¹ Di oshirẹsụ arụfa ka, "Irẹiza ọni isẹnẹni wa vi?" ² Di Isitivini voshi, dọ ka, ewụ nin ẹnyara ami, shi ewụ nin ada ami, batọ tụni irẹyi ami nini: Oshomoshi ana nyi ụga ọ siẹngwụ zụ adayi Abrahamụ ẹfi ọnọ si yi Imẹsotopemiya, dọ tangwa vanyi ki ọ na ra tụ irẹkụra Iharani; ³ dọ kaa yọ ka, 'Kwẹẹtẹ fụri ẹtẹ irẹkụra awụ, dụ wa navọ anreshi awụ, dụ waa nọ ẹtẹ irẹkụra ọnim va sii zụ wụ.' ⁴ Inaani, dọ kwẹẹtẹ fụri ẹtẹ irẹkụra ani Ichaadiya nini, dọ na ratụ Ihanani; inaama ọni ada aani fu su, di Oshomoshi si vini ẹtẹ izọni, ọnụụ ra nini aani. ⁵ Ọ zi si ọnyọnyi ini ẹtẹ ọnọ yọ, shi irasha che ọnọ va zụụ si ụfụ ụ shi. Ama, shi ọmẹ daka vi ki Abrahamụ ọzi ma ozi, dọ mẹ otowu yọ ki ọn vaa si ẹtẹ ọnọni yọ, dọ vara ayaani ọnri ayi ezirama aani. ⁶ Di Oshomoshi maan kaa yọ ka ezirama aani vaa si ẹfi keere ra ini akaakana anrẹkụra ọsa nini, ọnri ki anrẹkụra ẹnẹ vaa za wa ọrishi, dẹẹ mẹ irẹyi ọshimi ka wa na mẹ irayi akaava (400). ⁷ Di Oshomoshi ka, 'Ama, mvaa mishọọji yi irẹkụravabẹ ọnẹ vaa mọrishii yi. Inaama aani, ẹ vaa varama vaa fẹkẹ mi izọni.' ⁸ Inaani, di Oshomoshi si ireji ụma ọjiji yi Abraamụ; inaani di Abrahamụ ma Aiziki, dọ ji ọ ụma ini ọkụshi ọfụshinta. Aiziki dọ ma Ijekọbụ; di Ijekọbụ ma ezi ẹwụrẹva ana vi oshuku oshirẹsụ ụna ẹwụrẹva ana yi Isrẹni. ⁹ Fụvọki oshuku oshirẹsụ ẹwụrẹva ẹnẹni ẹ nyi ayamkụ yi Ijosẹfụ, dẹ na a yi anrẹkụra Ijipiti, ama di Oshomoshi ya bẹrẹ. ¹⁰ Dọ ji ọ tụ fini irẹkụ ana ku tu o bo. Dọ sieyi ayụva re Ijosẹfụ, dọ si ụvira yọ ini ọvidi Ifarao, oshinọyi Ijipiti,ana si ọ mẹ Igomina Ijipiti ọnri anreshi aani. ¹¹ Umotu, di ọshashi yini irekụra Ijipiti ọnri Ikenaani, di ụya ọbani vẹrẹ aa ri aza, di oshuku adayi nini rezi re isari ri. ¹² Ama Ijekobu mẹ wụ ki isari yi ẹtẹ Ijipiti, dọ tụ ada ayi nini ụsoze aanini ipaapa. ¹³ Ini ụsoze ụpọfụụva, di Ijosẹfụ siẹngwụzụ ẹnyara aani, di Ifarao ọn nyẹmbẹ kụ zẹ yẹ anreshi Ijosẹfụ. ¹⁴ Di Ijosẹfụ tụ ẹnyara aani varama ki ẹ na kaa yi ada aani Ijekọbụ ki ọọ vi Ijipiti, di ọni shi anreshi aani bo