¹ Fụvọki mee si kụ wa yẹ ọpa ụya ọnim si ri yụ wụ nini; ẹwụ nin ana yi Inoadisiya shi azẹrụrụ ene rezi ri re mi tuneyi. ² Maa mụkọrọ doti ma zụ tụ ọtụtụrụma aanini ụkata, dụ wa gẹ vẹ ini osisi Oshomoshi ọnri ize ana gụ ini ọkụeyitụra oyiye, na ngwụni ọyiyẹ Ikristi, ana vi irẹiza Oshomoshi ana tẹ. ³ Ininẹ Ikristi ọni isọiza bo ana yini ụvira ọnri ọyiyẹ tẹ tụ. ⁴ Ma maan ka yụ wụ nini doti asọọ nyi ẹzẹna vaa si irẹyi apẹ jụ wụ vene nini. ⁵ Shi mmẹ rai daka ya pe wu nin ini ẹchiẹngwụ, tuavọtuavọ ma ya pe wu nini ini ifẹ. Inẹ ami o shine tuni eto ọnụụ nyi ini akaakana awụ nini ọnri ọdọwụ awụ ini Ikristi mẹmẹ kata tu. ⁶ Ọmẹvi kụ waa dọ Ikristi Ananyiyi wụ da, waa zụsẹ ininẹ aani. ⁷ Zụfụshẹtẹ ini ẹngwụ aani, dụ waa fụụ ini ẹngwụ aani, zụfụshiẹtẹ inọdọwụ vene amẹmẹ zụ wụ gẹdẹgẹdẹ, dụ waa si avọkụụ yi Oshomoshi. ⁸ Asụụ navọ ki ọzọnyọnyi ọ si ọbọrẹsụ anẹshẹ za wụ, navẹki ẹ si ọmimẹ anẹshẹ jụ wụ vene, ana vaa mẹ kụ waa vatụra isa ẹshẹ, ọnọ vọrọ kụ waa vaatụra Ikristi. ⁹ Fụvọki ini Ikristi ọni ọgụrigụ Oshomoshi bo yaa ini ụpẹngwụ. ¹⁰ Waa nyi ọgụrigụ ininẹ Ikristi nin. Ọni ọnọ vi oshirẹsụ ụkata ọnri ụmọ bo. ¹¹ Ini ẹngwụ Ikristi ana ya zẹ ji wụ ụma ana razi sụvọ aza ji, ama ini ụma-ọjiji ọi Ikristi. ¹² A sụ wụ chirẹtẹ bẹri Ikristi ini isami, dava sha wụ kwẹẹtẹ ini Ikristi zirẹngwụ ọdọwụ ana yini ụkata Oshomoshi ana sha a kwẹẹtẹ fiini akaakana ẹnene fu su. ¹³ Ẹfi ọnụụ su ini aichama awụ ọnri arimajụma ini ẹchiẹngwụ, dọ si ẹshẹ yụ wụ bẹri Ikristi, dọ si aichama ayi bo vaya ayi. ¹⁴ O nyeeyi ụta ọnii ri bo anachẹrẹ tẹtẹ, shi ofiana kachire yi kụra. Ọ tụ onbo fụrẹyi ẹngwụ dọ kani ọ za ọchi avashi. ¹⁵ Ọ dọ wa ụkata ọnri ụmọ bo ini ọchi avashi, dọ tụ ụkata aanini osusu, dọ navọ ki ẹshẹ bo ọ yẹ ki ọnọọ fụrẹkụ aanini ini ọchi avashi. ¹⁶ Fụvavọ asụụ navọ kọ ọzọnyọnyi ọ mishọji tụra wụ ini isari ọnụụ waa ri, navẹki isa onuu wee fu, navẹki isa inọpati ọkụshi upe, navẹki ụfẹ ọwọọwa, navẹki inọpati ọkụshi Isabati. ¹⁷ Isẹnẹni bo vi ụmama isa anaa vẹ, oboro aani ọnọvi Ikristi. ¹⁸ Asụụ navọ ki ẹnẹnaa mẹ ẹngwụ aanini apẹ ki ẹni ẹnẹ nyi irẹsụ-ọvaanẹtẹ, dẹẹ fẹkẹ angẹni nini ki ẹ mishọji yụ wụ nin ana vaa mẹ ki asuu re ọgụ ọni Ijesu motowu aani yụ wụ nini dọ. Di ẹngwụ azẹnẹ e wu ika ziizi ini aaro ẹchiẹngwụ aanini dee showu ziizi ki Oshomoshi ọ si ẹtore yi ẹni re. ¹⁹ Ẹngwụ azẹnẹ ẹ ma ta Ikristi ọna vi oshirẹsụ ku. Fụvọki fini irẹsụ ọni ẹngwụ bo yee re isa onoo sii dọ nangwụ ẹgẹgẹ bo ọnri ọzi bo, dọvanyi ki ẹngwụ ọ zụụ nyi ọzizasụ vabẹ; dọọ zụa fụụ vene Oshomoshi mẹmẹ tụ ọ ki ọọ fụụ. ²⁰ Aaviki wa bẹrẹ Ikristi su fini isẹna yi ẹshẹ ọnọni bo, ọmẹzi dụ wa mii mẹ venebiri ki ọ nyi nyi isẹnẹ gẹ ẹwụ ri isẹna yini ẹshẹ ọnọni: ²¹ "Asụụ za a, asụụda a re, asụụ kani ọ"? ²² Isẹnẹni bo vi isẹnẹ vee vurii, dẹẹ ta fụrẹtẹ ụmẹ ene re no wa ta da inoze ana vatụra irẹyọka anẹshẹ ọnri ọzizụ anẹshẹ. ²³ Ofi ẹnẹni vọni anẹshẹ si ụvira aanini jivẹtẹ ki ẹnẹ si ọ mẹ irafẹkẹ inoze ana sẹrẹ ini eyi aanini. Fụvavọ ono si vene ki ẹ nyi irẹsụ ọvanẹtẹ, dẹẹ mụyaari ẹchẹgwụ anini. Ama, ofi ẹnẹni ẹi zụa za yi ki a sii nyi osisi ẹchẹngwụ.