¹ Ipọọrụ ọ dinẹ tụnọvidi iragụ arụfa nin, dọ ka, "Ẹwu nin ẹnyara ami, ivefu ọiza ọni maa si mẹshẹ ami inọ̣vidi Oshomoshi ve tu irajini." ² Di Ananayasi, oshirẹsụ arụfa nin kaa yi ẹnẹna dinẹ pe Ipọọrụ ki e jisaku o irenu. ³ Inaani, di Ipọọrụ kaa yọ ka, "Oshomoshi vee jisaku wu, ẹwụ ọfatụ vaku. Ụ wa yatụ a si ofi mọkarẹyi irẹyi ami, ama dụ waa misa ofi razi ka mẹ, dụụ kaa ki a jisaku mi irenu?" ⁴ Ẹnẹna dinẹ tụzọ dẹ ka, "Aani ọnụụ mẹ waa kụ oshirẹsụ arụfa Oshomoshi ụfụ?" ⁵ Di Ipọọrụ ka, "Ẹwụ nin ẹnyara ami, ma zi yẹ ki oshirẹsụ arụfa ọbani ọnọ vi. Fụvọki a chẹrẹ tẹte kạ, Wa zi bẹdọ karẹyi ọshimi shi ọdọvidi aza awụ nini." ⁶ Ẹfiọni Ipọọrụ re ki akọnya ini iragụ arụfa ẹnẹ vi Isadusi, di akọfụụva vi Ifarisi, dọ si ọngwẹ tụẹba, dọ ka, "Ẹwụ nin ẹnyara ami, Ifarisi ọnim vi, dim vi Ifarisi nin. Fụvo ọkụayitụra ọnim nyi ini iribatọ ọshishakwẹẹtẹ fini isu ọnẹ si shi mi irẹka." ⁷ Ẹfi ọnọ maan ka da, di ẹshankata ngwụ azọkọni ẹnẹ akaakana, di Ifarisi ọnri Isadusi nin, si ga tụ oze ẹẹva. ⁸ Fụvọki Isadusi nin vanaa ka ki ọza re su da, o su, ọi kụ zẹ nyi ki ọọ sha kwẹẹtẹ; ọnri ki ọzi nyi isẹnaa shi angeni, navẹki ifẹ. Ama, Ifarisi nin ẹnẹ dọzẹ ki isẹnẹni bo yinaani. ⁹ Inaani, di ẹshankata si ngwụ wa akaakana, dẹ kwẹẹtẹ, dee nowu ku ẹngwụ, dẹ ka, "Ye zi re ivi ọnyọnyi ini ẹngwụ ọzọnọni. Ụ wa yẹ nin aaviki angẹni navẹki ifẹ ọnọ pe e karẹyi?" ¹⁰ Ẹfi ọni ẹshankata ebebani si ngwụ ọ, di angwashi ngwụ oshirẹsu ashọja nin ẹngwụ, ki asẹ va na sẹ Ipọọrụ sha ripi ripi; dọ sụmọ kaa yi ashọja nin ki ẹ na si ẹkẹẹka si Ipọọrụ fiini akaakana iragụ arụfa nini vini ireshi ọkata. ¹¹ Inaafụ ini eyineyishẹ ishọ, di Ananyiyi va dinẹ pe Ipọọrụ, dọ ka, "Asu shiangwa; ụ mẹmẹ divenu inọpati ami Ijerusanẹmụ, avọ ụ mẹ vaa divenu ami Iromu." ¹² Eyi mẹ si ni, di Iju ẹnyi kụrẹsụ gẹ dẹ na nọma, de chi ẹngwụ aanini eku, dẹ shieku ki ẹnẹ zaa ri isọnyọnyi, domotori ki enee fu enyi ọchishi ki ẹn wụ Ipọọrụ da. ¹³ Enẹna shọma ọshimi ọnọni ẹ para aza ẹbẹrẹva fu. ¹⁴ De ne tu arụfa ọbani nin ọnri azẹkụ nin, dẹ ka, "Yaa gẹ sheku ọbani yẹ ẹngwụ da ki ya zaa ri isọnsonyi ọchishi kii wụ Ipọọrụ da. ¹⁵ Fụvavọ, yee si ki iragụ arụfa nin ẹ kaa yi ọdọvidi ashoja nin keekere ki ọ si Ipọọrụ tụẹshẹ, dụ wa mẹ venebiri ki ẹwụ nin ọ va zụụ tuoshi tụni irẹyi aani inoze ana sẹrẹ. Inaayayi, ye teni ẹngwu tẹtẹ da kii vaa wụ ọ dọ tagwa va ngwụ izọni. ¹⁶ Ama oziọmụsha anavi oziọnyara Ipọọrụ ọnyẹnẹ ọ wụ ki e kuẹtẹ e zi Ipọọrụ inoze, dọ sẹ ni ni ọba ashoja nin, dọ na kaa yi Ipọọrụ. ¹⁷ Ipọọrụ ọ shi ishọja ọnya, dọ ka, "Si oziọmụsha ọnọni ne tu ọdọvidi ashọja