¹ Ọọvavi ki Oshomoshi ọ kaụshirẹ nẹ ẹbẹba bẹri Ijesu, navọ du wee si isẹnẹ yi ẹbẹba izọni Ijesu yatụ tụ tụni akụvọri Oshomoshi. ² Kụ ọtụtụrụma awụ nin tụra isẹnẹ yi ẹbẹba, aivi tụra isẹnẹ yi ẹtẹẹtẹ. ³ Fụvọki we su da, di ẹshẹ awụ vutẹ bẹri Ikristi ini Oshomoshi. ⁴ Ụmẹ ọni Ijesu, ana vi ẹshẹ ayi, ra si ẹngwụ zụ, ẹwụ nin nyẹmbẹ vaa bẹrẹ ẹ si ẹngwụ zụ ini ụga. ⁵ Fụvavọ, navọ dụ wa wụ isẹnẹni bo ana yini ẹngwụ awụ ini ẹshẹ ọnọni --- irẹka-ọsisẹ, isa-ẹvụvụ, osisi-ẹchẹngwụ, osisi isa-ọshimi ọmimẹ, ọkikụ eyi tụra isa bo, ọnoni vana siẹngwụgụri ori ọfifẹkẹ. ⁶ Fụvọ ẹngwụ isẹnẹni ọni ọikụ Oshomoshi ene rezi re ẹngwụ aani vaa vaaka ezi akamawụ vẹ. ⁷ Ini ẹngwụ isẹnẹ ọni ẹwụ nin nyẹmbẹ zẹ yaa mẹshẹ awụ nin, ẹfi ọnụụ ra ininẹ aanini. ⁸ Ama, ọmẹyani, u bẹdọ vaa kụ isẹnẹni bo vaasha --- ọikụ ọshimi, ọikụ, aaro ọshimi, ụfụ-ọkikụọza, ọnri ofoto ọkika fineenu. ⁹ A sụụ nyapinẹ yi ẹngwụ nini, fụvọki wa tụ ọza ọkụkụ ininẹ awụ ọnri ụkọrụvọ aani ọnụụ bidi vi neta da, ¹⁰ dụụ chire ọzọwọọwa ana mẹ kụ wa nyi ọyiyẹ ene vene ụmama Oshomoshi ana tụ wụ vẹshẹ. ¹¹ Izọni vi irasha ana razi ya nyi Igiriki navẹki Iju, ọjijụma navẹki arimajụma, navẹki azẹga ana razi nyi isẹtẹ ẹnẹẹ vaatụra, navẹki azeeshi, navẹki ọrishi, navẹki ozi ireshi, ama Ikristi vi isa bo, dọ yininẹ isa bo. ¹² Fụvavọ, vene azẹni Oshomoshi ni tẹtẹ ọnụụ vi nini, ana vi aza ọnini ọni Oshomoshi sirẹyi aani, navọ di inẹ awụ nini o shi yi ayụva, ọiza-ọmimẹ, ọvivẹngwụ nẹtẹ, inẹ ofuofu ọnri ọsisiẹngwụdọ. ¹³ Nyi ọsiẹngwụdọ yi ẹngwụ nini. Navọ waa mọiza kẹngwụ na nini. Aaviki ọ nyi ẹzẹni ọzẹnẹsa mẹrẹyi kụayi, ọ si aichama ọzọnọ vayaani venebiri Ananyiyi mẹ si aichama ayi vaya yi. ¹⁴ One fu ini isẹnẹni bo ọnọ vi kụ wa nyi osisi, fụvọki ọni ọnọ vi ọkikụ aza vabẹ ana vi ọgụrigụ. ¹⁵ Navọ di ẹngwọrọ Ikristi ọ zụ wụ nin mẹ ini ọtụtụrụma awụ nini. Fụvọ ẹngwọrọ ọnọni ana si shi wụ tụni ọvivabẹ ini ẹngwụ ọnya nin. Dụ waa mẹ avọọkụ nin. ¹⁶ Navọ di irẹyi Ikristi ọ ya wụ nin inẹ kokoro. Si ụvira ana yinaani zụ ẹngwụ isa nin, dụ wa siọ zụ ẹngwụ irẹyi nini zirẹngwụ ashẹ ụga irẹyi ọnini Oshomoshi, ashẹ ana fiini Ifẹ. Jashẹ shi Oshomoshi fini ọtụtụrụma avọọkụ. ¹⁷ Isatụrisa ọnụụ raa mẹ, ini irẹyọka navẹki ini ọmimẹ, navọ dụ waa mẹ ẹ ini irẹsha Ijesu Ananyiyi. Si avọọkụ yi Oshomoshi ana vi Ada zirẹngwụ aani. ¹⁸ Ẹwụ nin ese, navọ wa nyimarẹsụnẹtẹ yi ọva awụ nini, vene ọmẹ sẹrẹ ini Ananyiyi. ¹⁹ Ẹwụ nin ọva, navọ we sirẹyi ose awụ nini, asụụ mọikụ shụ wa. ²⁰ Ẹwụ nin ezi, navọ waa wụrẹyi ada ọnri ọnya awụ nini ini isa bo, fụvọki inẹ Ananyiyi venee shine tụọ. ²¹ Ẹwụ nin ada, navọ asụụ mẹ ezi awụ nin ọikụ doti asọ va na tụ ọtụtụrụma aanini ọkụmi. ²² Ẹwụ nin ọrishi, navọ waa wụrẹyi tụ ọga awụ nin irenu ini isa bo inọpati ẹchiẹngwụ; asụụ mẹ ọfatụ-vaku, dụ waa meyi aza, ama navọ dụ waa si ọtụtụrụma ọnini pe waa mẹ. Navọ dụwa nyi angwashi Ananyiyi. ²³ Isaturisa ọnụụ raa mẹ, navọ wa si ọtụtụrụma awụ mẹ ẹ vene ọ mẹ sẹrẹ ki aa mẹ ẹ yi Ananyiyi, asọ vi vene ki aza ọnụ waa mẹ ẹ shi. ²⁴ Dụ wa yẹ kụụ vaa riọgụ aani finụvọ Ikristi ụmẹ ọnụụ ra nyi ọgiga in ogu aani. Mee si kụ wa yẹ ki Ikristi Ananyiyi ọnụ waa fẹkẹ. ²⁵ Fụvọki, ọzatụrọza ana ra mẹ arimamanasẹrẹ vaa rụya arimamanasẹrẹ aani, ọnri ki ọzi nyi amẹri.