¹ Inaama ẹkụshi ẹẹshi, di Ananayasi, arụfa ọbani nini, azẹkụ ẹnyi ọnri ọyarạkarẹyi ọnyi, anaa shi Itaturusi nọ izọ. Azẹnẹni ẹnẹ shi Ipọọrụ irẹka tụni ọvidi Igomina. ² Ẹfi ọni Ipọọrụ dinẹ tụni ọvidi Igomina, di Itaturusi vẹrẹ aa kụrẹka ku Ipọọrụ, dọ kaa yi Igomina ka, "Fụvọ awụ, yaa nyi ẹngwọro ọbanị, ọnri ki orire ọnụ wee re iramaụfụọ tẹtẹ ọ kụ isọiza vẹ irẹkụravabẹ ayi; ³ fụvavọ, ẹwụ Ifẹniksi ọyaramẹ, yaa si avọkụ ayi keekere yụ wụ, dii zẹ si avọkụ dọ isọiza ọnụụ mẹ yi yi bo ngwụ ireshi. ⁴ Me zi si ki me ku ze ne du wụ ẹfi sha, fụvavọ daka navọ we batọ tụni irẹyi ami. ⁵ Fụvọki yee re ki arefu ọni ọzọnọni vi yi yi, ọnri ki ọ zaa kii kuushi Iju nin, ana garashi ẹshẹ bo, inẹ, ki ẹẹ kwẹẹtẹ tu anụmọ nin. Ọdọvidi ụvọrẹkụ ani Inazarẹti ọnọ vi. ⁶ Do vene zee sii sioze ki ọ naa mẹ isa ana ra ma mẹ ini itẹmpụrụ; ọnọ mẹ ki ya za a. ⁷ Ama, di Inisiyasi, ọna vi anụkọrọ ijọva si ụkata dọ ọ fụrẹ yi ụvọ. ⁸ Ẹfi ọnụụ raa fọ Ipọọrụ ipẹẹpẹ inọpati irẹyi ọnii si shiọrẹka tụni ọvidi awụ, ụ vaa yẹ izọ bo mẹ ya fini irẹyi irenu aani. ⁹ Iju nin nyẹmbẹ ẹ nyi ụvọ tụni irẹka ọnamụ ku o, ana siọzụ ki irẹka ọnii shi ọ vi irẹiza. ¹⁰ Ama, ẹfi ọni Igomina miuvọ shi Ipọọrụ ki ọ kụrenu aani, di Ipọọrụ tuoshi ka, "Maa yẹ ki oo si ku ọnụ fụrẹ aa mẹ ọkarẹyi ini irẹkụravabẹ ọnọni, fụvavọ inẹ oshine ọni ma sii sharẹyi afụ shaa yụ wụ. ¹¹ U vee re ki ọi mi mẹ para ẹkụshi ẹwụrẹva fu ọnim fụrẹ nọ Ijerusanẹmụ na mẹ irafẹkẹ. ¹² Ẹfi ẹnẹ re mi ini itẹmpụrụ, ọzi nyi ẹzẹni ẹmi riọ gẹ nyi ẹshankata, ma zi kụ shi aza inẹ ki ẹ kwẹẹtẹ tu anụmọ ninị, shi ọ vi ini Isinagọọgụ yọ, navẹki ini akaakana irẹkụra. ¹³ Ọzi nyi isẹnẹ va zụ sụvọọ za ki irẹka ana kụ ku mi vi irẹiza. ¹⁴ Ama, maa zẹẹ ki maa fẹkẹ Oshomoshi ọni ada ayinin fẹkẹ ini Oze Ọmimẹ Ikristi, ọnẹ kaa ki ọzi vọrọ. Maa dinẹ yi isabo ọna yini ofi ọnri isẹni ọkisẹ nin chẹrẹ tẹtẹ. ¹⁵ Ọkụayi tụra Oshomoshi ọni azẹnẹni nyi ọni ẹmi ọn zẹ nyi nyi; ka ọshisha kwẹẹtẹ vaa yinaani yi aza ọiza shi aza ẹshimi. ¹⁶ Fụvavọ, ọnim sii re ki ma zi mẹ isẹnẹ vaa mẹ ẹngwụụ ji mi ebe inọvidi Oshomoshi ọnri inọvidi aza. ¹⁷ Ẹfi ọni irayi ẹrụrụ mẹ parafu, dim va mẹ ọgụvọ renyi renyi bẹrẹ ọgụvọ ẹkẹshi yi irẹkụravabẹ ami. ¹⁸ Ẹfi ọnim vọọ mẹ, Iju ẹnyi ana fụri Eshiya vẹ ee re mi ini irafẹkẹ ọnyinyinẹngwụ ini itẹmpụrụ, aivi ini akaakana azọkọni, navẹki izẹna yaa va ẹtẹ zii. ¹⁹ Ọ vọrọ ki azẹnẹni ẹ yaan vi inọvidi awụ ọmẹyani, doti ẹ va kaa, isọnẹ ki maa mẹ ene rezi ze, aaviki ẹ nyi ọnyọnyi. ²⁰ Ọọzivavọ, ọ vọrọ ki azẹnẹni ẹ kaa amẹdụ ọnim mẹ, mmẹ dinẹ tụni ọvidi iragụ azẹkụ Iju nin, ²¹ ọchishi ki ẹ kaa ki inọpati isa ọnya ọnọni, ki mee nowu ini akaakana aanini ka, 'Fụvọ ki maa nyi ọdọwụ ini ọshisha kwẹẹtẹ fini isu ana si shi mi irẹka tụni ọvidi awụ irajini.'" ²² Inaani, di Ifẹniksi, ọna nyi ọyiyẹ ẹtẹẹtẹrẹ inọpati isẹnẹni, za ishọọji dinẹ tu ọkụshi ọsa. Dọ ka, "Mvaa mishọọji ifẹyi awụ ẹfi ọni Inisiyasi, oshiresu ashọja ra fụri Ijerusanẹmu vẹ." ²³ Dọ va sụmọ kaa yi ọga ashọja ụvọrẹkụ ẹchẹshi ki ọ na sieyipe Ipọọrụ ẹtẹrẹ, ki ama ọ yi ọ oze, doti ẹta aani ẹ zụ vaa kụ ọ, doti ọ ta aani ọnyọnyi ọna ra vaa mọgụvọ yọ, a sa ji ọ oze. ²⁴ Inaama ọkụshi che, di Ifẹniksi ọnri ose aani Idurusina ana vi Iju varama, dẹ tụshi Ipọọrụ, dọ wụ inọpati ọdọwụ ini Ijesu Ikristi. ²⁵ Ama, ẹfi ọni Ipọọrụ pe e karẹyi inọpati ọmimanasẹrẹ, ọzizẹngwụsụ, ishọọji anaa vẹ, di angwa shi Ifẹniksi, dọ ka, "Kwẹẹtẹ wa savọọ na. Mvaa tụụ shi wu ẹfi ọnim ra varama roze." ²⁶ Ama, avọ ọnọ mẹ zaa nyi nyi iribatọ ki Ipọọrụ vaa yi ọni ẹkẹshi, fụvavọ dọọ si ẹfi tụrẹfii tụ shi o, doo pe e karẹyi. ²⁷ Ama, inaama irayi ẹẹva, di Iposhusi Ifẹsitọsi vara Igomina ẹfi ọni Ifẹniksi mẹ ụmẹ aani ta da; ama di Ifẹniksi e si ki Iju nin ee re ọni eyi, fụvavọ dọ navọ Ipọọrụ tụni ijaaru.