¹ "Ẹwụ nin ẹnyara ayi ọnri ada ayi nini, batọ nin di ma kụrenu ami zụ wụ nini." ² Ẹfiẹni azọkọni ẹnẹ mẹ wụ ki irẹkụra Iburu ọni Ipọọrụ si karẹyi shi ẹni, dẹ navọkụ. Dọ ka, ³ "Iju ọnim vi. Itasọsi ini Isinisiya ọna ya ma mi. Ama irẹkụra ọnọni ọna ya zụ mi isa ini iragada Igamaniẹni. Aa zụ mi ngwụnẹ ngwụnẹ inoze ofi ana si yi adayi nini. Maa si ẹngwụ bo mụkọrọ yi Oshomoshi vene ẹwụ nin bo mẹ zaa mi mẹ irajini. ⁴ Maa mụya ri Oze Ọdọwụ nin netu ka daa wụ wa, di maa tụ wa ipetuma, di maa sụ wa nee chire wa ụvọ ini ijaaru, shi ọnụrụ shi ọnyẹnẹ aanini; ⁵ oshirẹsụ arụfa ọnri azẹkụ nin bo va zụụ divenu irẹyi ọnọni. Maa vana dọ iwe finụvọ aanini ne tu ẹnyara ayi anọdọwụ nin ana yi Idamasikọsi, ki ma na za wa, di ma tụ wa ipetuma vi Ijerusanẹmụ, doti a mụyari wa. ⁶ Irẹkụshi ọnyi, mmẹ yini ụsoze ami, di maa zigụrẹ Idamasikọsi inọpati ụmọọdụ, di ẹtofeyi nyaaa fụri ẹbẹẹba sha varakara mi ụpọnyụpọnya. ⁷ Maa sẹdụ nyẹtẹ, dim wụ ọngwẹ ana kaa yi mi ka, 'Isọọrụ, Isọọrụ, ọmẹzi dụ waa mụyaari mi kẹ?' ⁸ Dim voshi ka, 'Ẹnụụ vi kẹ, Ananyiyi?' Dọ kaa yi mi ka, 'Ẹmi ọnọ vi Ijesu ani Inazarẹtiti ọnụ waa mụyaari.' ⁹ Ẹnẹna ya pe mi e re ẹtofeyi ọnọ, ama, irẹyi ọni ọngwẹ ọnọ ka ọzi ngwụ wa ụtọ. ¹⁰ Dim fọ ka, 'Sim va mẹ kẹ, Ananyiyi?' Di Ananyiyi kaa yi mi ka, 'Kwẹẹtẹ dụ wa nọ Idamasikọsi. A vaa kaa yụ wụ izọ isa bo ọnụụ bẹdọ vaa mẹ.' ¹¹ Dim rei ku zu reẹtẹ fụvọki ẹtofeyi nyaa ọnọ o gu mi eyi da. Di ẹnẹni ẹmi rụ wa gẹ zi kụ sụvọ za mi zụoze na ngwụ Idamasikọsi. ¹² Mee ne tu ọnọrụ ọnyi anaa shi Ananayasi izọ, ọna jẹngwụ ngwụ irafẹkẹ Oshomoshi ẹtẹẹtẹrẹ, dọọ vaatụra ofi Iju Oshomoshi. Iju nin ana yi Idamasikọsi bo vana ka ọiza aani. ¹³ Ọọ vẹ va dinẹ pe mi dọ ka, 'Ẹwụ Isọọrụ ọnyarami, sharii awụ, du wee reẹtẹ.' Afụọnọ afụọnọ, dim re e. ¹⁴ Umotu, dọ ka, 'Oshomoshi ada ayi nin ọ ni wụ kụ wa yẹ osisi awụọni, du we re Ọnirẹiza ọnọ, ọnri ka dụ wa wụ ọngwẹ anaa jinẹ fineenu aani. ¹⁵ Fụvọki ụ vaa vi onivenu aani yi aza bo inọpati isọnuu re ọnri irẹyi ọnụụ wụ. ¹⁶ Sẹnụụ dinẹ e zi