¹ Ọmẹyani, Ifẹsitọsi ọ ngwụ ọkaakoro ọnọ, inaama ẹkụshi ẹẹta, dọ fụri Isẹsiriya shirẹ ni Ijerusanẹmụ. ² Di arufa ọbani ọnri Iju nin ọneyiyẹ vẹ va si irẹyi Ipọọrụ tụrẹka, ³ de fisue ọgụvọ finụvọ aani one ve zuu ne Ipọọrụ ngwụrẹyi --- dẹ kaa yọ ki ọ shi Ipọọrụ irẹka tụ Ijerusanẹmụ, doti ẹ zụ wụ ọ ụmẹnẹ raa na inoze. ⁴ Ama, di Ifẹsitọsi voshi ki Ipọọrụ vi anijaaru Isẹsiriya, ọnri ki ọn nyẹmbẹ vaa firaa ni izọ. ⁵ Dọ ka, "Fụvavọ, ẹnẹna va zụụ kụafụza yi, ẹẹ vẹ ki yaa na. Aaviki ọ nyi isọni ọnọrụ ọnọ mẹ ene rezi ze, dụ wa kaa tụẹshẹ nini." ⁶ Ifẹsitọsi ọzi mẹ funa ẹkụshi ishinta navẹki ẹkụshi ẹwụ, dọ vaa nọ Isẹsiriya. Ini eyineyishẹ aani, dọ yatụ tụni udi ishọọji aani, dọ si ụmọ tụ ki ana si Ipọọrụ ve tu ọni. ⁷ Ẹfi ọni Ipọọrụ vẹ, di Iju nin ana fụri Ijerusanẹmụ vẹ dinẹ tụ irasha ana gụrẹ, dẹ kụrẹka ẹkata ẹkata ku Ipọọrụ, ọnẹ rai zụa divenu aani. ⁸ Di Ipọọrụ kụrenu aani, dọ ka, "Ọzi nyi akụvi ọnim mẹ ka ofi Iju nin na, navẹki itẹmpụrụ, navẹki Isiiza." ⁹ Ama, Ifẹsitọsi ee si ki Iju nin e re ọni eyi, fụvavọ dọ voshi yi Ipọọrụ, dọ ka, "U wee si kụ waa ni Ijerusanẹmụ di ma na mishọọji ami yụ wụ izọ inọpati isẹnẹni?" ¹⁰ Di Ipọọrụ ka, "Ma dinẹ tụnọvidi udi ishọọji Isiiza, inaani ọna bẹdọ va yaa mishọji irẹyi ami. Ma zi mẹ ivi ọnyọnyi ka Iju ọnyọnyi na, vene ẹwụ nyẹmbẹ mẹ zẹ yi yẹ. ¹¹ Ama, aaviki ọ nyi ọshimi ọnim mẹ ana mẹ mi rivi ọna vaa mẹ ki a wụ mi, me zi yi ki me zee su. Ama, aaviki irẹka ọnẹ kụ ku mi vi osusu, asi ọzọnzọnyi si mi chire wa ụvọ. Maa si irẹyi ami tụnọvidi Isiiza." ¹² Inaama ọni Ifẹsitọsi pe opoze nin karẹyi da, dọ voshi ka, "Waa si irẹyi awụ tụnọvidi Isiiza da. Idi Isiiza ọnụụ vaa nọ!" ¹³ Inaama ẹkụshi ene rezi ku, di Oshinọyi Agiripa ọnri Ibẹnisi ngwụ Isẹsiriya na kụ Ifẹsitọsi ụkụ ijọva. ¹⁴ Inaama ọnọ yi izọ mẹ ẹkụshi ẹrụrụ da, di Ifẹsitọsi si irẹyi Ipọọrụ tụ Oshinọyi Agiripa ọvidi; dọ ka, "Ọ nyi ọnọrụ ọnyi ọni Ifẹniksi fụrụvọ tụ izọni tụni ijaaru. ¹⁵ Ẹfi ọnim yi Ijerusanẹmụ, di arụfa ọbani nin ẹnri azẹkụ Iju nin tụrẹka ivi renyi