¹ Ẹmi Ipọọrụ ana vi ọnitụ Ijesu Ikristi zirẹngwụ osisi Oshomoshi, ọnri ọnyara ami Itimoti, ² tushi anọdọwụ nini shi ẹnyara ana yi Ikorose, ana nyụfụshiẹtẹ inni irẹyi ọdọwụ ini Ikristi. Ọiza-Ọfẹ ọnri ẹngwọrọ fụri idi Oshomoshi Adayi ọnri Ijesu Ikristi Ananyiyi ọva si vi ayawụ nin. ³ Ya si avọkụ yi Oshomoshi ana vi Ada Ijesu Ananyiyi, di yaa si ẹfi bo tuozurenu yụ wụ nini. ⁴ Yee re wụ inọpati ọdọwụ awụ nin ini Ijesu Ikristi, shi ụ mẹmẹ sirẹyi ẹnẹna ni tẹtẹ renyi yi Oshomoshi. ⁵ Wa nyi osisi ọnọni fụvọki isene teni tẹtẹ zi wu tu ineeku ọnu wee nyi iribatọ aani, ọzi nyi ọjirẹka. Waa bidi wụ inọpati iribatọ ọnọni da ini irẹyi irẹiza, ana vi irenube ọiza, ⁶ ana vẹ vetu wu nini da. Irenube ọiza ọnọni, oo nyima aa tụẹtụtụ, dọ vẹrẹ aa fụ ini ẹshẹ bo. Shi ẹwụ nyẹmbẹ vọnọ vẹrẹ aa mụkọrọ ini ẹngwụ awụ nini fụri ọkụshi ọnụụ fụrẹ wụ inọpati aani, dụụ yẹ inọpati ọiza ọfẹ ana yini irẹiza Oshomoshi. ⁷ Ọnọni ọnọ vi irenube ọiza ọnụụ kọsụẹ finụvọ Ẹpafrasi, ọni ẹyi riọ gẹ vi ozida, dọọ mẹ irama ayi, dọ vi ozida ebebaani yi Ijesu. ⁸ Ẹpafrasi ọ si osisi ọnụụ nyi ini Ifẹ Ọnini zụ yi da. ⁹ Fụrẹ ẹfi ọnii wụ inọpati ụ mẹmẹ nyi osisi nini, ya zi za ozirenu ọni yaa tụụ yụ wụ nini dinẹ. Yaa tuozurenu kụ wa va zụ nyi ọyiyẹ ene shi ini osisi aani zirẹngwụ ụvira ọnri oyiye. ¹⁰ Yaa tuozurenu kụ waa zụsẹ ana sẹrẹ ineyi Oshomoshi nini. Yaa tuozurenu kụ wa tụẹtụtụ ini isọiza ọnụụ raa mẹ bo nini, ọnri kụ waa fụụ tụọ ini ọyiyẹ inọpati Oshomoshi nin. ¹¹ Yaa tuozurenu kiaa va tụ wụ nin ụkata ana yini ụga Oshomoshi, dụ wa zụ si kamarenu ini ọdọwụ ọnri ọsiẹngwụdọ awụ nini. ¹² Yaa tuozurenu kụ wa zụ si avọkụ yi Oshomoshi Adayi rụjẹ, fụvọki ọni ọnọ mẹ kụ wa nyi ọgiga ini ogu anọdọwu nini ini ẹtofeyi. ¹³ Oshomoshi ọ jiyitụ fini ụkata oozi, dọ si yi na ngwụni ijọva Ozi aani ọnọ ngwayi aani. ¹⁴ Ininẹ Ozi aani ọnii ya nyi ọdidọtụ ayi ọnri ki ọnọ ya si aichama ayi vayayi. ¹⁵ Ozi ọnọ vi ụmama Oshomoshi one re me re. Ọni ọnọ vi ozi ipaapa ini isa bo ọni Oshomoshi tụ vẹshẹ. Ikristi ọnọvi ozi ipaapa ini isa bo ọni Oshomoshi tụ vẹshẹ ¹⁶ Fụvọki zirẹngwụ aani ọna ya mẹ isa bo, ana yineeku shi ana yinẹẹsụ ẹtẹ, shi enee