¹ Ini ụmọkụkụ, Oshomoshi ọ karẹyi yi oshuku ada ayi nin ụpẹrika zirẹngwụ ọkisẹ nin, inoze renyi renyi. ² Ama, ini ẹkụshi ikọọta ẹnẹni, zirẹngwụ Ozi aani ono si pe yi karẹyi: Ozi aani ọnọni ọnọ shatụ renyi ki ọ vaa kụ isa bo ogu. Zirengwụ aani ọni Oshomoshi zẹ zi zi mẹ ẹshẹ keekere. ³ Ọni ọnọ vi ẹtofeyi ọnaa za ini ụga Oshomoshi, ivefu Oshomshi gẹdẹ gẹdẹ ọnọ vi. Dọ vana zẹ za isa bo dinẹ vabẹ zirẹgwụ ụkata ọna yini irẹyi aani. Inaama ọnọ nyina aichama vasha da, dọ na yatụ tụni aka ụvọọri Oshinọyi ẹbẹẹba keekere. ⁴ Ọ nyi ụbani funa angẹni nini vene irẹsha ọgụrigụ ana si yọ mẹ ze fi funa irẹsha angẹni nini. ⁵ Ọ wa nyi ọnya ini angẹni nini ọni Oshomoshi kaa yi da ka, "Ozi ami ọnụụ vi, maa si vara ada awụ irajini" ọnri ka, "Ada aani ọnim vaa vi, dọn zẹ vi Ozi ami"? ⁶ Ama, zẹtụọ, ụmọni Oshomoshi si ozi ipaapa vini ẹshẹ, dọ ka, "Angẹni Oshomoshi bo bẹdọ fẹkẹ ẹ." ⁷ Isẹnọ ka inọpati angẹni nini ọnọ vi ka, "Ọni ọnọ mẹ angẹni nin ki ẹvi ifẹ dọ zẹ mi ezida ani vene ira anaa za. ⁸ Ama, irẹyi ọnọ ka inọpati Ozi aani ọnọvi ka, "Ogede awụ, ẹwụ Oshomoshi, va na vaa dinẹ poro pooro. Ọchi-ụmọ ijọva awụ vi ọchi ishọọji ọiza. ⁹ Wee si irẹyi ọmimanasẹrẹ, dụ nyi ishẹrẹ irẹyi ọshimi ọmimẹ. Fụvavọ, Oshomoshi, ana vi Oshomoshi awu,̣ ọ sha wụ ụ tụ renyi zirẹngwụ angwẹ ụjẹ funa aza bo anavọ." ¹⁰ "Ananyiyi, fini ivẹrẹ ọnụụ fụrẹ si afụ ẹshẹ shiẹtẹ. Ovurukutu ẹbẹẹba vi ụkọrọ ụvo awụ. Ọshishi varama zirẹ anya Ikristi ¹¹ E vee vuri, ama ẹwụ vana vaa yinaani na poro. E vee bo venebiri ita. ¹² Ụ vaa kara wa venebiri auru, daa vara wa venebiri ita. Ama, ụmẹ ya ọnụụ va yii ya, ọkụshi irẹsụ awụ ọzi nyi ẹgẹ." ¹³ Amaa, yere angẹni ọni Oshomoshi si ụmẹ ọnyọnyi kaa yi da ka, "Yatụ tụni akụvọri ami poro netu ẹfi ọnim va sii si ọnivi awụ mẹ irefụ ọnụ vaa kụ afụ tụra"? ¹⁴ Navẹki aivi ifẹ ọni angẹni nin bo vi, dẹ vi ọnitụ ọni Oshomoshii tụ na mọgụvọ yi ẹnẹna vaa nyi ọdọtụ? ̣