¹ Ẹwụ nin ọga, navọ waa si isẹnẹ sẹrẹ, dọ vọrọ yi ọrishi awụ nini. Dụ wa yẹ ki ẹwụ nin ọ zẹ nyi nyi ẹzẹne funa wụ ineeku. ² Waa si ẹfi bo tuozurenu nini. Waa tuozurenu, tamayi dụ waa mẹ avọọkụ. ³ Vabẹ we pe yi tuozurenu nin, ka Oshomoshi ọva noze yi irẹyi aani, doti ọ ka irẹiza ana tẹ inọpati Ikristi. Fụvavọ ana si za mi chire. ⁴ Tuozurenu yi mi doti ma zụ sha irẹyi aani afụ sha inoze ana sẹrẹ. ⁵ Navọ waa si ụvira pe ẹnẹna razi nyi ọdọwụ mẹ, asuu du ẹfi sha. ⁶ Navọ di irẹyọọka awụ ọ ngwụ aza eyi. Navọ dọ nyi irẹyọọyẹ, doti wa zụ yẹ oshi ọnọ vọrọ kụ wa tụ tuni ipẹpẹẹ ọni ọzọnyọnyi ra fọ wụ. ⁷ Aaviki wee si kụ wa yẹ inọpata ami, Itaichikusi vaa ka ombo yụ wụ nini. Ọnyara ami ini ọdọwụ ọnọ vi, dọọ si inẹ ọnya pe mi mụkọrọ, dii gẹ a fẹkẹ Ananyiyi. ⁸ Maa tụ ọ shu wu nini doti wa yẹ inọpati ayi nini, ọnri ki doti ọ zụ tụ ọtụtụrụma awụ nin ụkata. ⁹ Ọn ri Onesimusi, ọna vi ọnyara ini ọdọwụ, dọ vi ẹzẹna fiini akaakana awụ nin vẹ, ọnim tu shi wu nini. Ẹ vaa kaa yụ wụ nin isa bo ana mẹ izọ. ¹⁰ Aristakusi, ọni ẹmi riọ gẹ yini ijaaru ki ma kụ wụ nini, shi Imaakụ, ana vi ozi ọnyara Ibanabaasi (ọnimkaa yụ wụ kụ wa dọ ngwureshi aaviki ọ vẹ vetu wu nini), ¹¹ shi Ijesu anaa shi Ijọstọsi. Ẹnẹni renya ana nyi ipaa ini ụma-ọjiji vọ nii gẹ vi ọmụkọrọ ini ijọva Oshomoshi. Efufụẹngwụ ọnẹ vi yi mi. ¹² Ẹpafraasi ki ma kụ wụ nini. Anrẹkụra awụ nini ọnọ vi, dọ zẹ vi ọrishi Ijesu Ikristi. Oo pe wu tuozurenu nini doti wa zụ nyi ọkweyitụra ini osisi Oshomoshi. ¹³ Maa dọivenu ki ọọ shẹngwụshaa mụkọrọ yi ẹnẹna yi Ilaodisiya ọnri Hiraponisi. ¹⁴ Iruku, ana vi osiọzikụ anaa ngwayi aani, ọnri Idẹmasi ki ma kụ wụ nini. ¹⁵ Kụ ẹnyara ayi ana yi Inaodisiya, ọnri Inimfa, shi iragụ anọdọwụ ana yini ireshi aani. ¹⁶ Ụmẹ ana ra ka iwe ọnọni da ini akaakana awụ nini, navọ dụ wa zẹ ki ka a ini ichọọchi ani Inaodisiya nin, dụ wa zẹ ki ka iwe ana chẹrẹ fụri Inaodisiya. ¹⁷ Kaa yi Achipọsi ka, "Sụvọza ụkọrọ ọdọwụ ani Ananyiyi si chireụvọ, du we re ki ọ vimẹ." ¹⁸ Ẹmi ụvọta ọnọ chẹrẹ iwe ọnọni tushi wu ki ma siọ kụ wụ nin --- Ipọọrụ. Tamayi kim yi yini ẹba nin. Ọiza ọfẹ Ijesu Ikristi Ananyiyi ọ va ya bẹrẹ wụ nini.