¹ Inaani, di Agiripa kaa yi Ipọọrụ ka, "Ụ va zụụ kụrenu awụ ọmẹyani." Inaani, di Ipọọrụ tanụvọ tụọvidi, dọọ kurenu aani. Dọ ka, ² "Ẹwu oshinọyi Agiripa, inẹ ami o shine ki maa vaa kụrenu ami inọvidi awụ ini irẹka ọni ọdọvidi Iju nin shi mi irajini; ³ paapa fụvọki ẹzẹna nyi ọyiyẹ inọpati isoshiẹtẹ Iju nin ọnri ipẹẹpẹ inọpati irafẹkẹ aanini ọnụụ vi. Fụvavọ, miyarẹ wụ, vẹngwụnẹtẹ du we batọ tụni irẹyi ami. ⁴ "Inirẹiza, Iju nin bo ẹ yẹ ẹngwụ ẹshẹ ọni maa mẹ fụrẹ ẹfi ọnim fụrẹ vi ozueyi ini irẹkụravabẹ ami shi ẹfi ọnim si yi Ijerusanẹmụ. ⁵ Ẹẹ yẹ mi fini ivẹrẹ, fụvavọ ẹ va zụụ dọrenu ki ẹshẹ oziẹtẹ Ifarisi ọnim mẹ, Ifarisi nin ọnọ vi ki idaanini ọni isoshiẹtẹ irafẹkẹ ya kata fu bo. ⁶ Ọmẹyani, a shim rẹka irajini fụvọki maa nyi iribatọ otowu ọni Oshomoshi mẹ yi oshụkụ ayi nini. ⁷ Fụvọki otowu ọnọni ọnọ vi isẹni ụna ẹwụrẹva ẹyi Iju bo kụayitụra kokoro ki enve re e dọ, ana mẹ ki ẹẹ si ọọdụ shi irafụ fẹkẹ Oshomoshi. Ẹwụ oshinọyi Agiripa, fụvọ ọkụaitụra ọnọni ọni Iju nin si shim rẹka. ⁸ Sẹnẹvẹ di ọzọnyọnyi ini awụ nin vee ro ki azẹizụa dọọzẹ ki Oshomoshii sha ẹzẹne fu su kwẹẹtẹ?" ⁹ Ọ nyi ẹfi ọnyi tụrama ọni ẹmi nyẹmbẹ ro ka ọọ vọrọ ki ma mẹ isa tụrisa ọnim va sii kaachire irẹsha Ijesu Inazarẹti. ¹⁰ Maa mẹ isẹnẹni Ijerusanẹmu. Mee chire anọdọwu ẹrụrụ tụni ijaaru zirẹngwụ ụkata ọni arufa ọbani nin si yi mi. Aaviki a wụ anọdọwụ ẹnẹ, dim sụvọtuọ ki ọ vọvọ sẹrẹ. ¹¹ Maa mụya rụ wa ụpẹrika ini isinagọgụ bo, di maa sụkata mẹ wa ki ẹẹ ka isaanyisii shi Oshomoshi. Ayi ọ kụ mi tu wa kokoroo, di maa mụyaa rụ wa, shi ẹnẹna yi irẹkụra akajinẹ. ¹² Mmẹ vọvọ aa mẹ, di arụfa ọbani nini si ụmọ ọnri oze yi mi ọnim si nọ Idamasikọsi; ¹³ mmaa naa inoze, inọpati iwakati ẹwụrẹva ini ọọdụ, dim re ẹtofeyi ọna sha fụri ẹbẹẹba ini ovurukutu. Di ẹtofeyi ọnọ sha nyaa funa ọyi! Dọ sha varakara mi, shi ẹnẹnii gẹ yini ụsoze. ¹⁴ Ụmọni ẹyi bo sẹdụ nyẹtẹ, dim wụ ọngwẹ ọnyi anaa si irẹkụra Iburu karẹyi shi mi, dọ ka, 'Isọọrụ, Isọọrụ, ọmẹzi dụ waa mụyaa ri mi kẹ? Ọ vaa ngwụ wụ ẹngwụ kụ wa tụ afụ shi ọchi firefire ọna sii kụ ụnọ.' ¹⁵ Inaani dim ka, 'Enụụ vi kẹ, Ananyiyi?' Di Ananyiyi voshi, dọ ka, "Ẹmi ọnọ vi Ijesu ọnụ waa mụyaari. ¹⁶ Ọmẹyani, kwẹẹtẹ dinẹ; fụvọ isọnim si siẹngwụ zụ wụ ọnọ vi ki maa vaa sụ wụ mẹ ozida ọnri onivenu isẹnụụ wụ inọpati ami ọnri isẹnụụ yẹ ki maa vi, shi isẹnim vaa sii zụ wụ ụmono zee tu. ¹⁷ Mvaa dọ wụ tụ finụvọ Iju nin, shi