re shi ene re me re. Aa vi ogede nin, navẹki ụkata, navẹki ijọva, navẹki ụmọ, ọni ọnọ sụvọtaani mẹ isa bo, ọni ọnọ mẹ isa bo yi ẹngwụ aani. ¹⁷ Ọ jitụ isa bo yinaani, ininẹ aani ọni isa bo zavabẹ tụ. ¹⁸ Ọni ọnọ vi oshirẹsụ ẹngwụ, ana vi ichọọchi. Ọni ọnọ vi ivẹrẹ ẹshẹ, dọ vi ozi ipaapa ana fiini akaakana ẹnene fu su; fụvavọ ọni ọnọ nyi udi ipaapa ini isa bo. ¹⁹ Fụvọki ọ ngwụ Oshomoshi eyi ki ọgụrigụ aani bo ọ va ra ininẹ aani, ²⁰ doti ọ zụ za isa bo varama kẹngwụ aani vẹ zirẹngwụ Ozi aani. Oshomoshi o tura yi pẹngwụ aani zirẹngwụ anya ana ji shiẹtẹ ini ọchi avashi. Oshomoshi ọ za isa bo vakẹngwụ aani vẹ, shi isa ana yini ẹshẹ ọnọni ọnri isa ana yineeku. ²¹ Ini ụmọnyi, shi ẹwụ nyẹmbẹ vana vi ọzọga yi Oshomoshi, dụụ vi ọnivi aani ini ọtụtụrụma awụ ọnri irẹyi ọshimi ọmimẹ awụnin. ²² Ama, ọmẹyani, ọ za yi va kẹngwụ aani vẹ, zirengwụ ụpẹngwụ aani ini isu aani. Ọ vọọ mẹ doti ọ zụ tana wụ nin yi Oshomoshi ininyi ọnini, arimarivi, ọnri ki dụ waa ma nyi ụtẹ ini ọvidi aani, ²³ aaviki waa zụsẹ ọdọwụ nọvidi, dụụ zụfụshiẹtẹ inaani, duu rezi zizi, dụụ dinẹ tụni ọkụeitura ana razi nyi ọjirẹka ini irenube ọiza ọnụụ wụ. Irenube ọiza ọnọni one showu aani yi aza bo ọni Oshomoshi tụ vẹshẹ. Ọnọni ọnọ vi irenube ọiza ọni ẹmi Ipọọrụ fụvọ aani vara ozida. ²⁴ Ọmẹyani, inẹ ami o shine ini ụya ọni maa ri fụva awụ nini, ọnri ki mvaa mẹ isa anavọ bo ini ẹchiẹngwụ ini ụyọọri Ikristi ọnọ vọrọ ki ma mẹ fụvọ ẹngwụ aani, ana vi ichọọchi aani. ²⁵ Ichoọọhi aani ọnim ya vi ozida, inoze ana vaturoze ụkọrọ ọno Oshomoshi si chiremvọ yụ wụ nini, doti irẹyi Oshomoshi ọva zụ vimẹ. ²⁶ Ọnọni ọnọ vi irẹiza anatẹ fụrụmọrụmọ ana mẹ yi evereze bo. Ama ọmẹyani, aa siọzụ ẹnẹna dọọwụ. ²⁷ Ẹni ọni Oshomoshi si ki ẹ yẹ inọpati ize ana yini ụga ana yini irẹiza ana tẹ ini akaakana Ijẹntaini nini. Ọnọ vi ki Ikristi ọna yininẹ awụ ọnọ vi ọkụayitụra awụ ini ụga ana yini iramụfụọ.Ụk ²⁸ Ọni ọnọ vi ọza ọnii showu aani. Yaa si irẹyọọye kareyi yi ọzọọza, dii si ụvira bo zụazisa, doti ye re ki aza bo vi ọgụrigụ ini Ikristi. ²⁹ Fụvọ ọnọni ọni maa sii mụkọrọ, di maa siivụri ini ọpa ụkata aani ana yinẹ ẹngwụ ami ọni maa sii mụkọrọ.