nin ini ẹfi keere: Ijesu, ọna vi ọzẹna si ụga ọnri ụbani mẹ okurẹsụ ku fụvọ ụyọọri ọnri isu ono su. Fụvavọ, ọmẹyani, oo su yi aza bo da zirẹngwụ ọiza ọfẹ Oshomoshi. ¹⁰ Fụvọki ọọ sẹrẹ ki Oshomoshi ọ kụ ezi aani ọrụrụ va ngwụni ụga, fụvọki zirẹngwụ aani ọni isa bo ana yẹshẹ si yinaani. Ọ sẹrẹ ka ọ mẹ ọdọvidi ọdidọtụ aanini nyi ọgụrigụ zirẹngwụ ụyọọri aani. ¹¹ Fụvọki shi ọza ọna vara aza ọnini ọnri ẹnẹnọ vara tụni ọnini vana chi fụri irasha ọnya vẹ --- fụri idi Ada ọnya. Fụvavọ ụshi ọzi nyi ọ ki ọ shi wa ẹnyara awụọni. ¹² Dọọ ka, "Mvee showu irẹsha awụ yi ẹnyara ami nin, mvaa si ashẹ sụga yụ wụ ini akaakana iragụ awụ. ¹³ Dọ ọzẹ ka, "Mvaa kụ ayi tụra a." Dọ ọzẹ ka, "Re, ẹmi ọnri ezi ọni Oshomoshi si yi mi yi." ¹⁴ Fụvavọ ụmọvi ki ezi Oshomoshi ẹ nyi ọgiga ini ẹchẹngwụ ọnri anyạ, di Ijesu ọn zẹ bẹrẹ wa ga inaani, doti ọ zụ zirẹngwu isu si eshu, ana nyi ụkata isu, kụra finoze. ¹⁵ Ọ maan vi doti, ẹnẹna si ẹshẹ aanini bo vi ọrishi fụvọ angwashi isuọwụọza, ọ va zụ na wa tụ. ¹⁶ Ọvọrọ kụ wa yẹ ki aivi irẹyi angẹni nini ọnọ jiọareyi, ama irẹyi ọina Abrahamụ ọnọ jiọareyi. ¹⁷ Fụvavọ, ọnọ si sẹrẹ ki o vene ẹnyara aani ini ozeturoze, doti ọ zụ vi oshirẹsụ arụfa anayụva ọnri ọnirẹiza inọpati isa bo ọna vi ọi Oshomoshi, ọnri ka doti ọ zụ mẹ oze ayụva yi aichama aza. ¹⁸ Fụvọki Ijesu ọnyẹmbe ọ rụya, da mọọre, ọ va zụụ mọgụvọ yi ẹnẹna mọre.