kẹ? Ọmẹyani, kwẹẹtẹ, doti a mẹ isami yụ wụ, dụ wa nyina aichama awụ vasha ini irẹsha Ananyiyi.' ¹⁷ Inaama ọnim varama ni Ijerusanẹmụ, mmaa tuozurenu ini itẹmpụrụ, da si ẹtoore zụ mi. ¹⁸ Dim re Ijesu, dọ kaa yi mi ka, "Mụsọfira dụ wa sẹ fụri Ijerusanẹmụ, fụvọki ẹ zaa dọ ivenu awụ inọpati ami wụ.' ¹⁹ Dim ka, 'Ananyiyi, ẹni nyẹmbẹ ẹ yẹ ki maa kụ anọdọwụ nin shi ijaaru, dim tu wa ini isanọọgụ keekere. ²⁰ Ẹfi ọna ji Isitivini ana vi onivenu awụ anya, maa sụvọtụọ, dim ya pe wa irama, dim si eyi pe auru ẹnẹna wụ ọ.' ²¹ Ama, dọ kaa yi mi ka, 'Waa na, fụvọki maa vaa tụ wụ ni irasha ọgọdọ nee tu Ijẹntaini nini.'" ²² E baatọ poro dọvanyi ki ọ maan karẹyi ọnọni. De ve kue nowu ka, 'Ẹnngwụ ọzọnọni vọna vaa wụ fụrẹshẹ, fụvọki ọzi sẹrẹ kọ mẹshẹ. ²³ E mee nowu, dee ne auru aanini shirẹ, dee che edudu shirẹ, ²⁴ di ọdọvidi ashoja ọnọ va si ụmọ kaa ki a si Ipọọrụ ngwụ ireshi ọkata ọnọ. Dọ kaa yụ wa ki ẹ nya ijampa, doti ẹ fọ ipẹpẹ, doti ọni nyẹmbẹ ọ yẹ isọnọ mẹ ana mẹ ki Iju ẹ manii che ọ ọkụ. ²⁵ Ẹfiẹnẹ si orupa ụpa uye sụ ọ da, di Ipọọrụ fọ ọdọvidi ashoja ẹchẹshi ana dinẹ tụzọ ka, "Ọwa yi ni ofi ka ọvọrọ ki a si ijampa tu ani Iroomu ọna razi mishọọji ivi yi?" ²⁶ Ụmẹ ọni ọdọvidi ashoja ẹchẹshi ọnọ wụ irẹyi ọnọni, do ne tu ọdọvidi ashoja keekere, dọ fọ ọ ka, "Sẹnu waa vaa mẹ aan kẹ? Ani Iromu ọni ọzọnọni vi no." ²⁷ Ọdọvidi ashoja keekere ọnọ o ve tu Ipọọrụ, dọ ka, "Kaa yi mi, ani Iroomu ọnụụ wa vi?" Di Ipọọrụ voshi ka, "Ẹẹ, ani Iromu ọnim vi." ²⁸ Di ọdọvidi ashoja keekere ọnọ ka, "Ẹkẹshi ụnọmpa ọnim si dọ tangwa va nyi ki ma vara ani Iroomu." Ama di Ipọọrụ ka, "Oziẹtẹ Iromu ọnim vi." ²⁹ Inaani, di ẹnẹnaa vaa fọ ọ ipẹpẹẹ sẹ naavọ. Di ọdọvidi ashoja ọn nyẹmbẹ shiangwa ọ mẹ yẹ ka Ipọọru vi ani Iromu, fụvọki ọ sụ ọ orupa da oshẹtẹ. ³⁰ Ini eyineyishẹ aani, di ọdọvidi ashoja ọnọ e si ki ọnọ yẹ irẹiza inọpati isọni Iju nini ki Ipọọrụ ọ mẹ. Ọọ ngwara Ipọọrụ tẹtẹ, dọ kaa yi arụfa ọbani nin shi iragụ azẹkụ nin ki ẹ va gẹ. Dọ va si Ipọọrụ chi nẹtẹẹtẹ, dọ si ọ tụni akaakana aanini.