renyi ọnọmẹ yi mi, de fisue ki ma mishọọji isu yọ. ¹⁶ Dim voshi yụ wa ki ọzi vi isoshiẹtẹ ani Iromu nin ki ya si ọza chire ẹnẹna va kụrẹka ku o ụvọ, aaviki ọi ki kụrenu aani. ¹⁷ Fụvavọ, ẹfi ẹne peregụ tụ izọni, ma zi si o turẹtẹ, dim vẹ izọni ini eyineyishẹ aani va yatụ tụni udi ishọọji ami, dim si ụmọ tụ ki a na si ọnọrụ ọnọ va yi mi izọni. ¹⁸ Ẹfi ọni ẹnẹna va tụrẹka aani kwẹẹtẹ aa kụrenu aanini, dim roo ka irẹka ẹnẹ kụ ku o bo, ọzi zarẹsụ. ¹⁹ Akikọnọ, dim re ki ẹ nyi ẹshankata inọpati irafẹkẹ aanini ọnri ọnọrụ ọnyi anaa shi Ijesu ene fu su, ama di Ipọọrụ aa kaa ki ọ yi yẹshẹ. ²⁰ Oze ọnim vaa zi tụrafụ irẹyi ọnọ oi ve ye mi ẹtẹrẹ, fụvavọ dim fọ ọ ki o wee si ki ma si irẹyi aani ni Ijerusanẹmụ, doti ọ na veyi ka ishọọji izọ. ²¹ Ama, ẹfiẹni Ipọọrụ kaa ki o nee si ki a si ọni tụni ijaaru tụ Iromu, doti ọnọ yi izọ zi ishọọji Isiiza, dim si ụmọ kaa ki a si ọ tụni ijaaru tụzọni poro netu ẹfi ọnim va sii si ọ naa yi Isiiza." ²² Di Agiripa va kaa yi Ifẹsitọsi ka, "Mvee si ki ẹmi ono ze bi batọ tụni irẹyi ọnọrụ ọnọni." Di Ifẹsitọsi kaa yọ ka, "Ụ vaa wụrẹyi aani ụfụọ." ²³ Ini eyineyishẹ aani, di Agiripa ọnri Ibẹnisi vẹ izọ, da kụ irashẹ vatụra wa; dẹ kụ ọga ashoja nin vatụrẹngwụ ngwụni ụgụa ọna yaa mishọọji bẹri aza aneeyi yẹ ini irẹkụra ọnọ. Ẹfiẹni Ifẹsitọsi sụmọ karẹyi, da na si Ipọọrụ jinẹ ve tu wa. ²⁴ Di Ifẹsitọsi ka, "Ẹwụ oshinọyi Agiripa, shi anẹrụ bo ana yi izọni pe yi, a vu re ọnọrụ ọnọni nini; azọkọni Iju bo ana yi Ijeusanẹmụ shi ẹnẹna yi izọni ee ve tu mi, dẹ si ọngwẹ ọikụ kaa yi mi ki ọzi vọrọ ki ọnọrụ ọnọni ọ kụ yẹshẹ. ²⁵ Maa wụ ki ọzi nyi akụvi ọnọ mẹ ana vaa mẹ ki a wụ ọ; ama fụvọki ọọ kaa ki a si irẹyi awụọni vi di Isiiza, ọnọ mẹ ki ma zẹẹ kim vaa si ọ ne tu o. ²⁶ Ama me zi re isa sụvọza ọnọ vọrọ ki ma chẹrẹ tụshi Isiiza. Fụvavọ ọnim si si ọ ve tu wu, paapa ẹwụ oshinọyi Agiripa, doti me zu re isa gụ irẹyi ọnim vaa chẹrẹ inọpati irẹyi ọnọni. ²⁷ Fụvọki ọzi sẹrẹ ki ma si anijaaru ne tu Isiiza di maa ma chẹrẹ ivi ana kụ ri ọ bẹrẹ."