¹ Ụmavọ, di eziafu Ijesu nin aa rụrụụ tụọ, di Iju nin ana pa ini ẹtẹ Igiriki nin, dọ si vi ki irẹkụra Igiriki ẹnẹẹ ka, vẹrẹ a tụrẹka Iburu nini, fụvọki ẹẹ sieyiwụ osoku aanini eyinieyini, aaviki ẹẹ ga isari yi aza. ² Di ọnitụ Ijesu ẹnẹwụrẹva shi eziafụ aani ọkọni gụ, dẹ ka, "Ọzi sẹrẹ ki ya navọ irẹyi Oshomoshi tẹtẹ fụvọ isari ọgiga. ³ Fụvavọ, ẹwụ nin ẹnyara ayi, ni anẹrụ ishimba fini akaakana awụ nini, ana dọrenu, de shi yi Ifẹ Ọnini ọnri ụvira, doti ya si isari ọgiga chire wa ụvọ. ⁴ Ini ayi ẹyọni, ẹfi bo ọni va sii tuozurenu, di yaa mụkọrọ irenube ọiza ọni Oshomoshi si chire yi ụvọọ nọvidi." ⁵ Di irẹyi ọnẹ ka shine aza bo. Inaani, dẹ ni Isitivini, ana vi ọnọrụ ene shi yi ọdọwụ ọnri Ifẹ Ọnini, Ifiripi, Ipronchurọsi, Inikanọrụ, Itimọni, Ipamẹnasi ọnri Inikolausi ana vi Ijẹntairi fụri Antiyọki. ⁶ Di anọdọwụ ẹnẹ sụ wa vinọvidi ọnitụ Ijesu nin, di ọnitụ nin tuozurenu yụ wa, dẹ sụvọ tụra wa irẹsụ. ⁷ Avọ ọni irẹyi Oshomoshi mẹmẹ aa garashi tụọ, di eziafụ Ijesu aa rụrụụ tụọ ini irẹkụra Ijerusanẹmụ, di arufa ẹrụrụ ẹrụrụ kụa si irẹyi ọdọwụ mụkọrọ. ⁸ Ụmavọ, di Isitivini si shi yi ọiza ọfẹ Oshomoshi ọnri ụkata, dọọ mụkọrọ oshishiozeyi ọnri ọsisizụ ẹbani ẹbani ini akaakana azẹnẹ. ⁹ Ama, di iragụ azẹnyi anaa shi Isinagọgụ Aza ana Natụ kwẹẹtẹ tu o; ẹnẹnaa vaatụra ọzizụ Isirini ọnri Aneksandụra ẹnẹ vi, di ẹnyi fụri Isisiriya ọnri Eshiya. Dee pe Isitivinii nyi ẹshankata. ¹⁰ Ama, ẹi zụ veyika ụvira ọnri Ifẹ Ọnini ọni Isitivini aa sii karẹyi. ¹¹ Inaani, dẹ mẹ ochirirenu yi azẹnyi doti ẹ kaa ka, "Yaa wụ Isitivini mẹ karẹyi isaanyisi shi Imosisi ọnri Oshomoshi." ¹² Dẹ tụ azẹnẹ irẹkụ, shi azẹkụ aanini, shi ọyofi aanini, de ne tu Isitivini dẹ za a, dẹ si ọ ne tu iragụ azẹkụ nin. ¹³ Dẹ shi onivenu anapinẹ nin vẹ, dẹ ka, "Ọzọnọni vanaa karẹyi ene rezi ze shi irasha ọnini ọnọni ọnri ofi nin poro. ¹⁴ Fụvọki yaa wụ ki ọ kaa ka Ijesu ani Inazarẹti ọnọni vaa chaka izọni bo vaa sha, doo du isoshiẹtẹ ọni Imosisi si chire yi ụvọ bo." ¹⁵ Di ẹnẹna yini iragụ azẹkụ ọnọ bo feyishi o, de re ki eyi aani o vene eyi angẹni.