si vi ẹbẹrẹta rẹwụ rẹshi. ¹⁵ Fuvavọ di Ijekọbụ chi na ngwụ Ijipiti, de su izọ, shi ọni shi adayi nini. ¹⁶ De chema oku aanini ni Ishẹkẹmụ, de ne wa tuni irikuta ọna yini ẹtẹ ọni Abrahamụ si ẹkẹshi isiriva shi finụvọ ezi Ihamọ ini irẹkụra Ishẹkẹmụ. ¹⁷ Ẹfi ọni otoowu ọni Oshomoshi mẹ yi Abrahamụ e vee tu, di aza aani vẹrẹ aa fụ tụọ, dẹẹ rụrụ tụọ ini ẹtẹ Ijipiti, ¹⁸ poro netu ẹfi ọni Oshinọyi osa ri ini ẹtẹ Ijipiti, oshinọyi ana razi yẹ inọpati Ijosẹfụ. ¹⁹ Di oshinọyi ọnọni aa ji aza ayi nin vene, dọọ mụyaari yi adayi nin etẹtẹrẹ, dẹ mẹ wa ki ẹ kụ ezinụvọ aanini tụni ijamba doti asẹ zụ mẹshẹ. ²⁰ Ụmavọ ana si mi Imosisi; do zoza kokoro inọvidi Oshomoshi, dẹ si ụfẹ ẹẹta pa a ineeshi ada ani. ²¹ Ẹmẹ si ọ tụni ẹshẹẹshẹ, di ozi ifarao ọnyẹnẹ si ọ mozi ma, dọ pa a venebiri ozi aani. ²² Aa pa Imosisi, da zụ ọ ụvira ani Ijipiti nini bo, dọ nyi ụbani ini irẹyi ọkika ọnri ini ọmimẹ. ²³ Ama, ọ mẹ gụ irayi ẹbẹrẹva, dọ ngwụ ọ ọtụtụrụma ki ọ na kụ ẹnyara aani ezi Isreni. ²⁴ Imosisi me re ki aa mụyaari ozi ani Isrẹni ọnya, dọ dọirẹvụ vụ, do fu ozi ana Ijipiti isa, dọ wụ ọ nyẹtẹ. ²⁵ Dọ kẹni ki o vee ye ẹnyara awụọn nin ki Oshomoshi ọnaa zirẹngwụ awụọni jiwaatụ, ama ozi voo ye wa. ²⁶ Ineyineishẹ aani, do ve tu ani Isrẹni ẹnyi ki ẹẹ zirazi; doo si ki o nee ji wa, doti ẹẹ mọnyọnya, dọ ka, "Ewụ nin anẹrụ, ẹnyara ọnụụ vi nini, ọmẹzi dụ waa tẹngwụ anava nin kẹ? ²⁷ Ama, ẹzẹna rivi ini irẹyi ọnọ, dọ tụ Imosisi ụvọ finoze, dọ ka, "Ẹnẹ mẹ wụ oshirẹsụ ọnri ọnishọọji tụra yi irẹsụ kẹ? ²⁸ Ụ wa zaa vaa wụ mi vene ụ mẹ zẹ wụ aani Ijipiti ọnọ irẹri? ²⁹ Imosisi mẹ wụ irẹyi ọnọni, do zue fụri Ijipiti; dọ si vara ọzọga ini ẹtẹ Imidiya, izọnọ ya mozi ọnọrụ ẹẹva. ³⁰ Inaama irayi ẹbẹrẹva, di angẹni siẹngwụzụ ọ ini ụnọmi ọna yini Irẹsụfa Isinayi, ini ira ọnaa za ini aviofuofu. ³¹ Imosisi me ri ira ọno, do sheeyi; omaa kavaape ki ọno ne re ira ọnọ ẹtẹrẹ, dọ wụ ngwẹ Ananyiyi ka, ³² 'Ẹmi ọnọ vi Oshomoshi ada awụ nini, Oshomoshi Abrahamụ ọnri Aiziki ọnri Ijekọbụ.' Di angwashi si ngwụ Imosisi ẹngwụ, dọ rai va kụ zụ zai re ira ọnọ. ³³ Di Ạnanyiyi kaa yọ ka, "Tụ ivata fini ụfụ awu, fụvọki irasha ọnụụ dine tụ aani vi ẹtẹ ọnini. ³⁴ Ọzi nyi ọjirẹka ki mee re ụya ọni aza ami aa ri ini ẹtẹ Ijipiti; maa wụ owu aanini, dim chi vẹ ki ma va dọ wa tụ; waa vẹ ọmẹyani, ma vaa tụ wụ ni Ijipiti. ³⁵ Imosisi ọnụụ yi tẹtẹ nini ishọ̣, dụụ ka, 'Ẹnẹmẹ wụ oshirẹsụ ọnri ọnishọọji tụra yi kẹ?'--- Imosisi ọnyọnya ọnọ ọni Oshomoshi tụ ki ọ va moshirẹsụ ọnri ọjiọzatụ awụ nin. Oshomoshi ọ tụ ọ zirẹngwụ angẹni ọna siẹngwu zụ Imosisi ini aviofuofu. ³⁶ Imosisi ọ kụ wa jinẹ fụri Ijipiti inaama ọnọ misa ọshishozeyi ọnri ọsizụ renyi renyi ini Ijipiti ọnri ini Irefu Iridi, shi ini ụnọmi ini irayi ẹbẹrẹva. ³⁷ Imosisi ọnyọnya ọnọ kaa yi ani Isrẹni nini ka, 'Oshomoshi vaa si ọkisẹ ọnya kwẹẹtẹ yụ wụ nin fini akaakana ẹnyara awụ nin, dọọ vi ọkise vene mi.' ³⁸ Ọza ọni maa karẹyi aani ọnọ vi ẹzẹna yini iragụ inụnọmi ọnri angẹni ana karẹyi yọọ ini iresufa Isinai. Ọnọrụ ọnọni ọnọ vi ẹzẹna ya pe ada ayi nini; ọnọrụ ọnọni ọnọ vi ẹzẹna dọ irẹyi anaa si ẹshẹ yi azạ fiidi Oshomoshi va yi yi. ³⁹ Ọni ọnọ vi ẹzẹni adayi nini razi zẹ si ụmọ aani mụkọrọ; dẹ tụọụvọ kavana fiini akaakana aanini, ọnri ka, ini ọtụtụrụma anini de va eyi ki Ijipiti. ⁴⁰ Inụmavọ, dẹ kaa yi Erọọni ka, 'Pe yi mẹ ori nini ana vaa kụ yii zi. Aaviki ini ayi Imosisi ọna kụ yi fụri ẹtẹ Ijipiti, yọ, ya zi yẹ isẹnẹ na mẹ ẹ.' ⁴¹ Inaani, dẹ bẹ ozi ụnọ, dẹẹ mẹ isẹvọ yi ori ọnẹ bẹ, dẹẹ jụjẹ fụvọ isẹnẹ si ụvọ aanini bẹ. ⁴² Ama, di Oshomoshi varama ka wa, dọ fụrẹ wa ụvọ ki ẹ kụkụ fẹkẹ ụzọmi nin ini ovurukutu, vene amẹ chẹrẹ tuni iwe ọkisẹ nini ka, 'Ụ wa wụ isụpa mẹ isẹvọ yi mi nini ini irayi ẹbẹrẹva ọnụụ yini ụnọmi nin, ẹwụ nin anreshi Isrẹni? ⁴³ Waa tanụvọ dọ itabanakụ Imonẹki ọnri ọi ụzọmi Irẹfani, shi ọi ori ọnụụ bẹ ọnụ waa si fẹkẹ wa: mva si wụ nin kavaana fuu jinẹ izẹni Ibabirọni ya.' ⁴⁴ Ada ayi nini ẹ nyi itabanaku ivenu ini ụnọmi, vene Oshomoshi mẹ sụmọ karẹyi yi Imosisi ki ọ mẹ ẹ venebiri ẹngwụ ana si zụ ọ, ono re. ⁴⁵ Ọnọni ọnọ vi ajengwụ ọni ada ayi nini si mẹ ayaanini, di ẹnri Ijọshụa si ọ̣ va ngwụ ẹtẹ aanini. Ineyi adayi nini, dẹ kụ ogu irẹkụravabẹ nin ọni Oshomoshi dụ fiini ẹtẹ ọnọ dẹ si ọ mẹ ayaanini. Di ajẹngwụ ọnọ yini ẹtẹ ọnọ netu ụmẹ Idevidi, ⁴⁶ di Idevidi re eyi ayụva Oshomoshi, dọ ọ fọ ki ọn we ve zuu si irasha ọni Oshomoshi Ijekọbụ vaa ra. ⁴⁷ Ama, Isoromoni ọnọ da ireshi ọnọ yi Oshomoshi. ⁴⁸ Tuavotuavo, Oshomoshi ana Nẹba Fu Bo ọ ma ra ini ireshi ọna si ụvọ da, vene ọkisẹ nin mẹ kaa ka, ⁴⁹ 'Ineeku ọnọ vi ogede ami, di ẹtẹ vi irasha ọkwafụshi ami. Yere ẹngwụ reshi ọnụụ vazụụ daa yi mi kẹ? di Oshomoshi voo fisue, navẹki sẹnẹ vi irasha ifooshi ami kẹ? ⁵⁰ Navẹki aivi ụvọ ami ọnọ mẹ isẹnẹni bo?' ⁵¹ Ẹwụ nin azẹnẹni, wa nyi ọtụtụrụma ọkata nini chiẹngwụ, wa zi jụma ini ọtụtụrụma ọnri ụtọ awụ nini, dụ waa si ẹfi tụrẹfi kavaana yi Ifẹ Ọnini nin; dụ waa mẹ vene ada awụ nin mẹẹ mẹ. ⁵² Yere ọkisẹ ọnọvi ki ada awụ nin ọzi mụya ri kẹ? Ọkise ana vidi vẹ dọva nyi ki ọza ana vi Ọza Ọnini ọ vẹ vọnẹ wụ; di ẹwụ nin nyẹmbẹ zẹ si vara ọbọzafụ ọnri owụọza anaa wụ ọ vene ada awụ nini, ⁵³ ẹwụ nin ọnọ dọ ofi ọni angẹni nin si shiẹtẹ, ama dụụ razi si ọ mụkọrọ nin." ⁵⁴ Ẹfiẹni iragụ azẹkụ ẹnẹ wụrẹyi ẹnẹni, di ayi kụ wa kokoro, dẹ rianyi shi Isitivini. ⁵⁵ Ama, fụvọki ọzene shi yi Ifẹ Ọnini ọnọ vi, ọ mẹ veyi shi ẹbẹẹba, do re ụga Oshomosho; do re Ijesu mẹ dinẹ tụni aka ụvọọri Oshomoshi. ⁵⁶ Di Isitivini ka, "Re, mee re ẹbẹẹba ki ọ fụ sha, di mee re ki Ozi Ọza ọ dinẹ tụni aka ụvọọ̣ri Oshomoshi." ⁵⁷ Ẹfiẹni iragụ azẹkụ ẹnẹ wụrẹyi ọnọni, dẹ ku ạvọ ku ụtọ, dẹ si ọngwẹ tụẹba, dee nowu, di enbo kụọgiri zuechi ne tu Isitivini. ⁵⁸ De tura a fini akaakana irẹkụra ọnọ, dẹ vẹrẹ ee ne irẹta, di onivenu aanini tụ abada aanini,dẹ kụọ pẹ ozueyi ọnya anaa shi Isọọrụ. ⁵⁹ E mee ne Isitivini irẹta, dọọ shi Ananyiyi, dọ ka, "Ijesu Ananyiyi, tanụvọ dọ ifẹ ami." ⁶⁰ Do kuẹtẹ, dọ si ọngwẹ tuẹba, do nowu ka, 'Ananyiyi, asu za aichama ọnọni ika bẹrẹ yụ wa." Ọ mẹ maan ka da, dọ sụara na.