¹ Isọọrụ ọ sụvọtụni isu aani. Fụri ishọ dẹ vẹrẹ aa si ụyọọri ọbani ri ichọchi ọna yi Ijerusanẹmụ fụvọ ọdọwụ aanini; di anọdọwụ nin bo garashi ọkakooro Ijudiya ọnri Isamariya, ọchishi ọnitụ nin ọna razi bẹrẹ wa. ² Di anẹrụ ẹnyi ana nyi angwashi Oshomoshị ne ne oku Isitivini, dẹ karẹsụshi yọ. ³ Ama, di Isọọrụ mụyari ichọọchi kokoro; dọọ ngwụ ireshi ireshi, nee tura anẹrụ ọnri anyẹnẹ anọdọwụ nin, dọ kụ wa shi ini ijaaru. ⁴ Tuavọtuavọ, di anọdọwụ ana garashi ọkakooro ẹnẹ aa karenube ọiza varakaraa ziizi. ⁵ Ifiripi o chi ni irẹkụra Isamariya, do nee showu yụ wa inọpati Ikiristi. ⁶ Ẹfiẹni azọkọni nin wụ, dẹ zẹ si iri aanini re ụkọrọ oshishozeyi ọni Ifiripi mẹ, di enbo sụtọpeẹtẹ, dẹẹ wụrẹyi ọnọọ ka bo. ⁷ Ifẹ azeeshi ẹ tụjinẹ fiini ẹngwụ azẹrụrụ ọni ifẹ azeeshi aa zama, dẹẹ kowuu sha, da fụ azẹrụrụ ene suafụ suavọ ikụ sha. ⁸ Inaani, di aza bo a jụjẹ ini irẹkụra ọnọ. ⁹ Inụmavọ, ọọ nyi ọnọrụ ọnyi ini irẹkụra ọnọ ọni irẹsha aani ri Isaimọni ana bidi aa mirakụọ; dọọ bidi aa mẹ isoshishozeyi zụ ani Isameriya nini, dọọ mẹ ki ọzẹna nyụbani ọnọni vi. ¹⁰ Ani Isamariya nini bo, vẹrẹ fiini ẹnẹni ọ tare fu bo na ngwụ ẹnẹna nyụbani fu bo enee batọ tụni irẹyi aani. Dẹ ka, "Ọzọnọni ọnọ vi ụkata Oshomoshi anaa shi Ọnyankata." ¹¹ Fụvọki o si ku ọnọ fụrẹ aa mirakụọ zụ wa one sii batọ tụni irẹyi aani. ¹² Ama, ẹfi ẹni Ifiripi karenube ọiza ijọva Oshomoshi ọnri irẹsha Ijesu Ikristi yụ wa, dẹ dọwụ, da mẹ isami yụ wa, shi anẹrụ shi anyẹnẹ aanini. ¹³ Isaimọni ọn nyẹmbẹ vana zẹ di dọwụ, da mẹ isami yọ, dọ kụ kụa si apada yaa pe Ifiripi. Ẹfi ono re ami oshishozeyi ọnri ụkọrọ ẹbani ẹbani anaa mẹ, do sheeyi kokoro. ¹⁴ Ẹfiẹni ọnitụ Ijesu nin ana yi Ijerusanẹmụ wụ ki ani Isameriya nin ẹ dọ irẹyi Oshomoshi wu dạ, dẹ tụ Ipita ọnri Ijọọnụ ne tu wa. ¹⁵ Ẹfiene tuzọ, dẹ tuozurenu yụ wa, doti ẹ va zụ nyi Ifẹ Ọ̣nini. ¹⁶ Fụvọki, poro ve tu ụmavọ, Ifẹ Ọnini oi vi vaku ọzọnyọnyi inaanini; irẹsha Ijesu Ananyiyi renya one si si mẹ isami yụ wa. ¹⁷ Inaani, di Ipita ọnri Ijọọnụ kụ avọ tụra wa, de re Ifẹ Ọnini dọ. ¹⁸ Ẹfiẹni Isaimọni re ki Ifẹ Ọnini ọ ngwụninẹ aza zirẹ ọkikụavọtụra ọni ọnitụ Ijesu nin kụavọ tụra aza, dọọ mẹ ki ọna vaa si ẹkẹshi yụ wa. ¹⁹ Dọ ka, "Zẹ si ẹngwụ ụkata ọnọni yi ẹmọni, doti ọza tụrọza ọnim raa kụvọtụra ono re zu re Ifẹ Ọnini dọ." ²⁰ Ama, di Ipita kaa yọ ka, "Shi ẹwụ shi ẹkẹshi awụ o ne vurii, fụvọki wee ro ki ụ va zụụ si ẹkẹshii shi irẹiza ọfẹ Oshomoshi. ²¹ Wa zi nyi ọrigẹ navẹki ọgiga ini irẹyi ọnọni, fụvọki ọtụtụrụma awụ ọzi dinẹ ẹtẹrẹ ini ọvidi Oshomoshi. ²² Fụvavọ rinẹvarama fini aichama awụ ọnọni, dụ wa tuozurenu shi Ananyiyi, ọnyiki ọ vaa si oriro ọtụtụrụma awụ vaya wụ. ²³ Fụvọki mee re ki ụụ yini ẹchipa ayamikụ ọnri ẹsụ aichama." ²⁴ Di Isaimọni tuoshi ka, "Pe mi tuozurenu shi Ananyiyi, doti asi isẹnụụ ka va mẹ mi." ²⁵ Ẹfiẹnẹ divenu da, dẹ karẹyi Ananyiyi da, di Ipita ọnri Ijọọnụ varama ni Ijerusanẹmu, dee showu irenube ọiza yi irẹkụra ani Isameriya nin ẹrụrụ ẹrụrụ. ²⁶ Angẹni Ananyiyi ọ kaa yi Ifiripi ka, "kwẹẹtẹ waa ni ni oze ana yi aka ụvẹtẹ ana fụri Ijerusanemụ ni Igaza." (Oze ọnọni vi oze ana yi irasha ana jomi.) ²⁷ Dọ kwẹẹtẹ, dọ na. Dọ va nyi ọnọrụ ọnyi ana fụri Etopiya, dọ vi osuretu ana nyi ụmọ ẹtẹẹtẹrẹ ini afụ Ikandẹẹsi ana vi oshinọyi ọnyẹnẹ irẹkụra Etopiya. Ọni ọnọ si eyi pe ogu oshinọyi ọnọ bo. Ọza ọnọni vana furi Ijerusanemu va mirafẹkẹ. ²⁸ Ọ maa varama neeshi, dọ yatụ tụni ikẹkẹ ovurata aani, dọọ kiwe Ayizaya ọkisẹ. ²⁹ Di Ifẹ Ọnini kaạ yi Ifiripi ka, "Waa nizo,̣ dụ wa na dinẹ pe ikẹkẹ ovurata ọnọ." ³⁰ Di Ifiripi ve zuechi ne tu o, dọ re kọọ kiwe Ayizaya ọkisẹ, dọ fo ̣ọ ka, "Iwe ọnụ waa ka waa ngwụ wụ ụtọ? ³¹ Di ani Etopiya ọnọ tuoshi ka, "Ọ mẹmẹ va sii ngwụ mi ụtọ, ọchishi ki ọza sha afụ aani sha yi mi?" Dọ dipẹ yi Ifiripi ki ọ shirẹ ikẹkẹ ovurata awụọni doti ọ yatụ pe ọni. ³² Irẹyi ọna chẹrẹ tụ izi ani Etopiya ọnọ aa ka ọnọ vi ka, "A va a tụọvidi venebiri atẹmẹ, ọnaa sii ni izẹna va yaa wụ ọ, vene ozipa atẹmẹ ana navọkụ shẹẹ inọvidi ẹzenaa kụẹyi inẹngwụ aani, dọ razi sharenu aani." ³³ Aa mụshi nyi ọ, da mishọọji ana razi sẹrẹ yọ. Ọ wa nyi ẹzẹna va zụụ miweọji ezirama aani? Fụvọki a wụ ọ fụrẹshẹ ọnọni." ³⁴ Di osuretu ọnọ va fọ Ifiripi ka, "Miyarẹ wụ, kaa yi mi, ẹni vi ọzẹni ọkisẹ ọnọni aa karẹyi aani kẹ, ẹngwụ aanni ọ waa ka, navẹki ọzẹnẹsa?" ³⁵ Di Ifiripi nyima, dọọ si irẹyi iwe ọnini ọnọnii karenube ọiza yọ inọpati Ijesu. ³⁶ Ẹ mẹ yini oze aa na, de ve tu enyi ọnyi, di osuretu ọnọ kạ, "Ree enyi izọnaani. Ọ wa nyi isẹnaa jimoze ana raa zaa mẹ ki a mẹ isami yi mi?" ³⁷ Di Ifiripi ka, "Aaviki waa si ọtụtụrụma awụ bo dọwụ, a va zụụ mẹ isami yụ wụ. Di ani Etopiya ọnọ voshi ka, "Ma nyi ọdọwụ ki Ijesu Ikiristi vi Ozi Oshomoshi." ³⁸ Inaani di ani Etopiya ọnọ kaa ki a za ikẹkẹ ovurata ọnọ dinẹ. Ifiripi ọnri osuretu ọnọ ee chishiẹtẹ, dẹ ngwụni enyi, di Ifiripi mẹ isami yọ. ³⁹ Ẹfiẹnẹ tụ jinẹ fini enyị vẹ, di Ifẹ Ananyiyi si Ifiripi nạ, di osuretu ọnọ reiku re e, ama dọ vaturoze aani aa na, dọọ jụjẹẹ na. ⁴⁰ Ama di Ifiripi na siẹngwụzụ ini irẹkụra Azotusi, dọọ ngwụ okakooro ọnọ ziizi, dọọ karenube ọiza ini irẹkụra bo, poro nangwụ Isisariya.