ẹnẹna razi vi Iju, ọnim maa tụ wụ nin shii, ¹⁸ doti wana sha wa iri, dẹ zụ varama fini oozi va ngwụni ẹtofeyi, dẹ zụ varama fini ụkata Eshu ne tu Oshomoshi, doti e zu re ayụva aichama aani dọ finụvọ Oshomoshi, shi ogu ọnim vaa sii yi ẹnena shatụ renyi zirẹngwụ ọdọwụ ọnẹ nyi ininẹ ami.' ¹⁹ Fụvavọ, ẹwụ oshinọyi Agirippa, isa ọni Oshomoshi ki ma mẹ ini ẹtoore ana fineeku ẹbẹẹba ọnim vatụra; ²⁰ ama dim bidi vẹrẹ fiidi Iju nin ana yi Idamasikọsi ọnri ẹnẹna yi Ijerusarẹmụ, shi ẹnẹna yi irẹkụravabẹ bo aka Ijudiya, shi ẹnẹna razi vi Iju ana yi izọ. Ma kaa yụ wa ki e rinẹvarama doti ẹ va ka Oshomoshi na, doti ẹẹ misa ana va siọzụ ka irẹiza one rinẹvarama. ²¹ Fụvọ isẹnẹni ọni Iju nin si za mi ini itẹmpụrụ, dee sioze ki ẹnẹ wụ mi. ²² Oshomoshi ọ mẹ ọgụvọ yi mi poro ve tu ụmaani, ọnọ mẹ ki ma dinẹ di maa divenu isẹni ọkisẹ nin ọnri Imosisi kaa ki ọvaa mẹ, inọvidi ẹnẹna razi shi bẹrẹ ọnriazẹbani nin; ²³ ẹ kaa ka Ikiristi bẹdọ vaa rụya, dọọ vi ọza ipaapa ana vaa sha kwẹẹtẹ fiini isu, doo vee showụ ẹtofeyi yi Iju nini ọnri Ijẹntaini nini." ²⁴ Ipọọrụ mẹ kụrenu aani ta da, di Ifẹsitọsi si ọngwe tụẹba, do nowu ku o, dọ ka: "Ipọọru, wee suvu! Iwe ọnụụ ka o si chiẹngwụ, ọnaa tụ wụ uvu." ²⁵ Ama, di Ipọọrụ tụoshi, dọ ka "Ẹwụ Ifẹsitọsi ana nyụbani fu, me zi suvu. Ama, ayọọvi ọni maa sii karẹyi irẹiza, ọnri ki irẹsụ ami ọ gụ ẹtẹẹtẹrẹ. ²⁶ Fụvọki oshinọyi Agiripa ọọ yẹ isa ọni maa karẹyi inọpati aani, fụvavọ ma zi tụainẹ, dim vẹngwụnẹtẹ aa karẹyi yọ, fụvọki ma zi jiọirẹka ki ọzi nyi ọnyọnyi ini isẹnẹni bo ọna tẹ yọ; fuvọki aivi ini angwụmi ọna ya mẹ isọnọni." ²⁷ "Ẹwụ oshinọyi Agiripa, ụ wa dọ isa ọni ọkisẹ nin ka zẹẹ? Maa yẹ kụ wa dọ zẹ". ²⁸ Inaani, di oshinọyi Agiripa tụ Ipọọrụ oshi, dọ ka, "Ini ẹfi kere ọnọni, ụ a kụụ va zụụ mẹ mi dim si vara ẹnẹnaa vaatụra Kiristi." ²⁹ Ipọọru dọ tụoshi ka "Shoo ku, shoo fira, ọzi nyi ọmẹ ka; maa tuozurenu shi Oshomoshi ki ẹwụ shi aza bo enee bematọ ini irajini, ki e ve zu vene mi, ama di ẹba anijaaru ẹnẹnini ana ya mi ụvọ aani razaa ya wa ụvọ." ³⁰ Inaani, di oshinọyi ọnọ kwẹẹtẹ, shi Ibẹnisi ana vi igomina, di ẹnẹna vọ ẹn zẹ kwẹẹtẹ, ³¹ dẹ jinẹ fiini irẹngwu ọnọ. Ẹfi ẹnẹ fiizọ da, de pe ẹngwu kaa ka, "Ọzi nyi isa ọnọ ọnọru ọnọni mẹ ọnọ si vọrọ ki o su navẹki ki a kụẹba shi o ụvọ." ³² Di Agiripa kaa yi Ifẹsitọsi ka, "Dọvi ki ọnọru ọnọni ọzi yaan si si irẹyi ọnọni ni ni ikootu Isiza, a yan zụ fụrẹụvọ."