keekere, fụvọki ọ nyi irẹyi ọnọọ vaa kaa yọ." ¹⁸ Inaani di ọdọvidi ashọja ẹchẹshi ọnọ si ọziọmụsh ọnọ̣ ne tu ọdọvidi ashoja keekere, dọ ka, "Ipọọrụ anẹgwa ọnọ shi mi, dọ ki ma si oziọmụsha ọnọni ve tu wu, kọ ọ nyi irẹyi onoo si ki ọnaa kaa yụ wụ." ¹⁹ Dọ ọdọvivi ashọja keekere sụvọza ni ni oboka, dọ fọ ọ ka, "Yee irẹyi ọnu wee si kụ waa kaa yi mi?" ²⁰ Di Oziomụsha ọnọ ka, "Iju nini e ̣shọma, de si irenu vọnya ki ẹn vaa vẹ vaa ka yụ wụ kụ wa si Ipọọrụ chi vini iragụ arụfa nin ụfụọ, doti ene zu re tụni irẹyi aani ẹtẹtẹrẹ. ²¹ Ama, asụụ zẹ ẹ wa, fụvọki aza ẹ tụra ini ẹbẹrẹva ene kuẹtẹ e zi o inoze. Ee pe ẹngwụ shieku ki ẹnẹ zaa ri, ene zee fu, ọchishi ki ẹni wụ Ipọọrụ da. Ẹwụ ene kue zi ku ụ wa fụri irenu yi ẹni." ²² Inaani, di ọdọvidi ashoja keekere ọnọ navọ oziọmụsha ọnọ ki ọọ na, inaama ọnọ kaa yọ da ka, "Asụụ kaa yi ọzọnzọnyi kụ waa karẹyi ẹnẹni bo yi mi." Aa si Ipọọrụ ne tu Ifẹniksi igomina ²³ Di ọdọvidi ashọja ọnọ shi ọga ashọja ụvọrẹkụ ẹchẹshi ẹẹva, dọ kaa yụ wa ka, "Pere ashoja irẹka gụ, ana vaa ziọ ni irashaọ gọdọ ne tu Isisariya, du we teni wa tẹtẹ, shi anovurata ẹnẹ ẹbẹrẹta tụrrẹwụ, ọnri anọbọdọ irẹka. Iwakati ọfụụta ini ajirafụ ọnụụ va sii kwẹẹtẹ nin." ²⁴ Dọ zẹ si sụmọ kaa yụ wa ki ẹ si ovurata tẹtẹ ọni Ipọọrụ vaa shirẹ, doti ọ sivọ ne tu igomina Ifẹniksi ini ẹngwọrọ. ²⁵ Do maan chẹrẹ iwe ka: ²⁶ "Iknaudiyọsi Nisaya tushi Igomina Ifeniksi ọyaramẹ, maa kụ wụ. ²⁷ Iju nin ẹ za ọnọrụ ọnọni, dẹ vaa wụ ọ, dim kụ ashoja na dọọ fụrẹwa ụvọ, ẹfiọnim yẹ da ki ani Iromu ọnọ vi. ²⁸ Dim vee si ki ma yẹ fụvọ isẹnẹ si shiọirẹka. Fụvavọ dim si ọ ne tu wa ini iragụ aanini. ²⁹ Dim si yẹ ki fụvọ ofi aanini ọna si shiọirẹka, dim ve re ki ọzi nyi isọnọ mẹ ọna mọrọ ishọọji isu, navẹki ẹngwa. ³⁰ Da va kaa yi mi ki e kụẹtẹ ee zi o, ki ẹn vaa wụ ọ, ọnọ mẹ ki ma si ọ tụ ve tu wu ini ọfirọfira, dim kaa yi ẹnẹna kaa ki ọnyi isọnọ mẹ ki ẹ va shiọrẹka inọvidi awụ. Aadụmụ." ³¹ Inaani, di ashọja ẹnẹ vatụra isẹna kaa yụ wa ki ẹ mẹ. Dẹ si Ipọọrụ ni Antipatrisi ini ajirafu. ³² Ini eyineyineshẹ aani, di ẹrụrụ ini ashoja ẹn navọ anovurata nini ki ẹ vatụra Ipọọrụ, dẹn kụ varama nini Ọba ashọja. ³³ Ẹfiẹni anovurata nini tu Isisariya, dẹ si iwe ọni ọdọvidi ashọja keekere chẹrẹ tushi Igomina yọ, dẹ zẹ si si Ipọọrụ chire ụvọ. ³⁴ Ẹfiẹni Igomina kiwe ana chẹrẹ tushio da, dọ fọ Ipọọrụ ka yere ọkakooro ọnọ Ipọru fụrẹ. Ọmẹ yẹ ki Isinishiya ọnọ furẹ, ³⁵ dọ ka, "Mvee batọ tụni irẹya awụ na gẹtẹ ẹfiẹni ẹnẹna shi wụ irẹka raa vi izọni." Inaani, dọ sụmọ kaa ki a savọ si ọ na tẹ tụni ọba ijọva, izẹni Ihẹrọdụ oshinọyi ya.